Жаңалықтар

28 шілденің 2025 Георгий Арзуманян ЕАЭО-да өнеркәсіптік кооперациялық жобаларды қаржылай қолдау механизмін таныстырды Еуразиялық экономикалық комиссияның өнеркәсіптік саясат департаменті директорының орынбасары Георгий Арзуманян Мәскеу Өнеркәсіпшілерінің және кәсіпкерлерінің (жұмыс берушілердің) конфедерациясы ұйымдастырған дөңгелек үстелде ЕАЭО-дағы өнеркәсіптік кооперациялық жобаларды қаржылай қолдау механизмін таныстырды. «Бизнес өкілдері мен іскерлік бірлестіктерге ЕАЭО-ға мүше мемлекеттер аумағындағы өндірістерді технологиялық жаңғыртуды кеңейтуге арналған қаржылай қолдау мүмкіндіктері туралы нысаналы түрде хабарлау – маңызды міндет», – деп атап өтті Георгий Арзуманян. Дөңгелек үстелде өнеркәсіп саласындағы жобаларды қаржыландыру талаптары туралы «ДОМ.РФ Банкі» АҚ және «МСП Банкі» АҚ өкілдері айтып берді, ал шағын және орта бизнесті қолдау шаралары туралы «МСП Корпорациясы» АҚ өкілі, экспорттаушы өндірушілерге арналған қолдау шаралары туралы Ресей экспорт орталығының компаниялар тобы мен «Мәскеу экспорт орталығы» АКҰ өкілдері баяндап берді.

26 шілденің 2025 Бақытжан Сағынтаев Мигель Диас-Канель Бермудесті Ұлттық көтеріліс күнімен құттықтады Еуразиялық экономикалық комиссия Алқасының Төрағасы Бақытжан Сағынтаев Еуразиялық экономикалық одақ жанындағы бақылаушы мемлекет – Куба Республикасының Президенті Мигель Диас-Канель Бермудесті және бүкіл куба халқын Ұлттық көтеріліс күнімен құттықтады. «Бірлескен күш-жігердің арқасында дәстүрлі достық пен сенім рухында дамып келе жатқан ЕАЭО мен Куба елдерінің ынтымақтастығы халқымыздың мүддесі үшін тұрақты түрде нығайып келеді», – делінген Бақытжан Сағынтаевтың құттықтау хатында. ЕЭК Алқасының Төрағасы Бақытжан Сағынтаев Комиссия атынан және жеке өз атынан Куба Республикасына тұрақты экономикалық даму, ал оның халқына амандық пен бақ-береке тіледі.  

25 шілденің 2025 ЕАЭО мен оның мүше мемлекеттеріне қатысты үшінші тараптардың шектеу шараларының тізілімі өзектендірілді Еуразиялық экономикалық комиссия жүргізген тұрақты мониторинг қорытындылары бойынша «Сауда» порталының бетінде Еуразиялық экономикалық одаққа және оның мүше мемлекеттеріне қатысты үшінші тараптардың шектеу шараларының жаңартылған тізілімі жарияланды. Қазіргі уақытта ЕАЭО-ның негізгі сауда әріптестері мен сауда-экономикалық келісімдер жасасу бойынша келіссөздер жүргізілген немесе жүргізіліп жатқан елдер тарапынан сыртқы саудада тосқауыл бола алатын 271 шектеу шарасы анықталды. Бұл ретте үшінші елдерден кондитер өнімдерін импорттауға тыйым салуды енгізген Иранның шектеу шарасы 2025 жылғы 15 мамырда ЕАЭО мен Иран Ислам Республикасы арасындағы еркін сауда туралы толықформатты Келісім күшіне енгеннен кейін жойылды. Келісімнің ережелеріне сәйкес тараптар тауарларды әкелуге, оның ішінде квоталар, импорттық немесе экспорттық лицензиялар және басқа да шаралар нысанында тыйым салуларды немесе шектеулерді белгілемеуге және сақтамауға міндеттеме алды. Сербияға қатысты тіркеу үшін ЕО GMP сертификатын ұсыну туралы талаптың болуына байланысты ЕАЭО дәрілік заттардың қолжетімділігіне қатысты техникалық кедергі анықталды. Өзбекстанның шектеу шараларының тізбесі тұрмыстық техниканы әкелуге арналған өзбек сәйкестік сертификатын алу рәсімінің ашық еместігі және ұзаққа созылуымен толықтырылды. ЕЭК-тің үшінші тараптармен саудадағы шектеу шараларына мониторинг жүргізу және жою жөніндегі қызметі ЕАЭО туралы шарттың ережелеріне сәйкес жүзеге асырылады, оны іске асыру үшін Комиссия Кеңесінің шешімімен 2018 жылы Еуразиялық экономикалық одаққа мүше мемлекеттер мен Еуразиялық экономикалық комиссия арасындағы өзара іс-қимыл тәртібі бекітілген. Мониторинг жүргізу ЕАЭО мен оның мүше мемлекеттеріне қатысты үшінші тараптардың шектеу шараларын жою үшін жолдарды анықтау және іздеу мәселелері бойынша жүйелі жұмысты жүзеге асыруға бағытталған.  

