тексттин өлчөмү: A A A

Сайттын түстөр: C C C

Сайттың әдеттегі болжамы

Жаңалықтар

Күндерді таңдаңыз

Бағытты таңдаңыз

Іздеу нәтижелері: 6456

12 наурыздың 2025 ЕЭК-те ауыл шаруашылығын орнықты дамыту перспективалары талқыланды 12 наурызда Еуразиялық экономикалық комиссияның алаңында ЕЭК Агроөнеркәсіптік саясат департаментінің директоры Наира Карапетянның төрағалық етуімен "Жасыл көкжиектер: Еуразиялық экономикалық одаққа мүше мемлекеттердің ауыл шаруашылығының орнықты дамуы" тақырыбында дөңгелек үстел отырысы болып өтті. Іс-шараға қатысушылар ЕАЭО елдерінің ауыл шаруашылығында көміртегі салығын енгізудің салдарын талдау және модельдеу тәсілдемелерін, көміртегі ізін төмендетудегі жасыл ауыл шаруашылығының рөлін, органик-өндірушілердің еларалық кооперациясының перспективаларын, тыңайтқыштарды қолдану кезінде парниктік газдар эмиссиясын реттеуді және басқа да бірқатар мәселені талқылады. Наира Карапетян өз сөзінде атап өткендей, қазіргі заманғы әлемде АӨК-тің орнықты дамуы өзекті бола түсуде, өйткені ауыл шаруашылығы табиғи ресурстарды пайдаланумен тікелей байланысты және қоршаған ортаға айтарлықтай әсер етеді. "ЕАЭО-дағы салдарды жеңілдету үшін келісілген іс-қимыл мен саланы ағымдағы шын-жәйтке бейімдеу негізінде ауыл шаруашылығы және азық-түлік жүйесінде өзгерістер қажет", — деп атап көрсетті ЕЭК Агроөнеркәсіптік саясат департаментінің директоры. Дөңгелек үстелге Беларусь Республикасы Табиғи ресурстар және қоршаған ортаны қорғау министрлігінің, Өзбекстан Республикасы Ауыл шаруашылығы министрлігінің, Ресей сапа жүйесінің, Біріккен Ұлттар Ұйымының Азық-түлік және ауыл шаруашылығы ұйымының, РФ Президенті жанындағы РХШжМҚА Қолданбалы экономикалық зерттеулер институтының, салалық бизнестің өкілдері қатысты.

11 наурыздың 2025 ЕАЭО-да е-CMR электрондық халықаралық көлік жүкқұжаттарын қолдану жөніндегі "пилотты" іске асыру үшін жұмыс тобы құрылды Еуразиялық экономикалық комиссия Алқасы 11 наурызда Еуразиялық экономикалық одақ елдерінде халықаралық жүк автомобиль тасымалдарын жүзеге асыру кезінде е-CMR электрондық халықаралық көлік жүкқұжаттарын қолдану жөніндегі пилоттық жобаны іске асыру үшін жұмыс тобын құру туралы шешім қабылдады. Жұмыс тобының құрамына ЕАЭО елдерінің көлік, цифрландыру, салықтық және кедендік реттеу саласындағы уәкілетті органдарының, сондай-ақ бизнес-қоғамдастықтың, ғылыми ұйымдар мен салалық бірлестіктердің өкілдері кіреді. Сарапшы алаңның жетекшісі болып ЕЭК Энергетика және инфрақұрылым жөніндегі министрі Арзыбек Қожошев айқындалды. "Бүгін біз автомобиль көлігі саласында заңи маңызы бар электрондық құжат айналымына көшуге қарай тағы бір қадам жасадық. Жұмыс тобы ЕАЭО-да электрондық халықаралық көлік жүкқұжаттарын қолдану бойынша пилоттық жобаны жүргізу мерзімі мен тәртібін айқындайды, сондай-ақ оны іске асырудың практикалық мәселелерін атқарысады", — деп атап өтті ЕЭК министрі. Жобаның негізгі мақсаты — цифрлық қолтаңба мен "сенімді үшінші тарап" механизмдерін пайдалана отырып, әртүрлі мемлекеттің субъектілері арасында электрондық құжаттармен трансшекаралық алмасу технологиясын тәжірибелік атқарысуды қамтамасыз ету. Пилоттық жоба көлік құжаттарын алу және тексеру процестерін жеделдетуге, сондай-ақ көлік-логистика және бақылау-қадағалау рәсімдерін жүзеге асыру кезінде шығындарды азайтуға ықпал ететін болады. Жұмыс тобының отырысын 2025 жылғы II тоқсанда өткізу жоспарлануда.

