Տառատեսակի չափը. A A A

Կայքի գույները. C C C

Գրանցում կայքը Մորացել

Ընտրեք ամսաթվերը

Ընտրեք ուղղությունը

Որոնման արդյունքները 7076

15 օգոստոսի 2025 Կառավարությունների ղեկավարները հավանություն են տվել ԵԱՏՄ-ում կլիմայական օրակարգի հարցերի կարգավորման մոտեցումների իրականացման պլանին Օգոստոսի 15-ին Չոլպոն Աթա քաղաքում կայացած Եվրասիական միջկառավարական խորհրդի նիստում Եվրասիական տնտեսական միության երկրների կառավարությունների ղեկավարները հավանություն են տվել ԵԱՏՄ շրջանակներում կլիմայական օրակարգի հարցերի կարգավորման մոտեցումների զարգացման միջոցառումների հնգամյա պլանին: Համաձայնեցված միջոցառումներն ուղղված են Մոտեցումներով նախատեսված մեխանիզմների իրագործմանը: Դրանց թվում է Եվրասիական տնտեսական հանձնաժողովի և անդամ պետությունների համատեղ աշխատանքը ԵԱՏՄ երկրների կլիմայական կարգավորմամբ Միության շրջանակներում առաջացող արգելքների կանխման ուղղությամբ, ինչպես նաև առևտրի հետ կապված կլիմայական միջոցների մասով միջազգային փոխգործակցությունը: Միջոցառումների հավանություն ստացած ցանկը կներառվի «Եվրասիական տնտեսական ուղի» մինչև 2030 թվականը և մինչև 2045 թվականն ընկած ժամանակահատվածում Միության շրջանակներում տնտեսական գործընթացների հետագա զարգացման մասին հռչակագրի իրականացման միջոցառումների ընդհանուր պլանում՝ կլիմայական օրակարգի ոլորտում անդամ պետությունների համագործակցության մասով:

15 օգոստոսի 2025 Միջկառավարական խորհուրդը կողմ է արտահայտվել ԵԱՏՄ երկրներում մասնագիտական որակավորումների փոխադարձ ճանաչմանն ուղղված Հանձնաժողովի աշխատանքին Եվրասիական միջկառավարական խորհուրդը որոշել է շարունակել աշխատանքը Եվրասիական տնտեսական միության աշխատաշուկայում առավել պահանջված մասնագիտություններին ներկայացվող որակավորման պահանջների մերձեցման ուղղությամբ: Այս որոշումն ուղղված է ԵԱՏՄ երկրներում քաղաքացիների աշխատանքի տեղավորման դյուրացմանը: Քննարկման արդյունք է դարձել Եվրասիական տնտեսական հանձնաժողովի կողմից Միության պետությունների իրավասու մարմինների հետ համատեղ նախապատրաստված զեկույցը: Փաստաթղթում ներկայացված է մանրամասն վերլուծությունը և որակավորման ազգային համակարգերի համադրությունը՝ ներառյալ դրանց առանցքային չափորոշիչները, մասնագիտական կրթության մակարդակները և աշխատանքային գործունեության իրականացմանը ներկայացվող պահանջները: Վերլուծության համար որպես գործնական օրինակ վերցվել են զոդողների որակավորմանը ներկայացվող պահանջները: Ըստ ԵՏՀ տնտեսության և ֆինանսական քաղաքականության նախարար Բախիթ Սուլթանովի՝ չնայած ԵԱՏՄ մասին պայմանագրի շրջանակներում կրթության մասին փաստաթղթերի գործող ճանաչմանը՝ մասնագիտական որակավորումների ճանաչման հարցում պահպանվում են տարբերություններ: «Կրթության մասին փաստաթղթերի ճանաչումը այն հիմքն է, որը մենք արդեն դրել ենք: Այժմ մեր խնդիրը հաջորդ հարկը կառուցելն է՝ այնպես անել, որ մասնագետի մասնագիտական որակավորումը, որը ստացվել է Միության որևէ երկրում, հասկանալի լինի ու ճանաչվի մեկ այլ երկրում: Շարունակելով այս աշխատանքը՝ մենք վերացնում ենք մեր քաղաքացիների համար առկա արգելքները և պայմաններ ստեղծում որակյալ կադրերի ազատ տեղաշարժի համար», - նշել է ԵՏՀ նախարարը:

15 օգոստոսի 2025 ԵՄԿԽ-ն հաստատել է ԵԱՏՄ շրջանակներում բժշկական արտադրատեսակների ընդհանուր շուկայի զարգացման հայեցակարգը Եվրասիական միջկառավարական խորհուրդը օգոստոսի 15-ին Չոլպոն Աթայում հաստատել է Եվրասիական տնտեսական միության շրջանակներում բժշկական արտադրատեսակների ընդհանուր շուկայի զարգացման հայեցակարգը: Փաստաթուղթը մշակվել է Եվրասիական տնտեսական հանձնաժողովի կողմից ԵԱՏՄ երկրների հետ համատեղ բժշկական արտադրատեսակների ընդհանուր շուկայի կայուն գործունեության ապահովման համար: Հայեցակարգն ուղղված է այս ոլորտում Միության իրավունքի հետագա կատարելագործմանը, Բժշկական արտադրատեսակների կարգավորողների միջազգային համաժողովի (IMDRF) փաստաթղթերին Հանձնաժողովի ակտերի ներդաշնակեցմանը, այդ թվում՝ արհեստական բանականության տեխնոլոգիաների օգտագործմամբ դրանց շրջանառության մասով: Փաստաթուղթի նպատակն է նաև օժանդակել բժշկական արտադրատեսակների գրանցման և շրջանառության ժամանակ թվային գործընթացների զարգացմանը Միության երկրներում բիզնես գործընթացների պարզեցման նպատակով: Հայեցակարգում արտացոլված են նշված շուկայի վիճակը, բժշկական արտադրատեսակների շրջանառության ոլորտում Միության իրավունքի ներդաշնակեցման և ինտեգրման ձեռք բերված մակարդակը, շրջանառության միասնական կանոնների մշակման մոտեցումները՝ հաշվի առնելով IMDRF հանձնարարականները: Ամրագրված են նաև ընդհանուր շուկայի աշխատանքի հիմնական արդյունքները և դրա կարգավորման հեռանկարային ուղղությունները: Հայեցակարգում հատուկ ուշադրություն է դարձվում այն նյութերի անվտանգության հարցերին, որոնցից պատրաստվում են բժշկական արտադրատեսակները, ինչպես նաև Միության իրավունքում բժշկական արտադրատեսակների շրջանառության ոլորտում ադդիտիվ տեխնոլոգիաների կիրառման և դրանց ստանդարտացման մոտեցումներ սահմանելու նպատակահարմարությանը: Բժշկական արտադրատեսակների գնահատման պահանջների ներդաշնակեցման ուղղությամբ անդամ պետությունների փոխգործակցությունը կշարունակվի: Նախատեսվում է ընդլայնել բժշկական արտադրատեսակների շրջանառության ոլորտում Միության իրավունքի վերաբերյալ խորհրդակցությունները շահագրգիռ երրորդ երկրների հետ:

15 օգոստոսի 2025 ԵԱՏՄ-ն ավելացնում է թվային տրանսպորտային փաստաթղթերի կիրառմամբ երկաթուղային բեռնափոխադրումների ծավալները Այս մասին Եվրասիական տնտեսական հանձնաժողովի առևտրի նախարար Անդրեյ Սլեպնևը հայտնել է Եվրասիական տնտեսական միության անդամ պետությունների կառավարությունների ղեկավարներին ԵԱՏՄ ներսում և երրորդ երկրների, մասնավորապես՝ Չինաստանի Ժողովրդական Հանրապետության հետ երկաթուղային բեռնափոխադրումների թվայնացման պլանի իրականացման մասին ամենամյա զեկույցի քննարկման արդյունքում: Ընդ որում, նա ընդգծել է, որ համապատասխան գործնական աշխատանքի արդյունք է ինչպես ընթացակարգերի պարզեցումը և բիզնեսի համար ծախսերի նվազեցումը, այնպես էլ ապրանքների տեղաշարժի առավելագույն արագացումը: «Մինչև 2024 թվականը ԵԱՏՄ անդամ պետությունները Բելառուսի Հանրապետության, Ղազախստանի Հանրապետության և Ռուսաստանի Դաշնության միջև երկաթուղային փոխադրումներում ապահովել են անցում թվային տրանսպորտային փաստաթղթերին», - նշել է Անդրեյ Սլեպնևը: Մասնավորապես, «Ռուսաստանի երկաթուղիներ» ԲԲԸ-ի և «Բելառուսի երկաթուղի» պետական միավորման միջև վերջին մի քանի տարում էլեկտրոնային տվյալների փոխանակման մակարդակը հասել է առնվազն 90%-ի, իսկ Ղազախստանի «ԿԵՈՒ» ԱԸ» ԲԸ-ի և Ռուսաստանի ու Ղրղզստանի երկաթուղային փոխադրողների միջև այս մակարդարը գերազանցել է 80%-ը: 2024 թվականի արդյունքներով՝ էլեկտրոնային փաստաթղթերով Ռուսաստանի Դաշնության փոխադրումների ծավալը կազմել է 90% Բելառուսի Հանրապետության և 79%՝ Ղազախստանի Հանրապետության հետ: Կարևոր է նաև նշել էլեկտրոնային ապրանքաուղեկից փաստաթղթերին անցնելու ուղղությամբ կատարվող աշխատանքը: Այսպես, «ՌԵՈՒ» ԲԲԸ-ի կողմից իրականացվել է էլեկտրոնային ստորագրությամբ ստորագրված էլեկտրոնային ապրանքաուղեկից փաստաթղթերը բեռնառաքից/էքսպեդիտորից իր տեղեկատվական համակարգում ընդունելու հնարավորությունը՝ դրանք տրամադրելով մաքսային մարմիններին և փոխանցելով «Բելառուսի երկաթուղի» պետական միավորմանը մաքսային ընթացակարգն ավարտելիս մաքսային գործառնությունները կատարելու համար: Այս տեխնոլոգիան կիրառվում է Ռուսաստանի և Բելառուսի միջև «Ինտերտրան» նախագծի շրջանակներում փոխադրումներ իրականացնելիս: «Բացի ԵԱՏՄ անդամ պետությունների միջև երկաթուղային բեռնափոխադրումների թվայնացումից, ակտիվ աշխատանք է իրականացվում ՉԺՀ-ի հետ: Ռուսաստանի և Չինաստանի երկաթուղային փոխադրողների միջև կոռեկտ էլեկտրոնային հաղորդագրությունների ծավալը 2024 թվականի արդյունքներով կազմել է 90%: Ղազախստանի և Չինաստանի երկաթուղիների միջև էլեկտրոնային փոխանակման ենթակա տվյալների լիարժեքության և որակի ցուցանիշը հասել է 80-90%-ի», - շարունակել է ԵՏՀ առևտրի նախարարը: Ըստ Անդրեյ Սլեպնևի՝ բեռնափոխադրումների թվայնացման մասով ՉԺՀ-ի հետ համագործակցության կարևոր իրադարձություն էր 2024 թվականի դեկտեմբերին Անդրսահմանային էլեկտրոնային փաստաթղթաշրջանառության իրականացման համար հավաստագրերի թողարկման ուղղությամբ Ռուսաստանի և Չինաստանի երկաթուղային փոխադրողների հավաստող կենտրոնների փոխգործակցության մասին համաձայնագիրը: Այս փաստաթուղթը կապահովի երկու երկրների երկաթուղիների միջև էլեկտրոնային ստորագրության կիրառումը: 2024 թվականի դեկտեմբերի վերջին թեստային անթուղթ փոխադրումներ են գործարկվել «ՌԵՈՒ» ԲԲԸ-ի և «Չինաստանի երկաթուղիներ» ՊԸ-ի միջև՝ արտահանման-ներմուծման հաղորդակցության Զաբայկալսկ - Մանչժուրիա սահմանային անցման միջոցով: 2025 թվականին նախատեսվում է էլեկտրոնային բեռնագրով ձևակերպվող փոխադրումների աշխարհագրության աստիճանական ընդլայնում:

15 օգոստոսի 2025 Միջկառավարական խորհուրդն արձանագրել է ներմուծման մաքսատուրքերից ստացվող մուտքերի աճ Եվրասիական տնտեսական միության երկրների կառավարությունների ղեկավարները քննարկել են Եվրասիական տնտեսական հանձնաժողովի ամենամյա հաշվետվությունը ԵԱՏՄ պետությունների բյուջեների միջև ներմուծման մաքսատուրթերի գումարների հաշվեգրման և բաշխման մասին: Համաձայն փաստաթղթի՝ 2024 թվականին Միության երկրների բյուջեները ստացել են 15.2 մլրդ դոլար, ինչը գրեթե 3%-ով ավելին է, քան 2023 թվականին: Այս ցուցանիշը առավելագույնն է 2015 թվականից ի վեր: Փաստաթղթում վերլուծվում են մաքսավճարների ծավալների վրա ազդեցություն ունեցող գործոնները՝ ներմուծվող մատակարարումների դինամիկան և առևտրային հոսքերի կառուցվածքը, Միասնական մաքսային սակագնի (ՄՄՍ) դրույքաչափերի փոփոխությունները, ինչպես նաև կիրառվող սակագնային արտոնությունները և ՄՄՍ-ից «բացառումները»: Ավելացվել է նոր բաժին ԵԱՏՄ երկրների բյուջեների միջև ներմուծման մաքսատուրքերի գումարների բաշխման նորմատիվների հաշվարկի մեթոդիկայի վրա աշխատանքի մասին: «Ներմուծման մաքսատուրքերի ծավալի աճը վկայում է դրական դինամիկայի մասին, և մեր խնդիրն է՝ ոչ միայն պահպանել ընթացիկ ցուցանիշները, այլև պայմաններ ստեղծել ինտեգրումից տնտեսական էֆեկտի հետագա մեծացման համար», - նշել է ԵՏՀ տնտեսության և ֆինանսական քաղաքականության նախաար Բախիթ Սուլթանովը: Միջկառավարական խորհուրդը ԵՏՀ կոլեգիային հանձնարարել է շարունակել աշխատանքն անդամ պետությունների բյուջեների միջև ներմուծման մաքսատուրքերի գումարների հաշվեգրման և բաշխման մշտադիտարկման վրա:

14 օգոստոսի 2025 Զբոսաշրջության ոլորտում ԵԱՏՄ երկրների համագործակցությունը կարող է դառնալ տնտեսական աճի կատալիզատոր Եվրասիական տնտեսական հանձնաժողովը պաշտոնական կայքում ձևավորում է թեմատիկ բաժին եվրասիական զբոսաշրջային երթուղիների մասին, որը տեղեկություններ կպարունակի Եվրասիական տնտեսական միության երկրների ավելի քան 400 զբոսաշրջային օբյեկտների մասին: Այս մասին օգոստոսի 14-ին Բոստերիում (Ղրղզստան) անցկացվող Ղրղզա-Ռուսական տնտեսական համաժողովի «Եվրասիական զբոսաշրջության թվային վեկտոր. ինտեգրման և աճի ռազմավարություններ» նստաշրջանի ընթացքում հայտնել է ԵՏՀ ձեռնարկատիրական գործունեության զարգացման վարչության փոխտնօրեն Լուսինե Բագրատունին:

14 օգոստոսի 2025 Վարոս Սիմոնյան. «Թվային ինքնիշխանությունը ԵԱՏՄ համատեքստում նշանակում է համատեղ ջանքերով թվային անկախության ստեղծում» Թվային զարգացման գերակայությունները և այդ ոլորտում համագործակցության խորացման միջոցները դարձել են օգոստոսի 14-ին Բոստերիում (Ղրղզստան) անցնող «Թվային ինքնիշխանությունը՝ որպես ԵԱՏՄ-ում կայուն աճի և տեխնոլոգիական կոոպերացիայի գործոն» 7-րդ Ղրղզա-Ռուսական տնտեսական համաժողովի լիագումար նիստի քննարկման առարկա: Նիստը վարել է ԵՏՀ ներքին շուկաների, տեղեկատվայնացման, տեղեկատվահաղորդակցական տեխնոլոգիաների նախարար Վարոս Սիմոնյանը:

13 օգոստոսի 2025 ԵԱՏՄ երկրների տնտեսությունների աճի տեմպերն առաջ են անցնում միջին համաշխարհային ցուցանիշներից Եվրասիական տնտեսական հանձնաժողովի մակրոտնտեսական քաղաքականության վարչության տնօրեն Ալեքսեյ Վեդևը Ղրղզստանի Հանրապետության Իսիկ Կուլի մարզի Բոստերի գյուղում՝ ԵԱՏՄ-ին Ղրղզստանի միանալու 10-ամյակին նվիրված խորհրդաժողովի ընթացքում խոսել է Եվրասիական տնտեսական միության շրջանակներում տնտեսական զարգացման դրական դինամիկայի և ինտեգրացիոն շփումների ամրապնդման մասին:

Ցուցադրել ավելին