24 шілденің 2025 Бақытжан Сағынтаев Амур облысында жолаушылар ұшағының апатқа ұшырауына байланысты көңіл айтты ЕЭК Алқасының төрағасы Бақытжан Сағынтаев Амур облысындағы ұшақ апатынан адамдардың қаза болуына байланысты Еуразиялық экономикалық комиссияның атынан және өз атынан Ресей Федерациясының Президенті Владимир Путинге және бүкіл Ресей халқына көңіл айтты. «Көптеген адамның өмірін қиған қайғылы оқиға туралы хабарды қатты күйзеліспен қабылдадым. Қайғыларына ортақтаса отырып, қаза тапқандардың отбасыларына шын жүректен көңіл айтамын», – делінген жеделхатта.

24 шілденің 2025 Бақытжан Сағынтаев Шавкат Мирзиеёвті туған күнімен құттықтады Еуразиялық экономикалық комиссия Алқасының төрағасы Бақытжан Сағынтаев Өзбекстан Республикасының Президенті, Еуразиялық экономикалық Одақ жанындағы бақылаушы мемлекет басшысы Шавкат Мирзиеёвті туған күнімен құттықтады. «Сіздің басшылығыңызбен Өзбекстан экономикалық әлеуетті арттыру, азаматтардың әл- ауқатын жақсарту бағытындағы саясатты дәйекті түрде жүзеге асырып, еуразиялық интеграциялық процестерге белсенді қатысып келеді», – делінген құттықтау хатта. Бақытжан Сағынтаев ЕЭК атынан және өз атынан Шавкат Мирзиёевке зор денсаулық, амандық және Өзбекстан Республикасының игілігі жолындағы жауапты қызметінде табыс тіледі.

24 шілденің 2025 ЕЭК Интеграцияны дамыту департаменті директорының орынбасары болып Диас Тоқан тағайындалды Диас Ерболұлы Тоқан 1994 жылы Алматы қаласында (Қазақстан Республикасы) дүниеге келген. 2016 жылы «Нархоз» университетін «менеджмент» мамандығы бойынша, 2018 жылы «Мирас» университетін «Құқықтану» мамандығы бойынша бітірген. 2018-2022 жылдары Қазақстан Республикасы Ұлттық экономика министрлігінде және Сауда және интеграция министрлігінде экономикалық интеграция мәселелеріне маманданған сарапшы және бас сарапшы болып жұмыс істеді. 2022 жылдан 2025 жылға дейін Қазақстан Республикасы Сауда және интеграция министрлігінің Экономикалық интеграция департаментінің кәсіпкерлік саласындағы ынтымақтастықты дамыту басқармасының басшысы қызметін атқарды. Мемлекеттік қызмет атқарған жылдары халықаралық және ведомстволық наградалармен марапатталған.

24 шілденің 2025 ЕЭК Орталық Азия Халықаралық экономикалық форумында өнеркәсіптік ынтымақтастық мүмкіндіктерін таныстырды Еуразиялық экономикалық комиссияның Өнеркәсіп саясаты департаментінің директоры Николай Кушнарев 22 шілде күні Душанбе қаласында өткен Орталық Азия халықаралық экономикалық форумының «Еуразиялық ынтымақтастықты дамытудағы халықаралық ұйымдардың рөлі. Орталық Азия – өзара іс-қимылдың жаңа форматтары үшін маңызды өңір» атты панельдік сессиясында сөз сөйледі. Николай Кушнарев өз сөзінде Еуразиялық экономикалық одақ шеңберіндегі интеграциялық процестерді дамытудың негізгі аспектілері мен ықтимал перспективаларын және олардағы Орталық Азия мемлекеттерінің рөлін атап өтті. ЕЭК департаментінің басшысы ЕАЭО және Орталық Азия елдері экономикаларының тұрақты ұзақ мерзімді дамуын қамтамасыз ету үшін жаңа технологиялық форматтарға көшу үшін негіз болатын инновациялық шешімдерді әзірлеу және енгізу арқылы микроэлектроника, машина жасау және робототехника сияқты қазіргі заманғы негізгі салалардағы технологиялық серпіліске бірлескен күш-жігерді шоғырландыру қажеттігіне назар аударды. «Орталық Азия елдерінің айтарлықтай ресурстық әлеуеті бар және өнеркәсіптік қуаттардың қарқынды өсуімен сипатталады. Бұл жерде ЕАЭО аумағында бірлескен жоғары технологиялық өндірістерді құруға қатысу үшін, сондай-ақ еуразиялық инвестициялар мен жаңа технологиялық әріптестік үшін жақсы мүмкіндік қалыптасып отыр», – деп атап өтті Николай Кушнарев.

