Жаңылыктар
ЕЭК ЕАЭБ өлкөлөрүнүн санариптик рынокторун изилдөөгө карата жалпы ык-амалдарды калыптандырууда
Евразия экономикалык бирлигинде санариптик рынокторду изилдөөгө карата жалпы ык-амалдарды калыптандыруу маселелери 27-майда Евразия экономикалык комиссиясында ЕАЭБ өлкөлөрүнүн монополияга каршы органдарынын эксперттери менен болгон кеңешмеде каралды.
Россиянын Федералдык монополияга каршы кызматынын өкүлү товарлар/кызмат көрсөтүүлөр (маркетплейстер) жөнүндө маалымат агрегаторлорунун ээлеринин тейлөө рыногундагы атаандаштыктын абалын изилдөөнүн негизги аспектилери жөнүндө айтып берди. Атап айтканда, сатып алуучулардын, сатуучулардын жана өзү алып кетүү пункттарынын өз ара аракеттенүүсүн камсыздоочу маалыматтык ресурстардын ээлери катары маркетплейстин кызмат көрсөтүүлөрүн классификациялоонун өзгөчөлүктөрүнө көңүл бурулду. Ошондой эле, үстөмдүк абалды баалоодо колдонулуучу критерийлер жөнүндө сөз болду (Wildberries жана Ozon мисалдарында). Кеңешменин катышуучулары каралып жаткан чөйрөдөгү россиялык мыйзамдардын новеллалары менен таанышышты.
Тараптар санариптик рынокторду баалоонун колдонулуп жаткан ыкмаларынын окшоштугун белгилешти жана укук колдонуу тажрыйбасы менен алмашууну улантууну макулдашышты.
ЕЭКтин Монополияга каршы жөнгө салуу департаменти мүчө мамлекеттердин санариптик рынокторун изилдөөдө колдонулуучу жалпы мамилелерди түзүү боюнча системалуу иштерди жүргүзөт. Мындай ыкмаларды иштеп чыгуунун максатка ылайыктуулугу жөнүндө чечим Бирлик өлкөлөрүнүн монополияга каршы органдарынын жетекчилери жана Комиссиянын атаандаштык жана монополияга каршы жөнгө салуу боюнча министри тарабынан 2023-жылдын ноябрында кабыл алынган.
