Жаңылыктар

17.08.2023 (Обновлено: 22.08.2023 09:25)

ЕЭК министри Виктор Назаренко жана Росстандарттын башчысы Антон Шалаев ЕАЭБде техникалык жөнгө салуу жана стандартташтыруу чөйрөсүн өнүктүрүүнүн келечегин талкуулашты

16-августта Евразия экономикалык комиссиясынын штаб-квартирасында ЕЭКтин техникалык жөнгө салуу боюнча министри Виктор Назаренко менен Техникалык жөнгө салуу жана метрология боюнча федералдык агенттиктин (Росстандарт) жетекчиси Антон Шалаевдин жумушчу жолугушуусу болуп өттү. Жолугушуунун жүрүшүндө тараптар экономика тармактарынын атаандаштыкка жөндөмдүүлүгүн жогорулатуу, Бирликтин алкагында соодадагы техникалык тоскоолдуктарды четтетүү, ошондой эле Бирликтин ишканаларынын продукцияларын эл аралык рынокторго жылдыруу үчүн жагымдуу шарттарды түзүүгө багытталган техникалык жөнгө салуунун бирдиктүү тутумун өнүктүрүүнүн учурдагы абалын жана келечегин талкуулашты.

Талкуунун негизги темасы Бирликте стандартташтыруу чөйрөсүн өнүктүрүүнүн системалуу маселелери жана техникалык регламенттерди заманбап мамлекеттер аралык стандарттардын толук кандуу далилдүү базасы менен камсыздоо болду.

Бүгүнкү күндө стандартташтыруу чөйрөсүн өркүндөтүүгө ЕЭК жана Бирлик өлкөлөрү өзгөчө көңүл бурууда, өзгөчө ЕАЭБдин техникалык регламенттерине карата стандарттардын тизмегине киргизилген изилдөөлөрдүн (сыноолордун) айрым ведомстволук жана жеке методикаларына тоскоолдуксуз жетүүнү камсыздоо бөлүгүндө. Олуттуу сандагы документтер мурда Советтер Союзунун ыйгарым укуктуу органдары тарабынан кабыл алынган.

"2023-жылдын августуна карата абал боюнча ЕЭКтин талдоосунун жыйынтыктары боюнча, стандарттардын тизмегине киргизилген 473 методиканын ичинен 162 (34%) документке гана жеткилик камсыздалгандыгы, 214 (45%) документке жеткилик жок экендиги жана 97 (21%) документке карата биздин өлкөлөрдүн ыйгарым укуктуу органдары тарабынан маалымат берилбегендиги аныкталган. Бул Бирликтин техникалык регламенттеринин талаптарын аткарууну кыйла кыйындатат, - деп белгиледи Виктор Назаренко. - ЕЭК Бирлик өлкөлөрүнүн стандартташтыруу боюнча улуттук органдары менен биргеликте бул көйгөйдү чечүү боюнча чараларды көрүүдө. Бул ишке биздин өлкөлөрдүн СССРдин тийиштүү министрликтеринин укук мураскерлери болгон башка ведомстволорун да тартуу маанилүү".

Виктор Назаренко жана Антон Шалаев ЕЭК Кеңеши тарабынан жакында бекитилген ЕАЭБде стандартташтыруу боюнча иштерди координациялоо тартиби бирликтик техрегламенттерди колдонууну камсыз кылуу боюнча иштерди системалык пландаштырууга, прогрессивдүү эл аралык жана аймактык стандарттарды колдонууга өбөлгө түзөрүн белгилешти.

Техникалык жөнгө салуу чөйрөсүндө гана эмес, башка чөйрөлөрдө да заманбап стандарттарга болгон муктаждыктын өсүшү жакынкы келечекте стандартташтыруу чөйрөсүндө координацияланган саясатты жүргүзүүгө өтүүнү талап кылат.

