Տառատեսակի չափը. A A A

Կայքի գույները. C C C

Գրանցում կայքը Մորացել

Ընտրեք ամսաթվերը

Ընտրեք ուղղությունը

Որոնման արդյունքները 7152

14 հոկտեմբերի 2025 Որոշվել է բնական այրվող գազի մասին ԵԱՏՄ տեխկանոնակարգի փոփոխությունները գործողության մեջ դնելու կարգը Եվրասիական տնտեսական հանձնաժողովը հոկտեմբերի 14-ի նիստում հաստատել է «Փոխադրման և (կամ) օգտագործման համար պատրաստված բնական այրվող գազի անվտանգության մասին» ԵԱՏՄ տեխնիկական կանոնակարգի փոփոխությունները գործողության մեջ դնելու կարգը: Տվյալ որոշումն ապահովում է սահուն անցում նոր պահանջների կատարմանը և գործողության ժամկետներ սահմանում բնական գազի՝ որպես այրվողի համապատասխանության գնահատման մասին փաստաթղթերի համար, որոնք համապատասխանում են մինչև տեխնիկական կանոնակարգի փոփոխությունների ուժի մեջ մտնելն ընդունված 046/2018 ԵԱՏՄ ՏԿ պահանջներին: Տեխնիկական կանոնակարգի պահանջներն ուժի մեջ են մտնում 2025 թվականի նոյեմբերի 22-ին:

14 հոկտեմբերի 2025 Եվրասիական լոգիստիկ օրը քննարկել են ԵԱՏՄ-ում լոգիստիկայի զարգացման վրա մաքսային կարգավորման ազդեցության հարցը Եվրասիական տնտեսական հանձնաժողովի մաքսային համագործակցության նախարար Ռուսլան Դավիդովը մասնակցել է Եվրոպական բիզնեսի ընկերակցության և Անդրեվրասիական փոխադրումների հարցերով համակարգող խորհրդի կողմից կազմակերպված «Եվրասիական լոգիստիկ օր» միջազգային համաժողովի լիագումար նստաշրջանին: Իր ելույթում նա մանրամասն անդրադարձել է եվրասիական լոգիստիկային աջակցելուն ուղղված Հանձնաժողովի մաքսային բլոկի աշխատանքներին: «Նավիգացիոն կապարակնիքների ներդրումը, Մաքսային տարանցման միասնական համակարգի մասին համաձայնագրի իրագործումը կարևոր քայլեր են, որոնք կնպաստեն Եվրասիական տնտեսական միության տարածքով փոխադրումների զարգացմանը», — ընդգծել է ԵՏՀ նախարարը: Ռուսլան Դավիդովը պատմել է, որ ԵԱՏՄ մաքսային օրենսգրքի փոփոխությունների՝ նախապատրաստման ավարտական փուլում գտնվող փաթեթն արտացոլում է գործարար համայնքի առաջարկները և պարունակում է նորմեր ԵԱՏՄ լոգիստիկ ներուժի բարձրացման համար: Դրանց թվում են կոնտեյներների հայտարարագրման վերացումը, էլեկտրոնային փաստաթղթերի կիրառման ընդլայնումը, կաբոտաժային և կոնտրեյլերային փոխադրումների կարգավորումը: ԵՏՀ մաքսային բլոկի ղեկավարը շեշտել է սահմանային ենթակառուցվածքների զարգացման կարևորությունը Միության տարանցիկ գրավչության զարգացման համար: Նա կարևորել է Հանձնաժողովի աշխատանքը անցակետերի սարքավորմանը և կահավորմանը ներկայացվող միասնական պարտադիր պահանջների ձևավորման ուղղությամբ: «Անցակետերում թվային տեխնոլոգիաների օգտագործումը թույլ է տալիս արագորեն մշակել մաքսային սահմանով տեղափոխվող ապրանքների և փոխադրամիջոցների մասին տեղեկատվությունը և էապես բարձրացնել նման տեղափոխման ծավալները հսկիչ ընթացակարգերի ժամականի կրճատման հաշվին, — նշել է ԵՏՀ նախարարը: — Հաշվի առնելով այս աշխատանքի կարևորությունը՝ ԵԱՏՄ մաքսային սահմանի անցակետերի համակարգված զարգացումը ներառվել է նաև ԵԱՏՄ շրջանակներում տնտեսական գործընթացների հետագա զարգացման մասին հռչակագրի իրականացման պլանում»:

