Տառատեսակի չափը. A A A

Կայքի գույները. C C C

Գրանցում կայքը Մորացել

Ընտրեք ամսաթվերը

Ընտրեք ուղղությունը

Որոնման արդյունքները 7110

27 հունիսի 2025 ԵԱՏՄ-ն և Մոնղոլիան ժամանակավոր առևտրային համաձայնագիր են կնքել Հունիսի 27-ին Մինսկում՝ Եվրասիական տնտեսական բարձրագույն խորհրդի նիստի շրջանակներում, կայացել է Եվրասիական տնտեսական միության և նրա անդամ պետությունների՝ մի կողմից, և մյուս կողմից՝ Մոնղոլիայի միջև Ժամանակավոր առևտրային համաձայնագրի ստորագրումը: Փաստաթուղթը ստորագրեցին՝ Հայաստանի Հանրապետության փոխվարչապետ Մհեր Գրիգորյանը, Բելառուսի Հանրապետության փոխվարչապետ Նատալյա Պետկևիչը, Ղազախստանի Հանրապետության փոխվարչապետ, ազգային տնտեսության նախարար Սերիկ Ժումանգարինը, Ղրղզստանի Հանրապետության նախարարների կաբինետի առաջին փոխվարչապետ Դանիյար Ամանգելդիևը, Ռուսաստանի Դաշնության կառավարության փոխնախագահ Ալեքսեյ Օվերչուկը, Եվրասիական տնտեսական հանձնաժողովի կոլեգիայի նախագահ Բակիտժան Սագինտաևը, ինչպես նաև Մոնղոլիայի առաջին փոխվարչապետ, տնտեսության և զարգացման նախարար Ուչրալ Նյամ Օսորը: Համաձայնագրի ստորագրումը նշանավորում է ԵԱՏՄ երկրների և Մոնղոլիայի միջև առևտրային հարաբերությունների զարգացման նոր փուլը: Այն ընդգրկում է 367 ապրանքային ենթադիրք յուրաքանչյուր կողմի համար, որոնց նկատմամբ մաքսատուրքերը կզրոյացվեն կամ կնվազեցվեն փաստաթղթի ուժի մեջ մտնելու պահից: Համաձայնագիրը կնքվում է երեք տարի ժամկետով՝ գործողության ժամկետը ևս երեք տարով երկարաձգելու հնարավորությամբ: «Ըստ վիճակագրության՝ սակագնային առանձնաշնորհները կընդգրկեն ԵԱՏՄ-ից Մոնղոլիա 2 մլրդ դոլարի արտահանման մատակարարումներ, այսինքն՝ ավելի քան 90%-ը: Համաձայնեցված առանձնաշնորհումները ԵԱՏՄ ընկերություններին թույլ կտան տնտեսել տարեկան մինչև 100 մլն դոլար», — նշել է Եվրասիական տնտեսական հանձնաժողովի առևտրի նախարար Անդրեյ Սլեպնևը: Նրա խոսքով՝ ստորագրված առևտրային համաձայնագրին համապատասխան՝ ԵԱՏՄ երկրների գյուղատնտեսները առանձնաշնորհային պայմաններ կունենան Մոնղոլիայի շուկա այնպիսի սկզբունքորեն կարևոր ապրանքների մատակարարման համար, ինչպիսիք են ցորենը, եգիպտացորենը, կաթնամթերքը, բուսական յուղերը, մսից ու թռչնամսից արտադնարքը, շաքարը, հրուշակեղենը, պանիրները, հանքային ջուրը և ալկոհոլային արտադրանքը: Արդյունաբերական ապրանքների մասով մատակարարումների աճ է կանխատեսվում արտադրանքի հետևյալ տեսակների համար՝ մետաղագործական արտադրանք (երկաթահամահալվածքներ, շիկագլոցված և սառնագլոցված գլանվացքներ, ձողեր, անկյունակներ, խողովակներ և այլն), շարժիչային փոխադրամիջոցներ (ավտոմեքենաներ, ավտոբուսներ, բեռնատարներ, հատուկ տեխնիկա, ավտոբաղադրիչներ, կցանքներ և այլն), երկաթուղային մեքենաշինության և քիմիական արդյունաբերության արտադրանք (պոլիմերներ, պլաստիկ սալեր և մասեր), դողեր, ազոտային պարարտանյութեր, դեղեր և այլն: Մոնղոլական ապրանքների մասով, իրենց հերթին, առանձնաշնորհային մուտք կտրամադրվի մսի (ձիու, ԽԵԱ-ի, ոչխարի միս, մսի պահածոներ, ենթամթերք), կաթնամթերքի (յոգուրտներ, պանիր), թեթև արդյունաբերության ապրանքների (բուրդ, թելեր), ինչպես նաև թեթև արդյունաբերության պատրաստի որակյալ ապրանքների համար՝ ներառյալ տրիկոտաժե և տեքստիլ հագուստը: Համաձայնագրի ոչ սակագնային մասը պարունակում է հետագա կոոպերացիայի հնարավորություններ՝ տեխնիկական կարգավորման, սանիտարական, անասնաբուժական և բուսասանիտարական միջոցների, մաքսային համագործակցության, էլեկտրոնային առևտրի և տնտեսական համագործակցության ոլորտներում: «Վերջին մի քանի տարվա ընթացքում ԵԱՏՄ-ի և Մոնղոլիայի միջև ապրանքաշրջանառությունն արդեն աճել է ավելի քան մեկուկես անգամ: Ակնկալում ենք, որ համաձայնագրի գործարկումից հետո այս միտումը կպահպանվի և կամրապնդվի, ինչը թույլ կտա մեր ապրանքաշրջանառությունը հասցնել 3 մլրդ դոլարի», — նշել է Անդրեյ Սլեպնևը: Ստորագրվելուց հետո ժամանակավոր առևտրային համաձայնագիրը կուղղվի Մոնղոլիայում և ԵԱՏՄ երկրներում վավերացման ընթացակարգերի իրականացմանը, որոնք անհրաժեշտ են դրա ուժի մեջ մտնելու համար։