22 шілденің 2025 БҰҰ-да ЕЭК-тің еуразиялық интеграцияның тұрақты даму мақсаттарына қол жеткізуге әсері туралы баяндамасы ұсынылды ЕЭК-тің Еуразиялық экономикалық одақ елдерінде еуразиялық экономикалық интеграцияның тұрақты даму мақсаттарына (ТДМ) қол жеткізуге әсері туралы екінші баяндамасының негізгі қорытындылары БҰҰ-ның Нью-Йорктегі штаб-пәтерінде ұсынылған. ЕЭК энергетика және инфрақұрылым министрі Арзыбек Қожошев Біріккен Ұлттар Ұйымының Тұрақты даму жөніндегі жоғары деңгейдегі саяси форумының (ТДСФ) екі негізгі алаңында баяндама жасады. ТДСФ жалпы пікірталас барысында сөз сөйлеген Арзыбек Қожошев ЕАЭО-ның қарқынды дамып келе жатқан интеграциялық бірлестік ретіндегі рөлін атап өтті. Бұл ретте, еуразиялық экономикалық интеграцияны тереңдету еуразиялық «бестік» елдерінің ТДМ-ға қол жеткізуіне ықпал ететін қосымша фактор ретінде қызмет етеді. «ЕАЭО-ның 185 миллионнан астам тұтынушысын біріктіретін бірыңғай нарықпен табысты қызметі және келісілген экономикалық саясаттарды дәйекті іске асыруы экономикалық өсудің катализаторына айналды. 2024 жылдың қорытындысы бойынша ЕАЭО елдерінің жиынтық ЖІӨ 4%-ға өсті және екінші жыл қатарынан әлемдік деңгейден жоғары болды», – деп атап өтті Арзыбек Қожошев. Арзыбек Қожошев тұрақты дамудың өңірлік өлшемі тақырыбын «ТДМ-ды іске асырудың өңірлік перспективалары» сессиясында жалғастырды. Ол ЕАЭО-ның тәжірибесін жаһандық мақсаттарға қол жеткізу жөніндегі ұлттық стратегияларды толықтыратын өңірлік деңгейдегі ынтымақтастықтың маңыздылығын айқын дәлел ретінде ұсынды.  ЕЭК министрі Комиссияның прогреске мониторинг жүргізу әдістемесі туралы «ТДМ-ға қол жеткізудің өңірлік көрсеткіштері тізімінде» айтып берді. Сонымен қатар ол Одақты дамытудың ұзақ мерзімді стратегияларын іске асыру ТДМ кең спектріне қол жеткізуге бағытталатынын атап өтті. Сондай-ақ ЕАЭО аясында экономикалық процестерді 2030 жылға дейін және 2045 жылға дейінгі кезеңге одан әрі дамыту туралы «Еуразиялық экономикалық жол» декларациясы екенін еске салды.  Арзыбек Қожошев Комиссияның ТДМ-ға қол жеткізуге ықпалын талдауды жалғастыру және оның нәтижелерімен халықаралық қоғамдастықпен бөлісу жоспарлары туралы хабарлады, осылайша 2030-Күн тәртібін іске асыруға бағытталған жаһандық күш-жігерге өз үлесін қоспақ. Біріккен Ұлттар Ұйымының Экономикалық және Әлеуметтік Кеңесінің (ЭКОСОС) қамқорлығымен жұмыс істейтін ТДСФ ТДМ-ға қол жеткізу барысына шолу жүргізуге арналған БҰҰ-ның негізгі алаңы болып табылады. «ТДМ-ға қол жеткізудің өңірлік көрсеткіштер тізімі» — интеграциялық процестер мен ТДМ-ға қол жеткізу динамикасының өзара байланысын терең талдауға мүмкіндік беретін 130 көрсеткіштен (олардың 67-сі еуразиялық интеграцияның басымдықтарына тән ерекшеліктер) тұратын кешенді құрал.

Жаңалықтар

Іздеу нәтижелері: 6762