арм

Նորություններ

ԵՏՀ ԶԼՄ-ներում Ֆոտոսրահ Տեսադարան
23 օգոստոսի 2024 ԵՏՀ և Ղազախստանի բիզնեսի հանդիպում. ուշադրության կենտրոնում ձեռնարկատիրություն վարելու պայմանների բարելավումն է Օգոստոսի 23-ին Ալմաթիում Եվրասիական տնտեսական հանձնաժողովի ձեռնարկատիրական գործունեության զարգացման վարչության տնօրեն Երնար Բակենովը մասնակցել է գործարար համայնքի հետ հանդիպմանը, որը տեղի է ունեցել Ղազախստանի Հանրապետության «Ատամեկեն» ձեռնարկատերերի ազգային պալատի տարածքային գրասենյակի հարթակում: Երնար Բակենովն իր ելույթում գործարար շրջանակների ներկայացուցիչներին պատմել է Եվրասիական տնտեսական միության շրջանակներում բիզնես վարելու պայմանների վրա կարգավորման ազդեցության գնահատմանը նրանց մասնակցության հնարավորությունների մասին, ներառյալ ԵՏՀ ընդունած որոշումների փաստացի ազդեցության գնահատման և միջազգային պայմանագրերի նախագծերի կարգավորող ազդեցության գնահատման «նոր»՝ ընթացիկ տարում ներդրված ընթացակարգերը: «2023 թվականին ԿԱԳ ընթացակարգի ընթացքում բիզնեսից Հանձնաժողովի ակտերի նախագծերի վերաբերյալ 747 առաջարկ է ստացվել։ Դրանցից կեսից ավելին հաշվի է առնվել նախագծերը լրամշակման ժամանակ, իսկ ԿԱԳ դրական եզրակացությունների բաժինը հասել է 98% ցուցանիշի: Այս թվերի հետևում, մի կողմից, ԵՏՀ որոշումների կայացման գործում բիզնեսի բարձր աստիճանի ներգրավվածությունն է, մյուս կողմից՝ Հանձնաժողովի կողմից կարգավորիչ «ճկունությունն» ու բացությունը», — նշել է բանախոսը։ Բացի այդ, Հանձնաժողովի ներկայացուցիչը խոսել է Միության ներքին շուկայի գործունեության արդյունավետությունն ապահովելու համար ձեռնարկվող միջոցների, ինչպես նաև ձեռնարկատիրության զարգացման վրա եվրասիական տնտեսական ինտեգրման գործընթացների դրական ազդեցությունը հաստատող ցուցանիշների արժեքների դրական դինամիկայի մասին: Երնար Բակենովը տեղեկատվություն է ներկայացրել Ղազախստանի գործարար շրջանակների ներկայացուցիչների կողմից ավելի վաղ բարձրացված կոնկրետ հարցերի լուծման արդյունքների, ինչպես նաև արդիական հարցերի այն մասի կարգավորման ուղղությամբ ձեռք բերված առաջընթացի մասին, որոնք շարունակում են մշակվել։ ԵՏՀ ներկայացուցիչները նաև պատասխանել են ղազախստանցի ձեռնարկատերերի հարցերին և ստանձնել աշխատանքը նրանց բարձրաձայնած խնդիրների շուրջ:
03 հուլիսի 2024 ԵՏՀ ձեռնարկատիրական գործունեության զարգացման վարչության տնօրեն է նշանակվել Երնար Բակենովը Երնար Բակենովը ծնվել է 1974 թվականին Կարագանդա քաղաքում (Ղազախստան): Ավարտել է Կարագանդայի պետական համալսարանը (մասնագիտությունը՝ տնտեսագետ)։ Իր աշխատանքային գործունեությունն սկսել է 1996 թվականին Կարագանդայի Լենինսկի շրջանի Ժողովրդական բանկի մասնաճյուղում։ 1997–2007 թվականներին աշխատել է Ղազախստանի Հանրապետության մաքսային մարմիններում՝ Կոստանայում Կարագանդայում, զբաղեցրել