27 հունիսի 2025 Մաքսիմ Երմոլովիչ. «Հանրային ընդունարանի ընթացքում կայացել է շուկայի կարգավորիչների ու մասնակիցների ուղիղ, օգտակար երկխոսություն» Հունիսի 26-ին Մինսկում՝ Եվրասիական տնտեսական համաժողովի շրջանակներում Եվրասիական տնտեսական հանձնաժողովի մրցակցության և հակամենաշնորհային կարգավորման բլոկն անցկացրել է Հանրային ընդունարան բիզնեսի համար: «Սա Հանձնաժողովի եզակի գործիք է, որն ուղղված է Եվրասիական տնտեսական միության անդրսահմանային շուկաներում մրցակցության կանոնների, պետական գնումներին մասնակցության հնարավորությունների մասին բիզնեսի իրազեկվածության բարձրացմանը», — ընդգծել է ԵՏՀ մրցակցության և հակամենաշնորհային կարգավորման նախարար Մաքսիմ Երմոլովիչը: ԵԱՏՄ երկրների բիզնես համայնքի, պետական մարմինների ներկայացուցիչները, փորձագետները քննարկել են պետական գնումների և անդրսահմանային շուկաներում առկա մրցակցության արդիական թեմաներ, ստացել Հանձնաժողովի աշխատակիցների անհատական խորհրդատվություն: Ըստ էության, տեղի է ունեցել շուկայի կարգավորիչների ու մասնակիցների ուղիղ երկխոսություն, որը ձեռնարկատերերին օգնել է ավելի լավ հասկանալ Միության շրջանակներում աշխատանքի իրավական առանձնահատկությունները:   Ընդ որում, Հանրային ընդունարանին ավանդաբար մասնակցել են ոչ միայն մրցակցության և հակամենաշնորհային կարգավորման բլոկի, այլև Հանձնաժողովի այլ վարչությունների ներկայացուցիչներ: «Մենք ուրախ ենք, որ Հանրային ընդունարանը կրկին անգամ հետաքրքրել է մեր երկրների գործարար շրջանակների ներկայացուցիչներին, և որ դրա մասնակիցները կարողացան խորհրդատվություն ստանալ ԵՏՀ գործունեության հարցերի ամենալայն շրջանակի վերաբերյալ», — նշել է Մաքսիմ Երմոլովիչը:  