11 наурыздың 2025 Арзыбек Кожошев ЕАЭО-ның 10 жыл бойы жұмыс істеп тұрғандығы жайында айтты ЕЭК Энергетика және инфрақұрылым жөніндегі министрі Арзыбек Кожошев Еуразиялық экономикалық одақтың жұмыс істеп тұруының 10 жылдығына арналған халықаралық пікірсайысқа қатысушылар алдында бейнеүндеу форматында сөз сөйледі. Қатысушылар талқылауының негізгі нысанасы қол жеткен табыстар мен Одақ тап болған сыни шақырыстар жайына шоғырланды. "Бірқатар фактор мен бұлардың теріс салдары Одақ үшін сыртқы сыни шақырыстарға айналды. Мұны ЖІӨ-нің көрсетілген кезеңде шамамен 50% өсуі — 1,6 трлн АҚШ долларынан 2,4 трлн АҚШ долларына дейін артуы айғақтайды. Бұл ретте өзара сауда екі есе артып, шамамен 90 млрд АҚШ долларын құрады, ал оның ЕАЭО сыртқы саудасының жалпы көлеміндегі үлесі 18,2%-ға дейін өсті", — деп атап өтті Арзыбек Кожошев. Министр ЕАЭО азаматтары үшін білім беру, медициналық көмек, зейнетақы тағайындау мен төлеу саласындағы неғұрлым қолайлы жағдайлар туралы хабарлады. Одақ құқығында тауарлардың еркін қозғалысын және мемлекеттік сатыпалымға тең қол жеткізуді көздейтін бизнес-қоғамдастықтың артықшылықтары баса көрсетілген. Сондай-ақ, ЕЭК министрі бүгінгі таңда мұнай, газ және электр энергиясының ортақ нарығы мәселелері ілгерілеп келе жатқанын, бұл энергия ресурстарының қолжетімділігі мен ЕАЭО елдерінің дамуын қамтамасыз ететінін атап көрсетті. "Солтүстік — Оңтүстік" көлік дәлізі және "Бір белдеу, бір жол" жобасы бойынша Қытаймен ынтымақтастық сияқты жаңа көлік дәліздерінің жеткізілімдерін әртараптандыру және әлеуетін арттыру міндеттері шешілу үстінде.

10 наурыздың 2025 Бақытжан Сағынтаев Александр Турчинді Беларусь Республикасының Премьер-министрі болып тағайындалуымен құттықтады Еуразиялық экономикалық комиссия Алқасының Төрағасы Бақытжан Сағынтаев Александр Турчинді Беларусь Республикасының Премьер-министрі қызметіне тағайындалуымен құттықтады. "Сіздің Үкімет басындағы қызметіңіз Беларусь пен Еуразиялық экономикалық интеграцияның одан әрі дамуына ықпал ететініне сенімдімін", — делінген құттықтау хатта. Бақытжан Сағынтаев ЕЭК атынан және жеке өз атынан Александр Турчинге мықты денсаулық тілеп, Беларусь Республикасы мен оның азаматтарының игілігіне арналған барлық белгілеген жоспарларын іске асыруына тілектестігін білдірді.

10 наурыздың 2025 Сербия ЕЭК-тің өтінішіне жауап ретінде Одақ елдерінен әкелінетін күнбағыс майы мен құрамында майы бар өнімдерді шектеудің күшін жойды Сербия Еуразиялық экономикалық комиссияға Еуразиялық экономикалық одақ елдерінен әкелінетін күнбағыс майы мен құрамында майы бар өнімдерді сандық шектеуді алып тастау туралы хабарлама білдірді. Сербия Республикасы Үкіметінің министрі, ЕАЭО-мен қарым-қатынастарды дамытуға жауапты Ненад Попович ЕЭК-тің өтінішіне жауап ретінде шектеулердің күшін жоюға бастамашылық жасады. "Бұл мәселені Комиссия өткен жылдың сәуір айынан бастап Одақ пен Сербия арасындағы Еркін сауда туралы келісімді жүзеге асыру шеңберінде пысықтап келді. Атап айтқанда, тақырып менің қыркүйек айында Ненад Поповичпен кездесуім барысында қозғалды", — деп атап өтті ЕЭК Сауда жөніндегі министрі Андрей Слепнев. Ол шектеулердің күшінің жойылуы сындарлы өзара іс-қимылды бейнелейді және тараптардың сауда-экономикалық ынтымақтастығының оң дамуын атап көрсетеді деп сөзін толықтырды. 2024 жылғы наурызда шектеу шаралары енгізілгеннен кейін күнбағыс майы мен маргариннің (СЭҚ ТН 1512 19 900 2, 1512 19 900 9, 1517 10 100 0, 1517 10 900 0) ЕАЭО-дан Сербияға экспорты 2024 жылдың 10 айында 2023 жылдың ұқсас кезеңімен салыстырғанда 40% қысқарды. Бұл ретте 2023 жылы осы көрсеткіш 2022 жылмен салыстырғанда шамамен бес есе өскен еді.