14 հոկտեմբերի 2025 ԵԱՏՄ-ն հակագնագցման միջոցներ կկիրառի ՉԺՀ-ից ալյումինե փայլաթիթեղի և տիտանի երկօքսիդի նկատմամբ Կատարելով Եվրասիական միջկառավարական խորհրդի հանձնարարությունը՝ Եվրասիական տնտեսական հանձնաժողովի Կոլեգիան որոշումներ է ընդունել Չինաստանի Ժողովրդական Հանրապետությունից ալյումինե փայլաթիթեղի ւ տիտանի երկօքսիդի նկատմամբ հինգ տարի ժամկետով հակագնագցման տուրքեր կիրառելու մասին: Դրույքաչափերը սահմանվել են, համապատասխանաբար, 17.16-20.24% և 14.27-16.25% չափով: Ընդ որում, փայլաթիթեղի մասով հավանություն են ստացել Xiamen Xiashun Aluminium Foil Co., Ltd. արտադրողի կողմից ստանձնած գնային պարտավորությունները, որոնց կատարման դեպքում հակագնագցման տուրքը համապատասխան ապրանքների համար չի վճարվելու: Տիտանի երկօքսիդի մասով հավանություն են ստացել LB խմբի ընկերությունների (այն է՝ LB Group Co., Ltd., Henan Billions Advanced Material Co., Ltd., LB Lufeng Titanium Industry Co., Ltd., LB Sichuan Titanium Industry Co., Ltd. LB Xiangyang Titanium Industry Co., Ltd.), ինչպես նաև Shandong Dawn Titanium Industry Co., Ltd ընկերության գնային պարտավորությունները: Միաժամանակ սահմանվել են ներմուծման տարեկան ծավալներ, որոնց շրջանակներում հակագնագցման տուրքեր չեն գանձվելու: «Փայլաթիթեղի դեպքում նշված ծավալները Բելառուսի Հանրապետության համար պետք է կազմեն 385 տոննա, Ղազախստանի Հանրապետության համար՝ 500 տոննա 2025 թվականին, 1000 տոննա 2026 թվականին, 1300 տոննա 2027 թվականին, 1500 տոննա 2028 թվականին, 1650 տոննա 2029 թվականին, 1650 տոննա 2030 թվականին, Ղրղզստանի Հանրապետության համար՝ 325 տոննա: Տիտանի երկօքսիդի դեպքում խոսքը Հայաստանի Հանրապետության համար 250 տոննայի մասին է, Բելառուսի Հանրապետության համար՝ 4500 տոննայի, Ղազախստանի Հանրապետության համար՝ 5000 տոննայի և Ղրղզստանի Հանրապետության համար՝ 300 տոննայի մասին է», — հստակեցրել է ԵՏՀ առևտրի նախարար Անդրեյ Սլեպնյովը: Անդամ պետությունների համար սահմանված տարեկան ծավալների սահմաններում (գնային պարտավորությունների շրջանակներից դուրս) տվյալ ապրանքների ներմուծումն առանց հակագնագցման տուրքերի վճարման իրականացվելու է դրանց նպատակային նշանակության հաստատման առկայության դեպքում: Որոշումներն ուժի մեջ կմտնեն պաշտոնական հրապարակման օրվանից 30 օրացուցային օրը լրանալուց հետո։