Жолугушуунун катышуучулары ошондой эле өлчөмдөрдүн бирдиктүүлүгүн камсыздоо тармагын өнүктүрүү маселелерин талкуулашты. Жалпы энергетикалык рынокторду толук кандуу түзүү, медициналык буюмдардын жана дары-дармек каражаттарынын жалпы рынокторунун иштеши, социалдык чөйрөнү жана эркин соода чөйрөсүн өнүктүрүү, санитардык, ветеринардык-санитардык жана фитосанитардык чараларды колдонуу өлчөөлөрдүн ишенимдүү натыйжаларын пайдалануунун натыйжалуу механизмисиз мүмкүн эмес. Жогоруда аталган чөйрөлөрдүн өзгөчөлүктөрүн эске алуу менен өлчөмдөрдүн бирдиктүүлүгүн камсыздоо боюнча жоболорду ЕАЭБ жөнүндө келишимге өзүнчө тиркеме катары бөлүүгө болот, анда мүмкүнчүлүктөр гана эмес, Бирликтин алкагында пайдаланууга мүмкүн болгон ыйгарым укуктар жана инструменттер да жазылат.

Ошондой эле саламаттыкты сактоо чөйрөсүндө аткарылган өлчөөлөрдүн натыйжаларынын тактыгын жана ишенимдүүлүгүн камсыздоону контролдоо тутумун өркүндөтүү боюнча, ошондой эле Бирликтин алкагында өлчөө функциялары бар медициналык түзмөктөрдү өлчөө каражаттарына киргизүү тартибин иштеп чыгуунун максатка ылайыктуулугу жана Бирликтин колдонуудагы актыларына тиешелүү өзгөртүүлөр тууралуу маселелер козголду. Бул багытта метрологиялык институттардын жана Росстандарттын кызматтарынын тажрыйбасы абдан пайдалуу болуп саналат.

Жолугушуунун жүрүшүндө белгиленгендей, азыркы экономикалык шарттарда продукцияга шайкештик сертификаттарын жана декларацияларды берүүнү тартипке келтирүү жана Бирликтин техникалык регламенттеринин сакталышына натыйжалуу мамлекеттик контролду (көзөмөлдү) камсыздоо жолу менен рынокту кооптуу продукциядан коргоо маселелери өзгөчө мааниге ээ болууда. Атап айтканда, ЕЭК Россия Федерациясынын жана Беларусь Республикасынын ыйгарым укуктуу органдары менен биргеликте Бирликтин аянтчасында өзү жүрүүчү техниканын көптөгөн түрлөрү боюнча декларациялоодон сертификаттоого өтүү боюнча маселени кароо демилгесин көтөргөн. Буга кошумча жакынкы арада Россия Федерациясынын тракторлор жана айыл чарба машиналары боюнча сертификациядан өзү жүрүүчү машиналардын тибин жактырууга өтүү сунушу каралат. Бул сертификаттоо органдарынын уруксат документтерин берүү үчүн жоопкерчилигин кыйла жогорулатат.

Бирликтин мүчө мамлекеттеринин негизги өнөктөштөрү, биринчи кезекте Көзкарандысыз Мамлекеттер Шериктештигинин катышуучу-өлкөлөрү

менен соодада техникалык тоскоолдуктарды алып салуу маселелери да талкуунун предмети болду. КМШ өлкөлөрү менен иштөөдө бирдиктүү мамлекеттер аралык стандарттарды (МАМСТ) колдонуу өзгөчө мааниге ээ болот. Росстандарттын жетекчисинин маалыматы боюнча, алыскы чет өлкөлөрдөн көптөгөн соода өнөктөштөр Россия Федерациясынын стандартташтыруу тутумун дыкат изилдеп жатышат жана өздөрүндө КМШнын мамлекеттер аралык стандарттарын - МАМСТ жана Россиянын улуттук стандарттарын - МАМСТ Р - түздөн-түз колдонуу маселесин талкуулоого даяр.

Жолугушуунун катышуучулары техникалык жөнгө салуу чөйрөсүндөгү ыйгарым укуктуу органдардын жана ЕЭКтин "ЕАЭБ алкагында санариптик техникалык жөнгө салуу" долбоорун ишке ашыруу боюнча биргелешкен аракеттери жөнүндө макулдашышты. Ошону менен бирге үстүбүздөгү жылдын сентябрында Россия стандартташтыруу институтунун аянтчасында Россия Федерациясында жана ЕАЭБде стандартташтырууну санариптештирүү концепциясын жана техникалык регламенттерди кароо менен илимий-техникалык кеңештин кеңейтилген отуруму уюштурулат.