10 наурыздың 2025 Константин Бегиджанов ЕЭК-тің Сауда саясаты департаменті директорының орынбасары болып тағайындалды Константин Григорьевич Бегиджанов 1988 жылы 30 қыркүйекте Ереванда туған. 2009 жылы Ресей-Армян (Славян) мемлекеттік университетін "экономика" мамандығы бойынша бітірген. 2009-2011 жылдары әскери қызметті өткерді. 2018 жылы Армения ұлттық политехникалық университетінің магистратурасын "экономика" мамандығы бойынша бітірді. 2024 жылы Ресей Федерациясы Президенті жанындағы Ресей халық шаруашылығы және мемлекеттік қызмет академиясында "Өзгерістерді басқару және бизнесті дамыту" бағдарламасы бойынша оқудан өтіп, "Іскерлік әкімшілендіру шебері (MBA)" біліктілік дәрежесіне ие болды. 2008-2020 жылдары Армения мен Ресейдің коммерциялық кәсіпорындарында әртүрлі лауазымда жұмыс істеді. Атап айтқанда, 2011 жылдан 2017 жылға дейін Армениядағы ресейлік "Прогресстех" ЖШҚ-ның еншілес кәсіпорнын — Ресейдің біріккен авиажасау корпорациясының жобаларына қатыса отырып, авиациялық және автомобиль техникасының беріктігін талдауға және конструкторлық оңтайландыруға мамандандырылған инжиниринг орталығын басқарды. 2017 жылдан 2020 жылға дейін мобильді құрылғылардан оқылатын динамикалық деректерді өңдеуге және талдауға мамандандырылған "Миннова.АМ" технологиялық компаниясының тең құрылтайшысы және бас директоры болды. 2020 жылғы наурыздан 2021 жылғы наурызға дейін Еуразиялық экономикалық комиссияның Өнеркәсіп және агроөнеркәсіптік кешен жөніндегі Алқа мүшесінің (министрдің) көмекшісі болып жұмыс істеді. 2021 жылғы наурыздан 2025 жылғы наурызға дейін ЕЭК-тің Монополияға қарсы реттеу департаменті директорының орынбасары қызметін атқарды. Комиссияның құрмет грамотасымен және "Интеграцияны дамытуға қосқан жеке үлесі үшін" төсбелгісімен марапатталған. 2025 жылғы 10 наурыздан бастап Еуразиялық экономикалық комиссияның Сауда саясаты департаменті директорының орынбасары болып тағайындалды.

10 наурыздың 2025 Владимир Серпиков ЭСКАТО сессиясының қатысушыларына ЕАЭО-климаттық күн тәртібінің ерекшеліктері туралы айтты Еуразиялық экономикалық комиссияның Сауда саясаты департаментінің директоры Владимир Серпиков ЭСКАТО шеңберінде Солтүстік және Орталық Азияда орнықты даму үшін сауданың трансформациялық әлеуетін пайдалану және сауда рәсімдерін оңайлату жөніндегі сарапшылар тобының кеңесіне қатысты. "Климаттық оңтайландырылған сауда және сауда рәсімдерін оңайлату" сессиясында ол Еуразиялық экономикалық одақта климаттық күн тәртібін қалыптастырудың қағидаттары мен тәсілдемелері, сондай-ақ төмен көміртекті дамуды ынталандырудың қолданыстағы құралдары туралы хабардар етті. Іс-шараға қатысушылар ЕАЭО нарығына және үшінші елдермен саудаға байланысты климаттық шаралардың әлеуетті әсерін талқылады. Жасыл жобалар критерийлері (модельдік таксономиялар) туралы пікір алмасуға бөлекше назар аударылды. "Көміртек нарығын дамытудың жалпы тәсілдемелерін қалыптастыру ЕАЭО-ның экспортқа бағдарланған өндірістерін қорғау мақсатына ғана емес, сондай-ақ салыстырмалы түрде төмен көміртектің ізі бар немесе оны төмендетудің елеулі әлеуеті бар салаларда бәсекелестік артықшылықтарды дамыту мақсатына да қызмет ете алады", – деп атап өтті Владимир Серпиков.

10 наурыздың 2025 ЕЭК-те дәрілік заттарды декларациялау талқыланды Еуразиялық экономикалық комиссияның бейінді Консультативтік комитеті жанындағы кедендік декларациялау жөніндегі жұмыс тобының отырысында Еуразиялық экономикалық одақтың кедендік аумағына әкелінетін фармацевтикалық субстанцияларды, интермедиаттарды, реагенттерді және дәрі өндіруге арналған материалдарды декларациялау мәселесі қаралды. Отырыс ЕЭК штаб-пәтерінде ЕЭК Кеден заңнамасы және құқық қолдану практикасы департаменті директорының орынбасары Григор Оганянның төрағалық етуімен болып өтті. Атап айтқанда, мұндай тауарлар үшін олардың қозғалысын автоматтандыру және бақылау мақсатында оны өңдеуді және кейіннен пайдалануды оңтайландыру үшін кодталған ақпаратты ерікті негізде көрсету ұсынылды. Кедендік декларациялау жөніндегі жұмыс тобы 2022 жылы Кедендік реттеу жөніндегі консультативтік комитеттің шешімі бойынша құрылды. Оның қызмет саласына тауарларды декларациялау мәселелері, соның ішінде кедендік декларация берілгенге дейін шығару туралы өтінішті толтыру нысаны мен тәртібі кіреді.

Тағы да көрсету