Ղազախստանի Հանրապետության Մաքսային կոմիտեի մաքսային ձևակերպման բաժնի պետի պաշտոնը։ 2008–2012 թվականներին՝ «Առևտրային քաղաքականության մշակման կենտրոն» ՓԲԸ-ի գլխավոր փորձագետ, վարչության փոխտնօրեն, վարչության տնօրեն: 2012 թվականի հունիսից մինչև 2017 թվականի ապրիլը զբաղեցրել է Ղազախստանի Հանրապետության ազգային էկոնոմիկայի նախարարության միջազգային տնտեսական ինտեգրման վարչության տնօրենի պաշտոնը։ 2017 թվականի ապրիլից սեպտեմբեր՝ Ղազախստանի Հանրապետության ազգային էկոնոմիկայի փոխնախարար։ 2018 թվականի հունիսից մինչև 2023 թվականի հունվար՝ Եվրասիական տնտեսական հանձնաժողովի մրցակցության և հակամենաշնորհային կարգավորման հարցերով կոլեգիայի անդամի օգնական։ 2023 թվականի փետրվարից մինչև 2024 թվականի ապրիլը՝ Եվրասիական տնտեսական հանձնաժողովի ձեռնարկատիրական գործունեության զարգացման վարչության տնօրեն։ 2024 թվականի հուլիսի 1-ից վերանշանակվել է ԵՏՀ ձեռնարկատիրական գործունեության զարգացման վարչության տնօրենի պաշտոնում։
03 հուլիսի 2024 ԵՏՀ-ն ընդլայնում է համագործակցությունը ՄԱԿ-ի Միջազգային առևտրային իրավունքի հանձնաժողովի հետ Եվրասիական տնտեսական հանձնաժողովի էկոնոմիկայի և ֆինանսական քաղաքականության նախարար Բախիթ Սուլթանովը մասնակցել է ՄԱԿ-ի Միջազգային առևտրային իրավունքի հանձնաժողովի (ՅՈՒՆՍԻՏՐԱԼ) նստաշրջանին, որն անցկացվում է հունիսի 24-ից հուլիսի 12-ի Միավորված ազգերի կազմակերպության Նյու Յորքի կենտրոնակայանում։ Նստաշրջանի մասնակիցները քննարկել են միջազգային ներդրումային վեճերի կարգավորման խորհրդատվական կենտրոնի կանոնադրության նախագծերը, ինչպես նաև միջազգային ներդրումային վեճերի հետևանքների մեղմացման կանխարգելման գործիքակազմը։ Այցի ընթացքում ԵՏՀ նախարարը հանդիպել է ՅՈՒՆՍԻՏՐԱԼ-ի քարտուղար Աննա Ժուբան-Բրեի և ՅՈՒՆՍԻՏՐԱԼ-ի «Ներդրողների և պետության միջև վեճերի կարգավորման բարեփոխում» 3-րդ աշխատանքային խմբի քարտուղար Ջե Սոն Լիի հետ։ Քննարկվել են ներդրողների և պետությունների միջև վեճերի կարգավորման համակարգի բարեփոխման հարցեր, ինչպես նաև միջազգային ներդրումային վեճերի կարգավորման խորհրդատվական կենտրոնի հիմնադրումը: «Մենք դիտարկում ենք խորհրդատվական կենտրոնի ստեղծման դեպքում և ԵԱՏՄ և ՅՈՒՆՍԻՏՐԱԼ բոլոր պետությունների շահագրգռվածության պարագայում կենտրոնի աշխատանքին որպես տարածաշրջանային տնտեսական ինտեգրման կազմակերպություն միանալու հնարավորությունը», — նշել է Բախիթ Սուլթանովը։ Բացի այդ, ԵՏՀ նախարարը և ՅՈՒՆՍԻՏՐԱԼ քարտուղարը պայմանավորվել են պաշտոնականացնել ձևավորված և դինամիկ զարգացող հարաբերությունները երկու կազմակերպությունների միջև փոխըմբռնման հուշագրի տեսքով։ Հանդիպման ավարտին Բախիթ Սուլթանովը և Աննա Ժուբան-Բրեն հաստատել են ԵՏՀ և ՅՈՒՆՍԻՏՐԱԼ համագործակցության հետագա ընդլայնման պատրաստակամությունը: Կողմերը պայմանավորվածություն են ձեռք