арм

Նորություններ

Ելույթներ Ֆոտոսրահ Տեսադարան
14 Oct 2024 Անդրեյ Սլեպնևը հանդիպել է ԱՄԷ արտաքին առևտրի պետական նախարարի հետ Հոկտեմբերի 13-ին Դուբայում (Արաբական Միացյալ Էմիրություններ)՝ ԱՄԷ արտաքին առևտրի պետական նախարար Թանի Բեն Ահմեդ Ալ Զայուդիի հետ աշխատանքային հանդիպմանը ԵՏՀ առևտրի հարցերով կոլեգիայի անդամ (նախարար) Անդրեյ Սլեպնևը մանրամասն քննարկել է ազատ առևտրի համաձայնագրի շուրջ բանակցությունների ընթացքը: Լուծումներ են մշակվել մնացած բանակցային հարցերի ամբողջ շրջանակի վերաբերյալ։
14 Oct 2024 ԵՏՀ-ում ներկայացրել են «մեկ պատուհանի» ազգային մեխանիզմի զարգացման Ղրղզստանի նախագիծը Եվրասիական տնտեսական հանձնաժողովի հարթակում Ղրղզստանի Հանրապետության էկոնոմիկայի և առևտրի նախարարությանն առընթեր «Մեկ պատուհանի» կենտրոն» արտաքին առևտրի ոլորտի պետական ձեռնարկությունը ներկայացրել է «մեկ պատուհանի» ազգային մեխանիզմի նախագիծը։ Միջոցառմանը մասնակցել են ԵՏՀ, Եվրասիական տնտեսական միության երկրների մաքսային ծառայությունների, պետական մարմինների և բիզնեսի ներկայացուցիչներ, որոնք ներգրավված են «մեկ պատուհանի» ազգային մեխանիզմների մշակման նախագծում։ Ղրղզական կողմը ներկայացրել է միջգերատեսչական տեղեկատվական փոխգործակցությունը, «մեկ պատուհանի» մեխանիզմի ներդրման արդյունքները, ԱՏԳ թույլատրական փաստաթղթերի տրամադրման ավտոմատացումը և մասնակցությունը ԵԱՏՄ ընդհանուր գործընթացների իրականացմանը։ Դրան զուգահեռ ներկայացվել են Ղրղզստանի տեղեկատվական առևտրային պորտալի ծառայությունները, որը ստեղծվել է առևտրի ընթացակարգերի պարզեցման նպատակով։ Հատուկ անդրադարձել են «մեկ պատուհանի» ազգային մեխանիզմի նախագծի իրականացման շրջանակներում Ղրղզստանի Հանրապետության տեղեկատվական ռեսուրսների գործունեության գործնական ասպեկտներին։ Միջոցառման ավարտին քննարկումներ են կայացել Ղրղզստանի «մեկ պատուհանի» ազգային մեխանիզմի զարգացման արդիական հարցերի շուրջ։ «Մինչև 2025 թվականը եվրասիական տնտեսական ինտեգրման զարգացման ռազմավարական ուղղությունների իրականացման միջոցառումների պլանի մասին» ԵՏՀ խորհրդի 2021 թվականի ապրիլի 5-ի N 4 կարգադրությամբ սահմանվել են Ռազմավարություն-2025 իրականացման միջոցները, մեխանիզմները և միջոցառումները։ 9.4-րդ կետի մասով սահմանվել է «մեկ պատուհանի» ազգային մեխանիզմների ներդրման փորձնական նախագծերի ցուցադրմանն ուղղված միջոցառումների կազմակերպում հետագայում դրանց համատեղելիության ու տվյալների փոխանակման հնարավորության ապահովման նպատակով:
14 Oct 2024 Վալենտին Տատարիցկի. «Ստանդարտացումը առանցքային գործիք է եվրասիական տարածքում արտադրանքի անվտանգության ապահովման, արտադրանքի որակի և մրցունակության բարձրացմանը աջակցելու համար» Եվրասիական տնտեսական հանձնաժողովի տեխնիկական կարգավորման նախարար Վալենտին Տատարիցկին հոկտեմբերի 14-ին Մինսկում մասնակցել է «Ստանդարտացումը որպես Բելառուսի Հանրապետության արդյունաբերական զարգացման հիմք» խորհրդաժողովին, որը նվիրված էր Ստանդարտների համաշխարհային օրվան և Բելառուսի ստանդարտացման օրվան։ Վալենտին Տատարիցկին իր ելույթում հատուկ անդրադարձել է Եվրասիական տնտեսական միության երկրների լիազոր մարմինների հետ Հանձնաժողովի համատեղ աշխատանքին, որն իրականացվում է արտադրանքին ներկայացվող պահանջները արդիական պահելու նպատակով։ ԵՏՀ նախարարն ընդգծել է ստանդարտացման արդիականությունը եվրասիական ինտեգրման համար առաջնահերթ խնդիրների իրականացման համատեքստում։ Դրանց թվում են հոկտեմբերի 1-ին Հայաստանում՝ Եվրասիական միջկառավարական խորհրդի նիստում նախանշված արդյունաբերական կոոպերացիոն համագործակցության ուղղությունները, ցածր ածխածնային զարգացման ոլորտի զարգացումը, ինչպես նաև Միության շրջանակներում ստեղծվող թվային միջավայրի ֆունկցիոնալը։ Վալենտին Տատարիցկին, մասնավորապես, նշել է, որ ստանդարտացումը առանցքային գործիք է եվրասիական տարածքում արտադրանքի անվտանգության ապահովման, արտադրանքի որակի և մրցունակության բարձրացմանը աջակցելու համար: Նախարարը խորհրդաժողովի մասնակիցներին հորդորել է դուրս չմնալ «Եվրասիական տնտեսական ուղի» հռչակագրի իրականացման միջոցառումների պլանի քննարկումներից, այդ թվում՝ արդյունաբերական համալիրի խնդիրների լուծման համար ստանդարտացման արդյունքների գործնական ինտեգրման մասով:
11 Oct 2024 Մետաղագործներին պատմել են ԵԱՏՄ և Իրանի միջև ազատ առևտրի համաձայնագրով ստեղծվող նախապատվությունների մասին Հոկտեմբերի 10-ին «Մետաղագլոծման շուկաներ. վաճառքներ, արտադրություն, ռազմավարություն» երկրորդ միջազգային խորհրդաժողովի շրջանակներում Եվրասիական տնտեսական հանձնաժողովի առևտրային քաղաքականության վարչության առևտրային կարգավորման հատուկ հարցերի բաժնի պետ Կիրա Դանիլչևան հանդես է եկել Եվրասիական տնտեսական միության և Իրանի Իսլամական Հանրապետության միջև ազատ առևտրի համաձայնագրին համապատասխան ստեղծվող արտոնյալ պայմանների մասին զեկույցով։ «Ստորագրված համաձայնագիրը պայմաններ կապահովի ԵԱՏՄ երկրների և Իրանի միջև առևտրի զգալի աճի համար։ Սակայն ստեղծված նախապատվություններն ակտիվորեն օգտագործելու համար կողմերի բիզնեսի ներկայացուցիչները պետք է զարգացնեն գործարար կապերը»,- նշել է նա։ Այս կապակցությամբ Կիրա Դանիլչևան գործարար համայնքի շահագրգիռ ներկայացուցիչներին հորդորել է մասնակցել «Երվազիա ԷՔՍՊՈ 2024» երրորդ մասնագիտացված ցուցահանդեսին, որը նախատեսվում է անցկացնել 2024 թվականի դեկտեմբերի 3-ից 6-ը Թեհրանում (Իրան): Եվրասիական տնտեսական միության և նրա անդամ պետությունների՝ մի կողմից, և մյուս կողմից՝ Իրանի Իսլամական Հանրապետության միջև ազատ առևտրի մասին համաձայնագիրը ստորագրվել է 2023 թվականի դեկտեմբերի 25-ին: Ներկայումս ավարտվում են Համաձայնագրի ուժի մեջ մտնելու համար անհրաժեշտ ընթացակարգերը։  
