Жаңылыктар
ЕЭК жана ШКУ агроөнөр жай комплексинде өз ара аракеттенишет
Евразия экономикалык комиссиясынын өкүлдөрү айыл чарба жаатындагы жаңы жана жогорку технологиялардын жетишкендиктеринин Янлин көргөзмөсүнүн ачылышына жана Сяньянда (Кытай Эл Республикасы) Шанхай кызматташтык уюмунун заманбап айыл чарбасын өнүктүрүү боюнча тегерек столго катышышты.
Комиссиянын делегациясы ШКУнун агрардык технологияларды алмашуу жана окутуу боюнча демонстрациялык базасынын технологиялары жана мүмкүнчүлүктөрү менен таанышып, КЭРдин улуттук бренди жана эл аралык алмашуулардын жана илимдин жана практиканын жетишкендиктеринин негизинде кызматташуунун жаңы моделдерин өнүктүрүүнүн масштабдуу платформасы катары таанылган жогорку технологиялуу айыл чарбасынын өнөр жай аймагын көрүп чыгышты.
ЕЭКтин Агроөнөр жай саясаты департаментинин директорунун орун басары Айна Кусаинова тегерек столдун катышуучуларын Евразия экономикалык бирлигинин өлкөлөрүнүн агроөнөр жай комплексин туруктуу өнүктүрүүнү камсыздоо боюнча кызматташтыгы жөнүндө маалымдады.
Айыл чарба, жашыл жана туруктуу айыл чарбасын өнүктүрүү жаатында пикир, тажрыйба жана мыкты практикалар менен алмашуу болду. Регионалдык жана глобалдык азык-түлүк коопсуздугун камсыздоо үчүн жаңы агрардык технологияларды жана санариптештирүүнү киргизүүнүн, ШКУ өлкөлөрүнүн биргелешкен аракеттерин колдонуунун маанилүүлүгү белгиленди.
ЕЭК өкүлдөрү ШКУнун башкы катчысынын орун басары Нурлан Ниязалиев жана Казакстандын, Кыргызстандын жана Россиянын делегацияларынын жетекчилери менен жумушчу жолугушууларды өткөрүштү. ЕЭК менен ШКУнун айыл чарба тармагындагы кызматташтыгынын артыкчылыктуу багыттары, ошондой эле 2025-жылы азык-түлүк коопсуздугу, ЕАЭБ жана ШКУ өлкөлөрүнүн айыл чарбасын туруктуу өнүктүрүү боюнча биргелешкен иш-чараларды уюштуруу жана өткөрүү маселелери талкууланды.
Иш-чараларга ШКУнун мүчө мамлекеттеринин, Бириккен Улуттар Уюмунун Азык-түлүк жана айыл чарба уюмунун, БУУнун Дүйнөлүк азык-түлүк программасынын жана башка эл аралык уюмдардын, ошондой эле КЭРдин Айыл чарба жана айыл иштери министрлигинин, Тышкы иштер министрлигинин жана Коммерция министрлигинин өкүлдөрү катышышты.