բերել կանոնավոր խորհրդակցություններ անցկացնելու մասին հետաքրքրություն ներկայացնող հարցերի, այդ թվում՝ ՅՈՒՆՍԻՏՐԱԼ աշխատանքային խմբերի և ԵՏՀ խորհրդատվական մարմինների օրակարգում առկա հարցերի քննարկման համար:  ՄԱԿ-ի Միջազգային առևտրային իրավունքի հանձնաժողովը (ՅՈՒՆՍԻՏՐԱԼ) ՄԱԿ-ի համակարգի միջազգային առևտրային իրավունքի ոլորտի հիմնական մարմինն է: ՅՈՒՆՍԻՏՐԱԼ-ը մի շարք այնպիսի ոլորտների օրենսդրական գործիքներ է նախապատրաստում, ինչպիսիք են միջազգային պայմանագրային պրակտիկան, ապրանքաուղեկից փաստաթղթերը, անվճարունակությունը, էլեկտրոնային առևտուրը, ինչպես նաև վեճերի, այդ թվում՝ ներդրողների և պետությունների միջև վեճերի կարգավորումը:
03 հունիսի 2024 ԵՏՀ-ում նախանշել է մտավոր սեփականության օբյեկտների նկատմամբ իրավունքների պաշտպանության հիմնական ուղղությունները «Մտավոր սեփականություն. զարգացման միտումներ, պրակտիկա, հիմնախնդիրներ և լուծման ուղիներ» խորհրդաժողովի ընթացքում, որը տեղի է ունեցել Ռուսաստանում Եվրոպական բիզնեսի ընկերակցության հարթակում, Եվրասիական տնտեսական հանձնաժողովի ձեռնարկատիրական գործունեության զարգացման վարչության փոխտնօրեն Նուրժամալ Իլյասովան խոսել է Եվրասիական տնտեսական միությունում մտավոր սեփականության ոլորտի առանցքային իրադարձությունների մասին: «Մտավոր սեփականության իրավունքների արդյունավետ պահպանումն ու պաշտպանությունը տնտեսության, առաջին հերթին՝ նրա ստեղծագործական և նորարարական ոլորտների աճի վրա ազդող հիմնական գործոններից մեկն է»,- նշել է Նուրժամալ Իլյասովան։ ԵՏՀ ներկայացուցիչը տեղեկացրել է մտավոր սեփականության ոլորտի օրենսդրության կատարելագործման աշխատանքների մասին՝ նշելով, որ մտավոր սեփականության օբյեկտներ պարունակող ապրանքների մաքսային հսկողության հարցերը Հանձնաժողովի հարթակում մշտական քննարկման թեմա են: Գերակա ուղղությունների թվում Նուրժամալ Իլյասովան նշել է ԵԱՏՄ երկրներում պահպանվող արդյունաբերական սեփականության օբյեկտների բիզնեսին ուղղված որոնման առցանց ծառայությունների ստեղծման աշխատանքները, ինչպես նաև Համացանցում մտավոր սեփականության օբյեկտների նկատմամբ իրավունքների պաշտպանության վերազգային կարգավորման ձևավորումը, մտավոր սեփականության օբյեկտների միասնական մաքսային գրանցամատյանի գործարկումը: Նուրժամալ Իլյասովան խորհրդաժողովի մասնակիցներին տեղեկացրել է նաև «Եվրասիական տնտեսական ուղի» Եվրասիական տնտեսական միության շրջանակներում մինչև 2030 թվականը և մինչև 2045 թվականն ընկած ժամանակահատվածում տնտեսական գործընթացների հետագա զարգացման մասին հռչակագրի իրականացման պլանի նախապատրաստման ԵՏՀ աշխատանքի մասին, որը ենթադրում է միջոցառումների, այդ թվում՝ մտավոր սեփականության ոլորտի միջոցառումների ներառում: Եվրոպական բիզնեսի ընկերակցությունը (ԵԲԸ) Ռուսաստանի Դաշնությունում օտարերկրյա ներդրողների հիմնական ներկայացուցչությունն է: 1995 թվականին ստեղծված ԵԲԸ-ն անկախ ոչ առևտրային կազմակերպություն է, որը միավորում է Ռուսաստանում գործող ավելի քան 380 ընկերություն։ ԵԲԸ-ն ներառում է 65 կոմիտե և աշխատանքային խումբ, որոնք իրականացնում են բիզնեսի տարբեր ոլորտներում, ներառյալ մտավոր սեփականության, ոլորտը, հարցերի լայն շրջանակի լոբինգ:  