11 Oct 2024 Փորձագետները քննարկել են ԵԱՏՄ երկրների ապրանքների հայտարարագրմանն առնվող հերթական նախաձեռնությունները Հոկտեմբերի 10-ին Մաքսային օրենսդրության և իրավակիրառ պրակտիկայի վարչության տնօրենի տեղակալ Գրիգոր Օհանյանի նախագահությամբ կայացել է Եվրասիական տնտեսական հանձնաժողովի պրոֆիլային խորհրդատվական կոմիտեին առընթեր մաքսային հայտարարագրման հարցերով աշխատանքային խմբի նիստը: Եվրասիական տնտեսական միության երկրների պետական մարմինների և գործարար համայնքների փորձագետները քննարկել են Եվրասիական տնտեսական միության երկրների մի շարք նախաձեռնողական նախագծեր և առաջարկներ, որոնք ուղղված են ապրանքների մաքսային հայտարարագրման հետագա կատարելագործմանը։ Քննարկվել են մաքսային հսկողության արդյունավետությունը բարձրացնելու և ստուգումների քանակը նվազեցնելու նպատակով ապրանքային հայտարարագրում բեռնարկղերի մասին տեղեկությունների օպտիմալացման հարցեր։ Բացի այդ, քննարկվել են տրանսպորտային, առևտրային և այլ փաստաթղթերը որպես այն ապրանքների հայտարարագիր օգտագործելու կարգի հրահանգի փոփոխությունները, որոնց համար կարող է սահմանվել հատուկ մաքսային ընթացակարգ, ինչպես նաև նման ընթացակարգով դրանց գրանցման պայմանները: Ապրանքային հայտարարագրի լրացման կարգը հաստատվել է Մաքսային միության հանձնաժողովի 20.05.2010 թ. № 257 որոշմամբ։ Տրանսպորտային (փոխադրման), առևտրային և (կամ) այլ փաստաթղթերը որպես ապրանքային հայտարարագիր օգտագործելու կարգի հրահանգը հաստատվել է Մաքսային միության հանձնաժողովի 20.05.2010 թ. № 263 որոշման 1-ին կետով: Մաքսային միության հանձնաժողովի 20.05.2010 թ. № 329 որոշմամբ հաստատվել է ապրանքների այն կատեգորիաների ցանկը, որոնց նկատմամբ կարող է սահմանվել հատուկ մաքսային ընթացակարգ, և նման մաքսային ընթացակարգով դրանց գրանցման պայմանները։ ԵՏՀ խորհրդի 29.05.2024 թ. № 55 որոշմամբ սահմանվել են միջազգային պաշտոնական սպորտային միջոցառումներում օգտագործելու համար նախատեսված ապրանքները ԵԱՏՄ մաքսային սահմանով տեղափոխելու առանձնահատկությունները, հատուկ մաքսային ընթացակարգով դրանց գրանցման պայմանները և դրա կիրառման կարգը։
11 Oct 2024 Վալենտին Տատարիցկի. «ԵԱՏՄ պետությունների տեխնիկական, տեխնոլոգիական և տնտեսական անկախությունն ուղղակիորեն կախված է ստանդարտացման զարգացման մակարդակից» Եվրասիական տնտեսական հանձնաժողովի տեխնիկական կարգավորման նախարար Վալենտին Տատարիցկին հոկտեմբերի 10-ից 11-ը Սանկտ Պետերբուրգում՝ «Ռուսաստանի ստանդարտացման շաբաթ» 5-րդ միջազգային տեխնոլոգիական համաժողովի շրջանակներում մասնակցել է «Ստանդարտացում զարգացման ազգային նպատակների իրականացման համար» գլխավոր լիագումար նստաշրջանին։ Համաժողովի մասնակիցները քննարկել են միջազգային, տարածաշրջանային և ազգային ստանդարտացման զարգացման հիմնարար հարցեր: Մասնավորապես, օրակարգում էին ստանդարտացման համակարգի թվային վերափոխման, թվային տեխնիկական կանոնակարգման, շինարարությունում և կլիմայական օրակարգի շրջանակներում կանաչ ստանդարտների ներդրման հարցեր, մանկական ապրանքների արդյունաբերության զարգացման առանցքային