27 հունիսի 2025 ԵՏՀ-2025-ում քննարկվել են արհեստական բանականության ներուժը և վիճակագրությունում դրա կիրառման հեռանկարները Եվրասիական տնտեսական միության շրջանակներում վիճակագրության ոլորտում արհեստական բանականության օգտագործումը կարող է լրացուցիչ խթան դառնալ ԵԱՏՄ վիճակագրական համակարգի թվային, տեխնոլոգիական և նորարարական ներուժի ամրապնդման համար: Այս կարծիքը ներկայացրել է Եվրասիական տնտեսական հանձնաժողովի ինտեգրման և մակրոտնտեսության նախարար Էլդար Ալիշերովը Մինսկում՝ ԵՏՀ-2025-ի «ԵԱՏՄ վիճակագրություն 2030. արհեստական բանականության կիրառման ներուժը և հեռանկարները» կլոր սեղանի ընթացքում: «Վիճակագրական գործունեությունում արհեստական բանականության բարեհաջող ներդրման և հուսալի օգտագործման համար պահանջվում է հստակ ստանդարտների մշակում, թափանցիկության, տվյալների պաշտպանության և ազգային վիճակագրական ծառայությունների ու միջազգային կազմակերպությունների կողմից համաձայնեցված գործողությունների մշակման ապահովում», — նշել է Էլդար Ալիշերովը: Կլոր սեղանի մասնակիցները համաձայնել են, որ արհեստական բանականության հիման վրա վիճակագրական տեղեկատվության վերլուծության գործիքների ի հայտ գալը և զարգացումը պաշտոնական վիճակագրական տեղեկատվության պահանջմունքների փոփոխություններով պայմանավորված կարևորագույն միտումներից է: Արհեստական բանականության տեխնոլոգիաները կարող են կիրառվել վիճակագրական արտադրության բոլոր փուլերում՝ տվյալների հավաքագրումից մինչև պաշտոնական վիճակագրական տեղեկատվության տարածումը: «ԵԱՏՄ վիճակագրական համակարգի կայուն զարգացման արդիական միտում է ժամանակակից տեղեկատվական տեխնոլոգիաների, այդ թվում՝ արհեստական բանականության ներդրումն է, որը թույլ կտա ապահովել աշխատանքի արդյունավետության անհրաժեշտ մակարդակը առաջադրված խնդիրների տեղեկատվական և հաղորդակցական բարդության աճի բարձր տեմպերի պայմաններում», — ամփոփել է Էլդար Ալիշերովը: 