29 մայիսի 2024 ԵԱՏՄ-ում հաստատվել է ծխախոտային արտադրանքի ակցիզների միասնական ինդիկատիվ դրույքաչափը Եվրասիական տնտեսական հանձնաժողովի խորհրդի մայիսի 29-ի որոշմամբ հաստատվել է ծխախոտային արտադրանքի (ֆիլտրով ծխախոտ) համար Եվրասիական տնտեսական միության պետություններում 2029 թվականի ակցիզների միասնական ինդիկատիվ դրույքաչափը:  Ցուցանիշը սահմանվել է 1000 հատի համար 45 եվրո մակարդակով՝ դրանից ակցիզների փաստացի դրույքաչափերից շեղման առավելագույնը 20%-ով ավել կամ պակաս թույլատրելի միջակայքով: Համեմատության համար նշենք, որ 2024 թվականի համար դրույքաչափը կազմել է 35 եվրո 1000 հատի համար՝ շեղման նույնանման միջակայքով: Դրույքաչափերի ներդաշնակեցումը նախատեսված է ԵԱՏՄ պետությունների ծխախոտային արտադրանքի ակցիզների ոլորտում հարկային քաղաքականություն վարելու սկզբունքների մասին համաձայնագրով և իրականացվում է եվրասիական «հնգյակի» երկրների տարածքներում իրացվող ծխախոտային արտադրանքի ակցիզների միասնական ինդիկատիվ դրույքաչափի (ԱՄԻԴ) մակարդակին հասնելու հնգամյա ժամկետ սահմանելու միջոցով: ԵՏՀ էկոնոմիկայի և ֆինանսական քաղաքականության նախարար Բախիթ Սուլթանովի խոսքով՝ 2029 թվականին ԱՄԻԴ-ի մակարդակը 1000 հատի համար 35 եվրոյից 45 եվրոյի բարձրացնելու անհրաժեշտությունը պայմանավորված է Միության մի շարք երկրներում ծխախոտային արտադրանքի ակցիզների դրույքաչափերի զգալի աճի և ԵԱՏՄ-ի՝ ակցիզների ավելի բարձր հարկային դրույքաչափեր ունեցող պետությունների տարածքներ դրա «հոսքերի» պատճառով ստվերային շուկայի և կեղծ արտադրանքի ծավալների աճի ռիսկերով: «Տվյալ ցուցանիշը ուղենիշ է հնգամյա ժամկետի համար ֆիլտրով ծխախոտի ակցիզների դրույքաչափերը պլանավորող պետական մարմինների, ինչպես նաև իրենց ֆինանսատնտեսական գործունեությունը պլանավորող ծխախոտային արտադրանք արտադրողների համար: Եվրոյի նկատմամբ ազգային արժույթների փոխարժեքների զգալի տատանումների բացակայության դեպքում ԵԱՏՄ բոլոր պետությունները 2024 թվականին կհասնեն ԱՄԻԴ-ի սահմանված մակարդակին», — լուրը մեկնաբանել է Բախիթ Սուլթանովը։  