հարցեր, պարենային անվտանգությունը, ինչպես նաև շինարարության ոլորտի ստանդարտացման հարցեր։ Վալենտին Տատարիցկին ընդգծել է. «Ստանդարտները Եվրասիական տնտեսական միության միասնական և պարտադիր կատարման ենթակա տեխնիկական կանոնակարգերի մեր ապացույցների բազան են։ Ընդ որում, անխոչընդոտ միջավայր ստեղծելու համար առաջնահերթ է համապատասխան միջազգային ստանդարտների հիման վրա մշակված ԳՕՍՏ ստանդարտների ցանկերում ընդգրկելը»։ Նախարարն արձանագրել է, որ Միության գոյության տասնամյակի ընթացքում տեխնիկական կարգավորման ոլորտում մեծ աշխատանք է կատարվել արտադրանքի նկատմամբ միասնական պարտադիր պահանջներ սահմանելու և դրանք ստանդարտներով ապահովելու ուղղությամբ։ Այսօր Հանձնաժողովի հարթակում իրականացվում է ստանդարտական ոլորտի համակարգված քաղաքականություն, որը թույլ է տալիս լուծել շատ հրատապ խնդիրներ։ Ըստ Վալենտին Տատարիցկու՝ ստանդարտների (առավելապես միջպետական ստանդարտների) մշակման և արդիականացման արդյունավետությունը անհրաժեշտ է մշտապես բարձրացնել։ Այդ նպատակով Միությունում կատարելագործվել են տեխկանոնակարգերի ստանդարտների ցանկերի ձևավորման ընթացակարգերը։ 2023 թվականին ընդունվել է Միության շրջանակներում ստանդարտացման աշխատանքների համակարգման կարգը, որն օգնում է արդյունավետ փոխգործակցություն հաստատել ստանդարտացման ազգային մարմինների միջև: Միության իրավունք է ներդրվել արտադրանքին ներկայացվող պահանջների արդիականության պարբերական գնահատման կարգը: Այս տարի ուժի մեջ է մտել Տեխկանոնակարգերի և դրանց ստանդարտների ցանկերի գիտատեխնիկական մակարդակի պարտադիր պարբերական գնահատման կարգը։ Մինչև 2030 թվականը նախատեսվում է 29 տեխկանոնակարգի և դրանք ապահովող ստանդարտների ԳՏՄ գնահատում։ Վալենտին Տատարիցկին ընդգծել է «Թվային տեխնիկական կարգավորումը ԵԱՏՄ շրջանակներում» նախագծի իրականացման արդիականությունը. «Թվային տեխնիկական կարգավորումը թվային եվրասիական տարածքի ամենամասշտաբային նախագիծն է։ Ստեղծվող թվային հարթակը մեզ թույլ կտա նախ ապահովել թղթային միջավայրից հեռանալը. տեխկանոնակարգերը կմշակվեն անմիջապես թվային հարթակում, երկրորդ՝ թվային հարթակը բացարձակ առավելություն է բիզնեսի և արդյունաբերության համար, քանի որ այն զգալիորեն կպարզեցնի փոխգործակցությունը տեխկանոնակարգեր մշակելիս, երրորդ՝ արտադրանքին ներկայացվող բոլոր միութենական պարտադիր պահանջները կլինեն թվային տեսքով, ինչը շատ հարմար է նման պահանջների որոնման, նույնականացման և նախագծման և արտադրության գործընթացում ներդրման համար»: ԵՏՀ նախարարն ընդգծել է, որ նախագծի հետագա զարգացումը կօգնի քայլ առ քայլ շարժվել համապատասխանության գնահատման գործընթացի թվայնացման, հսկողական գործունեության ավտոմատացման ուղղությամբ և, ընդհանուր առմամբ, թույլ կտա Միության լրացուցիչ ծառայություններ միացնել այս թվային հարթակին։ Տեխնիկական կարգավորման և հավատարմագրման վարչության տնօրեն Թալգաթ Մոմիշևը և Վարչության փոխտնօրեն Մաքսիմ Կիմը