27 հունիսի 2025 Արզիբեկ Կոժոշև. «Ընդհանուր շուկան կապահովի էլեկտրաէներգիայի անդրսահմանային առևտրի հավասար հասանելիություն» Եվրասիական տնտեսական հանձնաժողովի էներգետիկայի և ենթակառուցվածքների նախարար Արզիբեկ Կոժոշևը Մինսկում՝ ԵՏՀ-2025-ում մասնակցել է «ԵԱՏՄ ընդհանուր էլեկտրաէներգետիկ շուկա. հայացք դեպի ապագա» կլոր սեղանի աշխատանքներին, որը նվիրված էր եվրասիական «հնգյակի» պետությունների էլեկտրաէներգետիկ շուկաների ինտեգրման հեռանկարներին: «Ընդհանուր շուկան կապահովի էլեկտրաէներգիայի անդրսահմանային առևտրի հավասար հասանելիություն, կընդլայնի փոխադարձ առևտրի ծավալներն ու եղանակները, թույլ կտա հավասարեցնել Եվրասիական տնտեսական միության երկրների էներգետիկ համակարգերի բեռնվածքի ժամանակացույցը և հրաժարվել գեներացնող հզորությունների ավելորդ կառուցումից: Սա կբարձրացնի անդամ պետությունների էներգետիկ անվտանգությունը», — նշել է Արզիբեկ Կոժոշևը: Միջոցառման մասնակիցները նշել են ԵԱՏՄ ընդհանուր էլեկտրաէներգետիկ շուկայի նորմատիվ բազայի ձևավորման առաջընթացը, քննարկել էլեկտրաէներգիայի ներքին շուկաների բարեփոխման ու զարգացման առանձնահատկությունները ինտեգրման համատեքստում և սահմանել ապագա շուկայի գործունեության պայմաններում Միության երկրների տնտեսության իրական հատվածի և գործարար համայնքի զարգացման հեռանկարներն ու գերակայությունները: «Ներկա պահի դրությամբ հաստատված է էլեկտրաէներգիայի շուկայի գործունեության գրեթե ամբողջ նորմատիվ բազան, զգալի չափով պատրաստ է Միանալու մասին պայմանագիրը և կանոնակարգերը: Միևնույն ժամանակ, չափազանց կարևոր է հետևել Պայմանագրում ամրագրված և կանոններում իրագործված ընդհանուր էլեկտրաէներգետիկ շուկայի ձևավորման ու գործունեության սկզբունքներին, այդ թվում՝ հաշվի առնելով էլեկտրաէներգետիկայի լայն ազդեցությունը տնտեսության իրական հատվածի վրա», — տեղեկացրել է Արզիբեկ Կոժոշևը: Կլոր սեղանին մասնակցել են ավելի քան 50 ոլորտային կազմակերպությունների ղեկավարներ և փորձագետներ, վերահաստատելով բիզնեսի ու կարգավորիչների մեծ հետաքրքրվածությունը ընդհանուր էլեկտրաէներգետիկ տարածքի ձևավորմամբ: Քննարկմանը մասնակցել են ԵԱՏՄ պետությունների էներգետիկ գերատեսչությունների ղեկավարներ, ենթակառուցվածքային և բորսայական կազմակերպությունների ներկայացուցիչներ:

27 հունիսի 2025 Վալենտին Տատարիցկի. «ԵԱՏՄ-ում սննդամթերքի անվտանգությունը բնակչության բարեկեցության երաշխիքն է» Եվրասիական տնտեսական հանձնաժողովի տեխնիկական կարգավորման նախարար Վալենտին Տատարիցկին Մինսկում՝ ԵՏՀ-2025-ի շրջանակներում անցկացրել է «ԵԱՏՄ սննդամթերքի անվտանգությունը՝ որպես բնակչության բարեկեցության երաշխիք. համալիր կարգավորում, մոտեցումներ ու գերակայություններ» թեմայով պանելային նստաշրջան: Սննդամթերքի անվտանգությունը բազմակողմ հիմնախնդիր է, որը ներառում է մարդկանց առողջությունը, տարբեր տնտեսական, սոցիալական, գիտական և տեխնիկական ասպեկտներ: Համաձայնեցված ՍԲՍ-միջոցները և տեխնիկական կարգավորումն առանցքային դեր են կատարում նման արտադրանքի անվտանգության ապահովման գործում: «Սննդամթերքի անվտանգությունը ոչ միայն սպառողների առողջության պաշտպանությունն է, այլև ներքին և արտաքին շուկաներ ապրանքների մուտքի, արտադրողների մրցունակության բարձրացման և ՍԲՍ-միջոցների և տեխնիկական կարգավորման համակարգի նկատմամբ վստահության ամրապնդման առանցքային տարրը, — ընդգծել է Վալենտին Տատարիցկին: — Դրա ապահովումը պահանջում է համակարգային և միջկարգապահական մոտեցում՝ հիմնված գիտական տվյալների և ժամանակակից թվային գործիքների վրա: Հանձնաժողովի և ԵԱՏՄ երկրների լիազոր մարմինների ամբողջ գործունեությունն ուղղված է սննդամթերքի անվտանգության ապահովման, Միության ներքին շուկայում և արտաքին շուկաներում դրա մրցունակության բարձրացման համար պայմանների ստեղծմանը»: Նստաշրջանը առաջացրել է ԵԱՏՄ երկրների սանիտարական, անասնաբուժասանիտարական, կարանտինային բուսասանիտարական միջոցների և տեխնիկական կարգավորման ոլորտի լիազոր մարմինների, առաջատար գիտահետազոտական ինստիտուտների, միջազգային կազմակերպությունների, սննդամթերք արտադրողների և ոլորտային միությունների ու ընկերակցությունների ներկայացուցիչների մեծ հետաքրքրությունը: Միջոցառման մասնակիցները քննարկել են սանիտարական, անասնաբուժական և բուսասանիտարական միջոցների և տեխնիկական կարգավորման ոլորտի իրավական գործիքների ստեղծման. մարդկանց, կենդանիների ու բույսերի առողջությանը սպառնացող վտանգների վերացմանն ուղղված «Միասնական առողջություն» հայեցակարգի իրականացման. սննդամթերքի անվտանգության ապահովման միասնական համակարգի կառուցման գործում ԵԱՏՄ երկրների և միջազգային կազմակերպությունների միջև փոխգործակցության, ինչպես նաև ՍԲՍ-միջոցների կիրառման ոլորտում տեղեկատվական համակարգերի օգտագործման հարցեր: Արդյունքում պանելային նստաշրջանի մասնակիցները կարևորել են Համաժողովի շրջանակներից դուրս երկխոսության շարունակությունը, փորձի փոխանակումը և սննդամթերքի անվտանգության պայմանների ապահովման ուղղությամբ Հանձնաժողովի և Միության երկրների լիազոր մարմինների հետագա համատեղ գործնական աշխատանքը՝ ներառյալ միութենական ակտերի կատարելագործումը: Նստաշրջանին մասնակցել են Կենդանիների առողջության համաշխարհային կազմակերպության (ԿԱՀԿ) Եվրոպայի տարածաշրջանային ներկայացուցչության, Բույսերի պաշտպանության Եվրոպական և Միջերկրյածովյան կազմակերպության (ԲՊԵՄԿ) և Առողջապահության համաշխարհային կազմակերպության (ԱՀԿ) տարածաշրջանային գրասենյակի ներկայացուցիչներ:  