25 ապրիլի 2024 Բակիտժան Սագինտաև. «Ձեռնարկատիրության ոլորտում փոխգործակցության ամրապնդումը եվրասիական ինտեգրման գլխավոր գերակայությունն է» Եվրասիական տնտեսական հանձնաժողովի կոլեգիայի նախագահ Բակիտժան Սագինտաևն ապրիլի 25-ին Մոսկվայում մասնակցել է Ռուսաստանի արդյունաբերողների և ձեռնարկատերերի միության (ՌԱՁՄ) համագումարին։  Ողջունելով միջոցառման մասնակիցներին՝ Բակիտժան Սագինտաևը նշել է ՌԱՁՄ-ի կարևոր դերը եվրասիական ինտեգրման գերակա ուղղության՝ Եվրասիական տնտեսական միության պետությունների գործարար շրջանակների միջև երկխոսության կառուցման գործնական իրականացման գործում: ԵՏՀ կոլեգիայի նախագահն իր ելույթում կենտրոնացել է ԵԱՏՄ-ում ձեռնարկատիրության խթանման մոտեցումների վրա։ Մասնավորապես, Բակիտժան Սագինտաևը հայտնել է Հանձնաժողովի և միավորման մասնակից երկրների գործարար համայնքի միջև փոխգործակցության գործող ձևաչափերի մասին։  ԵԱՏՄ տարածքում գործարար կլիմայի բարելավման նպատակով գնահատվում է վերպետական կարգավորման ազդեցությունը բիզնես վարելու պայմանների վրա, մշտապես կատարելագործվում է պայմանագրաիրավական դաշտը, վերացվում են փոխադարձ առևտրի խոչընդոտները։ Խոսելով ԵԱՏՄ տարածքում գործարար ակտիվության աճին նպաստող մեխանիզմների մասին՝ ԵՏՀ կոլեգիայի նախագահը մանրամասն անդրադարձել է արդյունաբերական կոոպերացիայի նախագծերի ֆինանսավորմանը։ Ընթացիկ տարում այդ նպատակների համար հատկացվել է շուրջ 1.8 մլրդ ռուբլի։ Բակիտժան Սագինտաևը գործարար համայնքին կոչ է արել ավելի ակտիվ ներգրավվել այս ծրագրում՝ ընդգծելով, որ առաջատար միջազգային ստանդարտներին համապատասխանող, մրցունակ և արտահանմանն ուղղված արտադրանքի արտադրության համար սերտ կոոպերացիոն շփումների հաստատումը կնպաստի ԵԱՏՄ արագացված տեխնոլոգիական զարգացմանը և համաշխարհային ասպարեզում դիրքերի ամրապնդմանը։ «Հանձնաժողովի աշխատանքն ընդհանուր առմամբ ուղղված է մեր երկրների ձեռնարկատերերի կողմից ԵԱՏՄ ինտեգրացիոն ներուժի առավելագույնս արդյունավետ օգտագործելու համար պայմանների ստեղծմանը: Մենք շահագրգռված ենք բիզնեսի հետ համագործակցության հետագա ընդլայնմամբ»,- ամփոփել է Բակիտժան Սագինտաևը։    
19 մարտի 2024 Բախիթ Սուլթանով. «Բիզնես վարելու պայմանների վրա ԵՏՀ որոշումների նախագծերի ազդեցության դրական գնահատականների մասնաբաժինը հասել է առավելագույն մակարդակի» Եվրասիական տնտեսական հանձնաժողովի Կոլեգիան քննարկել է 2023 թվականին Հանձնաժողովի որոշումների նախագծերի կարգավորող ազդեցության գնահատման (ԿԱԳ) անցկացման մշտադիտարկման մասին ամենամյա հաշվետվությունը։ Միջին հաշվով որոշման մեկ նախագծին ստացվում է բիզնեսի ավելի քան 14 առաջարկ: Սա հաստատում է ԵԱՏՄ երկրների ձեռնարկատիրական համայնքի կողմից ԿԱԳ ընթացակարգի իրական պահանջվածությունը։ «ԿԱԳ մասին դրական եզրակացությունների մասնաբաժինը հասել է 98%-ի, սա 2015 թվականից ի վեր կատարված մշտադիտարկման ժամանակահատվածի ամենաբարձր մակարդակն է, ինչը հաստատում է, որ Հանձնաժողովի կարգավորիչ ակտիվությունն ուղղված է բիզնես վարելու պայմանների բարելավմանը», - նշել է ԵՏՀ էկոնոմիկայի և ֆինանսական քաղաքականության նախարար Բախիթ Սուլթանովը։ Զեկույցում նաև տեղեկատվություն է ներկայացված ԵՏՀ ընդունած որոշումների փաստացի ազդեցության գնահատման (ՓԱԳ) ներդրման, ինչպես նաև Միության շրջանակներում միջազգային պայմանագրերի նախագծերի վրա ԿԱԳ-ի տարածման համար նորմատիվ բազայի պատրաստության մասին: Այս ընթացակարգերի կիրառումը մեկնարկել է 2024 թվականի մարտին։ ԿԱԳ-ի իրականացման մշտադիտարկման մասին տարեկան հաշվետվությունը կներկայացվի Եվրասիական տնտեսական հանձնաժողովի խորհրդի քննարկմանը, իսկ հետագայում՝ Եվրասիական միջկառավարական խորհրդի հաստատմանը: Տեղեկանք ԿԱԳ-ն ձեռնարկատիրական գործունեություն վարելու պայմանների վրա ԵՏՀ որոշումների նախագծերի ազդեցության գնահատման ընթացակարգ է։ Այն իրականացնելիս հաշվի է առնվում ԵԱՏՄ երկրների բիզնեսի դիրքորոշումը: ԿԱԳ-ի ընթացակարգը բաղկացած է երկու փուլից. ընթացիկ գնահատումից՝ ԵՏՀ-ի որոշման նախագծի՝ ԵԱՏՄ կայքում 30 օրացուցային օրվանից ոչ պակաս տևողությամբ հանրային քննարկումից և ամփոփիչ գնահատումից՝ ԵՏՀ-ի հատուկ ստեղծված աշխատանքային խմբի կողմից ԿԱԳ-ի մասին եզրակացության նախապատրաստումից։
14 մարտի 2024 Բախիթ Սուլթանով. «ԵՏՀ գործունեությունն ուղղված է ԵԱՏՄ-ում ձեռնարկատիրություն վարելու պայմանների շարունակական բարելավմանը» Մարտի 14-ին Մոսկվայում Եվրասիական տնտեսական հանձնաժողովի էկոնոմիկայի և ֆինանսական քաղաքականության նախարար Բախիթ Սուլթանովը ելույթ է ունեցել Ամերիկյան առևտրի պալատի եվրասիական տնտեսական ինտեգրման հարցերով 10-րդ խորհրդաժողովի լիագումար նստաշրջանում։ Նախարարը ձեռնարկատերերին և ներդրողներին պատմել է բիզնեսի հետ Հանձնաժողովի փոխգործակցության գործիքների, Եվրասիական տնտեսական միության պայմանագրաիրավական բազայի կատարելագործման, փոխադարձ առևտրում խոչընդոտների բացահայտման և վերացման, ներդրումային և կոոպերացիոն համագործակցության զարգացման, ծառայությունների միասնական շուկայի հատվածային ծածկույթի ընդլայնման, ԵԱՏՄ ընդհանուր ֆինանսական շուկայի ձևավորման մոտեցումների մասին։ Բախիթ Սուլթանովը շեշտը դրել է այս տարի Հանձնաժողովի մոտ նոր իրական գործիքի՝ արդյունաբերական կոոպերացիայի նախագծերի ֆինանսական խթանման ի հայտ գալու վրա: Այս կապակցությամբ ԵՏՀ նախարարը ձեռնարկատերերին կոչ է արել ակտիվորեն նախագծեր նախաձեռնել և դիմումներ ներկայացնել աջակցության միջոցներ ստանալու համար։ «Հանձնաժողովի նպատակն է եվրասիական տարածքում ինտեգրացիոն գործընթացների զարգացման միջոցով լավագույն պայմաններ ձևավորել բիզնես վարելու համար։ Մենք շահագրգռված ենք ձեռնարկատիրական համայնքի հետ երկխոսության հետագա ընդլայնմամբ, գործարար շրջանակների ներկայացուցիչներին հետաքրքրող հարցերի համատեղ մշակմամբ», — նշել է Բախիթ Սուլթանովը։ Խորհրդաժողովի քննարկումների մասի շրջանակներում ԵՏՀ ձեռնարկատիրական գործունեության զարգացման վարչության տնօրեն Երնար Բակենովը պատասխանել է ԵԱՏՄ-ում բիզնես վարելուն առնչվող Ամերիկյան առևտրի պալատի ներկայացուցիչների հարցերին։

Պաշարներ ԵՏՄ