մասնակցել են Համաժողովի հետևյալ նստաշրջանների աշխատանքներին՝ «Թվային տեխնիկական կարգավորումը՝ եվրասիական ինտեգրման հիմք», «Ստանդարտացման ազգային համակարգի թվային վերափոխում. հիմնական լուծումներ և զարգացման ուղղություններ», «Շինանյութերի պետական վերահսկողության և հսկողության ստանդարտացում և վերականգնում» և «Ստանդարտացման դերը տեխնոլոգիական լիդերության հասնելու գործում՝ էլեկտրատեխնիկայի և էլեկտրոնիկայի օրինակով»: Համաժողովը կազմակերպել է Տեխնիկական կարգավորման և չափագիտության դաշնային գործակալությունը (Ռոսստանդարտ)՝ Ստանդարտների համաշխարհային օրվան ընդառաջ։ Համաժողովի աշխատանքներին մասնակցել են ԵԱՏՄ երկրների պետական մարմինների, ստանդարտացման միջազգային և օտարերկրյա կազմակերպությունների, խոշորագույն գիտահետազոտական և կրթական կենտրոնների, արդյունաբերական ձեռնարկությունների ղեկավարներ և ներկայացուցիչներ։
10 Oct 2024 Բակիտժան Սագինտաևը շնորհավորել է Միգել Դիաս-Կանել Բերմուդեսին Կուբայի Հանրապետության Անկախության օրվա առթիվ Այսօր Կուբան նշում է ազգային տոնը՝ Անկախության օրը։ Եվրասիական տնտեսական հանձնաժողովի կոլեգիայի նախագահ Բակիտժան Սագինտաևը շնորհավորել է Կուբայի Հանրապետության նախագահ Միգել Դիաս-Կանել Բերմուդեսին և Կուբայի ամբողջ ժողովրդին տոնի առթիվ։ Հանձնաժողովի և անձամբ իր անունից Բակիտժան Սագինտաևը Կուբային մաղթել է կայուն տնտեսական զարգացում և բարեկեցություն։ Կուբայի Հանրապետությունը ԵԱՏՄ կից դիտորդ պետություն է և Լատինական Ամերիկայում և Կարիբյան ավազանում Եվրասիական տնտեսական միության առանցքային գործընկերներից մեկը:
10 Oct 2024 Անդրեյ Սլեպնևը ՌԱՁՄ-ում խոսել է ԵԱՏՄ և երրորդ երկրների միջև առևտրային բանակցությունների ընթացքի մասին Եվրասիական տնտեսական հանձնաժողովի առևտրի նախարար Անդրեյ Սլեպնևը ելույթ է ունեցել Ռուսաստանի արդյունաբերողների և ձեռնարկատերերի միության (ՌԱՁՄ) ինտեգրման, առևտրամաքսային քաղաքականության և ԱՀԿ-ի կոմիտեի նիստում: Հանդիպման մասնակիցները քննարկել են ԵԱՏՄ և երրորդ երկրների միջև առևտրային բանակցությունների ընթացքը՝ զարգացնելով Միության առևտրային համաձայնագրերի ցանցի ձևավորման վերաբերյալ հանձնարարությունը, որն ընդունվել է 2024 թվականի հոկտեմբերի 1-ին ՌԱՁՄ նիստում։ Մասնավորապես, խոսքը Ինդոնեզիայի և ԱՄԷ հետ բանակցությունների մասին էր։ Անդրեյ Սլեպնևը նաև տեղեկացրել է դեկտեմբերի 3-ից 6-ը Թեհրանում կայանալիք «Եվրասիա ԷՔՍՊՈ 2024» ցուցահանդեսին ԵՏՀ պատվիրակության առաջիկա մասնակցության մասին: ԵԱՏՄ և Իրանի միջև ազատ առևտրի մասին լիաձևաչափ համաձայնագրի մեկնարկի նախօրեին նախարարը անդամ պետությունների ընկերություններին կոչ է արել պրոակտիվ դիրք զբաղեցնել արտահանման համար հետաքրքրություն ներկայացնող ապրանքների առաջմղման նպատակով։ Մասնավորապես, նա առաջարկել է միանալ ԵՏՀ պատվիրակությանը համագործակցության զարգացման շուրջ առարկայական երկխոսություն վարելու համար։
Ցուցադրել ավելին

Պաշարներ ԵՏՄ