27 հունիսի 2025 ԵՏՀ-2025-ում քննարկվել են ժամանակակից մրցակցային քաղաքականության հարցեր Այն հիմնական մարտահրավերների մասին, որոնց գլոբալ փոփոխությունների պայմաններում բախվում են Եվրասիական տնտեսական միության երկրների մրցակցային մարմինները, խոսվել է հունիսի 26-ին Մինսկում՝ ԵՏՀ-2025-ի «Ժամանակակից մրցակցային քաղաքականություն. մարտահրավերներ և հեռանկարներ» պանելային նստաշրջանում, որին մասնակցել է Եվրասիական տնտեսական հանձնաժողովի մրցակցության և հակամենաշնորհային կարգավորման նախարար Մաքսիմ Երմոլովիչը: Միջոցառմանը քննարկվել են մրցակցության ապահովման համար անհրաժեշտ միջոցներն ու մեխանիզմները, պետության ու բիզնեսի դերը արդար մրցակցային միջավայրի ձևավորման գործում: Առանձին անդրադարձել են միջազգային փորձին: Իրանի, Չինաստանի, Ուզբեկստանի մրցակցային մարմինների ներկայացուցիչները ներկայացրել են իրենց աշխատանքի փորձը, այդ թվում՝ տեխնոլոգիական և շուկայական փոփոխություններին օպերատիվ արձագանքման փորձը: Ներկայացվել է թեմայի շուրջ ՅՈՒՆԿՏԱԴ-ի մրցակցության և սպառողների իրավունքների ոլորտի քաղաքականության ստորաբաժանման ղեկավարի և ԲՐԻԿՍ մրցակցային իրավունքի և քաղաքականության միջազգային կենտրոնի տնօրենի տեսլականը: Նստաշրջանի բանախոսներն էին ԵԱՏՄ երկրների ազգային մարմինների ներկայացուցիչներ: «Կարծում եմ, նստաշրջանում առաջադրված բոլոր նպատակներն իրագործված են: Այս միջոցառումը Հանձնաժողովին և ԵԱՏՄ երկրներին կօգնի կառուցել միութենական շուկաներում մրցակցության ոլորտում համատեղ աշխատանքի հետագա ուղղությունները», — ամփոփել է Մաքսիմ Երմոլովիչը:  

27 հունիսի 2025 ԵՏՀ-ում քննարկել են տրանսպորտում թվային տեխնոլոգիաների ներդրման հարցը Հունիսի 26-ին «ԵԱՏՄ-ում տրանսպորտում թվային լուծումների ներդրում. անթուղթ տեխնոլոգիաներ, ավտոմատացված և անօդաչու փոխադրամիջոցներ» թեմատիկ նստաշրջանի մասնակիցները քննարկել են տրանսպորտի ոլորտում ինտեգրման զարգացումը և դրա ազդեցությունը Եվրասիայում կայուն զարգացման ապահովման վրա: Միջոցառումը տեղի է ունեցել Մինսկում՝ 4-րդ Եվրասիական տնտեսական համաժողովի հարթակում։ «Թվայինի դերը, Եվրասիական տնտեսական միության երկրների տրանսպորտային ոլորտում թվային գործիքների ժամանակին ներդրման կարևորությունը հսկայական է, — նշել է Եվրասիական տնտեսական հանձնաժողովի տրանսպորտի և ենթակառուցվածքների վարչության տնօրեն Ռուստան Ջենալինովը: — Մինչև 2040 թվականը թղթայինից էլեկտրոնային փաստաթղթաշրջանառության անցնելու շնորհիվ բեռնափոխադրումների և լոգիստիկայի հատվածում տնտեսված միջոցների ծավալը կկազմի ավելի քան 25 միլիարդ եվրո»: Պետական մարմինների, գործարար համայնքի և միջազգային կազմակերպությունների ներկայացուցիչները մանրամասն քննարկել են անօդաչու համակարգերի զարգացման, անթուղթ տեխնոլոգիաների ներդրման հարցեր, խելացի տրանսպորտային համակարգերի հնարավորությունները, միջազգային տրանսպորտային միջանցքներին ներկայացվող պահանջները, ինչպես նաև դրանց ներդրման տնտեսական և սոցիալական արդյունքը: Քննարկման արդյունքում Ռուստան Ջենալինովը նշել է, որ «տասը տարվա ընթացքում ԵԱՏՄ թվայնացման գործնական քեյսը բարեշրջվում է՝ շուկայի սուբյեկտների միջև տեղեկատվական փոխգործակցություն հաստատելուց և բիզնես գործընթացնելու տվյալների փոխանակումից՝ դեպի թվային էկոհամակարգերի, տեխնոլոգիական հարթակների ստեղծում, էլեկտրոնային փաստաթղթերի և արհեստական բանականության կիրառում տվյալների մեծ ծավալի վերլուծություն, հաշվառում կամ հաշվարկներ պահանջող պատվախնդիր նպատակների իրագործման համար»:

27 հունիսի 2025 Վալենտին Տատարիցկին մասնակցել է ԵԱՏՄ գործարար խորհրդի նախագահության նիստին Մինսկում 4-րդ Եվրասիական տնտեսական համաժողովի գործարար ծրագրի շրջանակներում Եվրասիական տնտեսական հանձնաժողովի տեխնիկական կարգավորման նախարար Վալենտին Տատարիցկին մասնակցել է Եվրասիական տնտեսական միության գործարար խորհրդի նախագահության նիստին: Ներկայացնելով Միության տեխնիկական կանոնակարգերում պարտադիր պահանջների սահմանման կատարելագործման մասին զեկույցը՝ ԵՏՀ նախարարն ընդգծել է. «Մենք շարունակում ենք խորացնել ինտեգրումը, աստիճանաբար ընդլայնելով Միության իրավունքը և դրանում ներառելով ստանդարտացման, չափումների միասնականության, հավատարմագրման, հսկողության պրակտիկայի ոլորտի էլ ավելի մեծ թվով իրավասություններ: Սա մանրակրկիտ աշխատանք է, որում մենք ամեն օր բախվում ենք տարբեր մարտահրավերների, դիրքորոշումների կտրականությանը և հակադրմանը, իրավաբանական նրբություններին»: Վալենտին Տատարիցկին լուսաբանել է եվրասիական կարգավորման նորույթները, որոնք ուղղված են արտադրանքի անվտանգության տեխնիկական պահանջների մշակման և արդիականացման մեխանիզմի կատարելագործմանը: Այս աշխատանքին գործարար շրջանակների մասնակցության հնարավորությունների ընդլայնումը և ԵԱՏՄ տեխկանոնակարգեր և դրանց ստանդարտների ցանկեր մշակելիս բոլոր շահագրգիռ կողմերի փոխգործակցության զգալի պարզեցումը կապահովվի նաև տեխնիկական կարգավորման ոլորտում թվային հարթակի գործարկման շնորհիվ: «Թվային տեխնիկական կարգավորում Միության շրջանակներում» նախագծի իրականացումն այժմ ամենաակտիվ փուլում է: Հատուկ շեշտ է դրվել ԵԱՏՄ տեխկանոնակարգերի նախագծերի մշակման և ճշգրտման առկա խնդրահարույց և առավել տարաձայն հատվածներին: Բացի այդ, Վալենտին Տատարիցկին ուշադրություն է հրավիրել ոչ անվտանգ արտադրանքի շրջանառությունից շուկայի պաշտպանության առանձին միջոցներին և Միությունում ԵԱՏՄ տեխկանոնակարգերի կատարման վերահսկողական և հսկողական միջոցառումներ անցկացնելու պրակտիկաների տարբերությանը: «Այսօր հսկողությունն իսկապես բացահայտում է «ենթականոնակարգային» արտադրանքի թույլտվության և շրջանառության բազմաթիվ խնդիրներ, այդ թվում՝ համապատասխանության գնահատման մարմինների բարեխղճության, համապատասխանության գնահատման «գորշ» փաստաթղթերի շրջանառման մասով և այլն, — նշել է Վալենտին Տատարիցկին: — Միության հարթակում ավարտին են հասցվում երկու կարգի շուրջ աշխատանքները, որոնք, հուսանք, կհամակարգեն երկրների մոտեցումները, այդ թվում՝ «գորշ» փաստաթղթերի հետ աշխատանքում: նկատի ունեմ Միության որևէ երկրի պետհսկողության միջոցների հիմնավորվածության մասին մեկ այլ երկրի դիմումների քննարկման կարգը և Պետհսկողության մարմինների կողմից միմյանց միջև, ինչպես նաև հավատարմագրման մարմինների հետ փոխգործակցության կարգը»:  

Ցուցադրել ավելին