13 հոկտեմբերի 2025 ԵՏՀ-ն արդիականացրել է ԵԱՏՄ-ի և նրա անդամ պետությունների նկատմամբ երրորդ կողմերի սահմանափակող միջոցների գրանցամատյանը Եվրասիական տնտեսական հանձնաժողովի կողմից իրականացվող կանոնավոր մշտադիտարկման արդյունքների հիման վրա «Առևտուր» պորտալում հրապարակվել է Եվրասիական տնտեսական միության և նրա անդամ պետությունների նկատմամբ երրորդ կողմերի սահմանափակող միջոցների գրանցամատյանի թարմացված տարբերակը: Ներկայումս գրանցամատյանում գրանցված է 280 միջոց, որոնք կարող են խոչընդոտ ներկայացնել ԵԱՏՄ արտաքին առևտրի համար: Վերջերս Մոնղոլիայի հետ ոլորտային համագործակցության զարգացման և փոխադարձ առևտրում խոչընդոտների հայտնաբերման հարցերով անցկացված սեմինարի շրջանակներում արձանագրվել է նոր առևտրային խոչընդոտ: Սահմանափակումը վերաբերում է Մոնղոլիայի կողմից ռազմավարական պարենամթերքի (ցորենի ալյուր, ցորենի սերմ, խմելու ջուր, կաթ և անասունի միս) ներմուծման թույլտվությունների տրամադրման հետ կապված կարգի կիրառմանը: Ընդ որում, Ուզբեկստանը մասամբ վերացրել է ակցիզներին վերաբերող վարչական միջոցը: Ներմուծվող սպիտակ շաքարի համար սահմանված ակցիզային հարկը վերացվել է 2025 թվականի հոկտեմբերի 1-ից: Նշենք, որ Հանձնաժողովը կանոնավոր երկխոսություն է վարում Ուզբեկստանի Հանրապետության հետ Եվրասիական տնտեսական հանձնաժողովի և Ուզբեկստանի Հանրապետության կառավարության 2024-2026 թվականների համատեղ միջոցառումների պլանի շրջանակներում սահմանափակող միջոցների վերացման վերաբերյալ: Հանձնաժողովը շարունակում է աշխատանքը երրորդ երկրների հետ առևտրում սահմանափակող միջոցների հայտնաբերման և վերացման ուղղությամբ: Սահմանափակող միջոցի մասին հնարավոր է հայտնել Եվրասիական տնտեսական հանձնաժողովի պորտալում առկա հատուկ ձևի միջոցով

13 հոկտեմբերի 2025 Արզիբեկ Կոժոշև. «ԵԱՏՄ-ն միասնական տրանսպորտալոգիստիկ տարածք է ձևավորում գլոբալ մարտահրավերների հաղթահարման համար» Այս մասին հոկտեմբերի 13-ին հայտնել է Եվրասիական տնտեսական հանձնաժողովի էներգետիկայի և ենթակառուցվածքի նախարար Արզիբեկ Կոժոշևը Մոսկվայում ընթացող «Եվրասիական լոգիստիկ օր» միջազգային համաժողովի լիագումար նստաշրջանի շրջանակներում: Միջոցառման կազմակերպիչներն էին Եվրոպական բիզնեսի ընկերակցությունը (ԵԲԸ) և Անդրեվրասիական փոխադրումների հարցերով միջազգային համակարգող խորհուրդը (ԱՓՀԽ): Արզիբեկ Կոժոշևը նշել է, որ ԵԱՏՄ-ն կենտրոնացած է երեք գերակայության վրա՝ ապրանքների անխոչընդոտ տեղափոխման ապահովում, տրանսպորտային համակարգի արդյունավետության և կապակցման ունակության բարձրացում, տրանսպորտային ծառայությունների ընդհանուր շուկայի ստեղծում: Այս նպատակներն իրականացվում են միջազգային համակարգման, ենթակառուցվածքային նախագծերի և թվային տեխնոլոգիաների ներդրման շնորհիվ, որոնք վերացնում են խոչընդոտները և նոր հնարավորություններ բացում գլոբալ լոգիստիկայի համար: Տրանսպորտի թվայնացումը, մասնավորապես՝ էլեկտրոնային բեռնագրերի, նավիգացիոն կապարակնիքների ներդրման և Խելացի տրանսպորտային համակարգերի հայեցակարգի իրականացման հաշվին, էապես բարձրացնում են միջազգային լոգիստիկայի արդյունավետությունը՝ այն դարձնելով անխափան և նվազեցնելով վարչական խոչընդոտները: Ի վերջո այս ամենը դրական է անդրադառնում երկրների միջև ապրանքաշրջանառության աճի վրա, նշել է Արզիբեկ Կոժոշևը: Ընդ որում, ԵԱՏՄ-ն ակտիվ աշխատում է գլոբալ նախաձեռնությունների հետ փոխգործակցության ուղղությամբ՝ ներառյալ «Մեկ գոտի, մեկ ճանապարհ», Հյուսիսային ծովային ուղի և Անդրկասպյան երթուղի նախագծերը: Արագանում է Բալտիկայից՝ Կասպից ծովի միջոցով մինչև Հնդկական օվկիանոս «Հյուսիս-Հարավ» միջանցքի զարգացումը, իսկ Աստրախանի և Ակտաուի նավահանգիստների արդիականացումը և նոր երկաթուղիներն արդեն դրական են անդրադառնում բեռնահոսքի աճի վրա: «ԵԱՏՄ երկրների տրանսպորտային համակարգն ակտիվ փոխակերպման փուլում է, բախվում է աշխարհաքաղաքականության, տնտեսության և տեխնոլոգիաների մարտահրավերներին: Սակայն հեռանկարները լավատեսական են մնում. համատեղ նախաձեռնությունների, թվայնացման և միջազգային համագործակցության շնորհիվ տարածաշրջանը կարող է դառնալ համաշխարհային տրանսպորտային համակարգի առանցքային հանգույցը», — եզրափակել է Արզիբեկ Կոժոշևը:

10 հոկտեմբերի 2025 Բակիտժան Սագինտաևը շնորհավորել է Միգել Դիաս-Կանել Բերմուդեսին Կուբայի Հանրապետության Անկախության օրվա առթիվ Եվրասիական տնտեսական հանձնաժողովի Կոլեգիայի նախագահ Բակիտժան Սագինտաևը շնորհավորել է Կուբայի Հանրապետության նախագահ, Եվրասիական տնտեսական միությանը կից դիտորդ պետության ղեկավար Միգել Դիաս Կանել Բերմուդեսին և Կուբայի ամբողջ ժողովրդին Անկախության օրվա կապակցությամբ: «ԵԱՏՄ երկրների և Կուբայի Հանրապետության միջև համագործակցությունն ունի ամուր հիմք և մեծ ներուժ, անշեղորեն ամրապնդվելով ի շահ մեր ժողովուրդների», — ասված է շնորհավորական նամակում: ԵՏՀ-ի և անձամբ իր անունից Բակիտժան Սագինտաևը Կուբային մաղթել է բարեկեցություն և բարգավաճում:

10 հոկտեմբերի 2025 Մաքսիմ Երմոլովիչը բանակցել է Ուզբեկստանի Մրցակցության զարգացման և սպառողների իրավունքների պաշտպանության կոմիտեի ղեկավար Հալիլիլո Տուրախուժաևի հետ Հոկտեմբերի 9-ին Տաշքենդում Եվրասիական տնտեսական հանձնաժողովի մրցակցության և հակամենաշնորհային կարգավորման նախարար Մաքսիմ Երմոլովիչն աշխատանքային հանդիպում է ունեցել Ուզբեկստանի Հանրապետության Մրցակցության պաշտպանության և սպառողների իրավունքների պաշտպանության կոմիտեի նախագահ Հալիլիլո Տուրախուժաևի հետ: Կողմերը քննարկել են մրցակցության ոլորտում փոխգործակցության առանցքային հարցեր: Մասնավորապես, քննարկվել են համատեղ խորհրդակցությունների, համաժողովների և սեմինարների անցկացման, փորձի, վերլուծական նյութերի և թվային հարթակների կարգավորման լավագույն պրակտիկաների փոխանակման հեռանկարները: Հանդիպման արդյունքում պայմանավորվածություն է ձեռք բերվել փորձագիտական փոխգործակցության ակտիվացման վերաբերյալ: 2020 թվականի դեկտեմբերին Եվրասիական տնտեսական բարձրագույն խորհուրդը Ուղբեկստանի Հանրապետությանը տվել է Եվրասիական տնտեսական միությանը կից անդամ պետության կարգավիճակ:

10 հոկտեմբերի 2025 Դանիյար Իմանալիև. «Ժամանակակից տեխնոլոգիաները թույլ կտան բարձրացնել ԵԱՏՄ վիճակագրության որակը և մատչելիությունը» ԵՏՀ կենտրոնակայանում Եվրասիական տնտեսական հանձնաժողովի ինտեգրման և մակրոտնտեսության նախարար Դանիյար Իմանալիևի նախագահությամբ կայացած պրոֆիլային Խորհրդատվական կոմիտեի նիստում քննարկվել են Եվրասիական տնտեսական միության շրջանակներում վիճակագրության ոլորտի առանցքային փաստաթղթերը: Դրանց թվում են Եվրասիական տնտեսական հանձնաժողովի վիճակագրական աշխատանքների 2026 թվականի ծրագիրը, Եվրասիական տնտեսական միության վիճակագրության ոլորտում ինտեգրման զարգացման 2026-2030 թվականների ծրագիրը և ԵԱՏՄ վիճակագրության ոլորտում ինտեգրման զարգացման 2026 թվականի միջոցառումների պլանը: Հավանություն է ստացել Հանձնաժողովին անդամ պետությունների լիազոր մարմինների կողմից տրամադրվող Վիճակագրական ցուցանիշների ցանկը և դրանց տրամադրման ձևերը, որոնք օգտագործվելու են՝ սկսած 2026 թվականից: Տեղեկատվություն է ներկայացվել ԵԱՏՄ-ում վիճակագրական տեղեկատվության ձևավորման համար տեղեկատվության նոր աղբյուրների, մասնավորապես, վարչական տվյալների օգտագործման մասին: ԵՏՀ նախարարի խոսքով՝ վիճակագրական դիտարկումների նոր գործիքների ներդրումը կնպաստի Եվրասիական տնտեսական միության շրջանակներում արդյունավետ կառավարչական որոշումների ընդունմանը: «Ժամանակակից տեխնոլոգիաները թույլ են տալիս էապես ընդլայնել հասանելի տեղեկատվության շրջանակը և բարձրացնել վիճակագրության որակն այլ աղբյուրների հաշվին ինչպես ազգային, այնպես էլ ԵԱՏՄ-ի մակարդակով, — նշել է ԵՏՀ նախարարը: — Հանձնաժողովն ակտիվորեն փոխգործակցում է միջազգային կազմակերպությունների և ինտեգրացիոն միավորումների հետ ԿԶՆ-ների և տվյալների, այդ թվում՝ մեծ տվյալների նոր աղբյուրների օգտագործման հարցերով»: Քննարկվել են ԵԱՏՄ երկրների միջև ապրանքների փոխադարձ առևտրի 2024 թվականի վիճակագրության «հայելային» տվյալների համադրման արդյունքները, ինչպես նաև ձևավորվել է 2026 թվականին տվյալների համադրման նպատակով փորձագետների երկկողմ հանդիպումների անցկացման ժամանակացույց։ Էլեկտրոնային առևտրի ապրանքների արտահանման (ներմուծման) ծավալների մասին պաշտոնական տեղեկատվության ձևավորման համար հավանություն է տրվել ԵԱՏՄ պետությունների ապրանքների արտաքին առևտրի մաքսային վիճակագրության վարման մեթոդաբանությունում կատարվող փոփոխություններին: Հավանության են արժանացել Ֆինանսական վիճակագրության ցուցանիշների ձևավորման մեթոդաբանությունների նախագծերը, ինչպես նաև լիազոր մարմինների կողմից ԵԱՏՄ բաց տվյալների համար SDMX եվրասիական ռեգիստրն օգտագործելիս միջազգային ստանդարտի կիրառման հանձնարարականները:

Ցուցադրել ավելին