Տառատեսակի չափը. A A A

Կայքի գույները. C C C

Գրանցում կայքը Մորացել

Ընտրեք ամսաթվերը

Ընտրեք ուղղությունը

Որոնման արդյունքները 7170

10 հոկտեմբերի 2025 Դանիյար Իմանալիև. «Ժամանակակից տեխնոլոգիաները թույլ կտան բարձրացնել ԵԱՏՄ վիճակագրության որակը և մատչելիությունը» ԵՏՀ կենտրոնակայանում Եվրասիական տնտեսական հանձնաժողովի ինտեգրման և մակրոտնտեսության նախարար Դանիյար Իմանալիևի նախագահությամբ կայացած պրոֆիլային Խորհրդատվական կոմիտեի նիստում քննարկվել են Եվրասիական տնտեսական միության շրջանակներում վիճակագրության ոլորտի առանցքային փաստաթղթերը: Դրանց թվում են Եվրասիական տնտեսական հանձնաժողովի վիճակագրական աշխատանքների 2026 թվականի ծրագիրը, Եվրասիական տնտեսական միության վիճակագրության ոլորտում ինտեգրման զարգացման 2026-2030 թվականների ծրագիրը և ԵԱՏՄ վիճակագրության ոլորտում ինտեգրման զարգացման 2026 թվականի միջոցառումների պլանը: Հավանություն է ստացել Հանձնաժողովին անդամ պետությունների լիազոր մարմինների կողմից տրամադրվող Վիճակագրական ցուցանիշների ցանկը և դրանց տրամադրման ձևերը, որոնք օգտագործվելու են՝ սկսած 2026 թվականից: Տեղեկատվություն է ներկայացվել ԵԱՏՄ-ում վիճակագրական տեղեկատվության ձևավորման համար տեղեկատվության նոր աղբյուրների, մասնավորապես, վարչական տվյալների օգտագործման մասին: ԵՏՀ նախարարի խոսքով՝ վիճակագրական դիտարկումների նոր գործիքների ներդրումը կնպաստի Եվրասիական տնտեսական միության շրջանակներում արդյունավետ կառավարչական որոշումների ընդունմանը: «Ժամանակակից տեխնոլոգիաները թույլ են տալիս էապես ընդլայնել հասանելի տեղեկատվության շրջանակը և բարձրացնել վիճակագրության որակն այլ աղբյուրների հաշվին ինչպես ազգային, այնպես էլ ԵԱՏՄ-ի մակարդակով, — նշել է ԵՏՀ նախարարը: — Հանձնաժողովն ակտիվորեն փոխգործակցում է միջազգային կազմակերպությունների և ինտեգրացիոն միավորումների հետ ԿԶՆ-ների և տվյալների, այդ թվում՝ մեծ տվյալների նոր աղբյուրների օգտագործման հարցերով»: Քննարկվել են ԵԱՏՄ երկրների միջև ապրանքների փոխադարձ առևտրի 2024 թվականի վիճակագրության «հայելային» տվյալների համադրման արդյունքները, ինչպես նաև ձևավորվել է 2026 թվականին տվյալների համադրման նպատակով փորձագետների երկկողմ հանդիպումների անցկացման ժամանակացույց։ Էլեկտրոնային առևտրի ապրանքների արտահանման (ներմուծման) ծավալների մասին պաշտոնական տեղեկատվության ձևավորման համար հավանություն է տրվել ԵԱՏՄ պետությունների ապրանքների արտաքին առևտրի մաքսային վիճակագրության վարման մեթոդաբանությունում կատարվող փոփոխություններին: Հավանության են արժանացել Ֆինանսական վիճակագրության ցուցանիշների ձևավորման մեթոդաբանությունների նախագծերը, ինչպես նաև լիազոր մարմինների կողմից ԵԱՏՄ բաց տվյալների համար SDMX եվրասիական ռեգիստրն օգտագործելիս միջազգային ստանդարտի կիրառման հանձնարարականները:

10 հոկտեմբերի 2025 Մաքսիմ Երմոլովիչ. «ԵՏՀ-ն կարգավորում է թվային շուկաները՝ հաշվի առնելով մրցակցության ընդհանուր կանոնները» Հոկտեմբերի 10-ին Տաշքենդում Եվրասիական տնտեսական հանձնաժողովի մրցակցության և հակամենաշնորհային կարգավորման նախարար Մաքսիմ Երմոլովիչը խոսել է թվային շուկաների կարգավորման մասին՝ հաշվի առնելով Եվրասիական տնտեսական միության շրջանակներում մրցակցության ընդհանուր կանոնները, ներառյալ իրավակիրառ պրակտիկան և հիմնական քեյսերը: Ելույթ ունենալով «Հարթակային տնտեսությունը Ուզբեկստանի Հանրապետությունում. մրցակցության մասին օրենսդրությունը և թվային հարթակների շուկայական իշխանությունը» միջազգային սեմինարի պանելային նստաշրջանում, ԵՏՀ նախարարը հիմնական ուշադրություն դարձրել է Հանձնաժողովի ընթացիկ աշխատանքի ուղղություններին: Մասնավորապես, նա հայտնել է թվային շուկաների և թվային (էլեկտրոնային) հարթակների գործունեության հետազոտման, այս ոլորտում հատվածային հետազոտությունների իրականացման, Էլեկտրոնային առևտրի մասին համաձայնագրի նախագծի նախապատրաստման ընթացքում կիրառվող ընդհանուր մոտեցումների ձևավորման մասին: «Այսօր ԵԱՏՄ իրավունքը գործիքների բավարար ցանկ է տրամադրում Հանձնաժողովի կողմից թվային շուկաներում մրցակցության ընդհանուր կանոնների պահպանման նկատմամբ վերահսկողություն իրականացնելու համար: Մրցակցության վիճակի գնահատման մեթոդիկան թույլ է տալիս հաշվի առնել նման շուկաների համար բնորոշ գործոնները», — ընդգծել է Մաքսիմ Երմոլովիչը: Միջոցառման մասնակիցները թեմատիկ պանելների ձևաչափով քննարկել են թվային շուկաներում առկա մրցակցության մասին լավագույն օրենսդրական պրակտիկաները, մրցակցության և շուկայական իշխանության վրա արհեստական բանականության աճող ազդեցությունը: Կայացել են փորձագիտական քննարկումներ գլոբալ թվային տնտեսության պայմաններում մրցակցային օրենսդրության կիրառման ռազմավարության և այս ոլորտի հետազոտությունների հետ կապված ընթացիկ իրավիճակի մասին: Միջոցառումը կազմակերպվել է Ուզբեկստանի Հանրապետության մրցակցության զարգացման և սպառողների իրավունքների պաշտպանության կոմիտեի կողմից՝ ԲՐԻԿՍ-ի մրցակցային իրավունքի և քաղաքականության կենտրոնի հետ համատեղ, և համախմբել է Եվրասիական տնտեսական միության երկրների, Բրազիլիայի, Գերմանիայի, Հնդկաստանի, Իտալիայի, Չինաստանի մրցակցության ոլորտի առաջատար փորձագետների, ինչպես նաև մրցակցային գերատեսչությունների ներկայացուցիչների:

10 հոկտեմբերի 2025 Մաքսիմ Երմոլովիչը բանակցել է Ուզբեկստանի Մրցակցության զարգացման և սպառողների իրավունքների պաշտպանության կոմիտեի ղեկավար Հալիլիլո Տուրախուժաևի հետ Հոկտեմբերի 9-ին Տաշքենդում Եվրասիական տնտեսական հանձնաժողովի մրցակցության և հակամենաշնորհային կարգավորման նախարար Մաքսիմ Երմոլովիչն աշխատանքային հանդիպում է ունեցել Ուզբեկստանի Հանրապետության Մրցակցության պաշտպանության և սպառողների իրավունքների պաշտպանության կոմիտեի նախագահ Հալիլիլո Տուրախուժաևի հետ: Կողմերը քննարկել են մրցակցության ոլորտում փոխգործակցության առանցքային հարցեր: Մասնավորապես, քննարկվել են համատեղ խորհրդակցությունների, համաժողովների և սեմինարների անցկացման, փորձի, վերլուծական նյութերի և թվային հարթակների կարգավորման լավագույն պրակտիկաների փոխանակման հեռանկարները: Հանդիպման արդյունքում պայմանավորվածություն է ձեռք բերվել փորձագիտական փոխգործակցության ակտիվացման վերաբերյալ: 2020 թվականի դեկտեմբերին Եվրասիական տնտեսական բարձրագույն խորհուրդը Ուղբեկստանի Հանրապետությանը տվել է Եվրասիական տնտեսական միությանը կից անդամ պետության կարգավիճակ:

09 հոկտեմբերի 2025 ԵՏՀ Կոլեգիան հավանություն է տվել ԵԱՏՄ միջազգային գործունեության 2026 թվականի հիմնական ուղղությունների նախագծին Եվրասիական տնտեսական հանձնաժողովի Կոլեգիան հավանություն է տվել Եվրասիական տնտեսական միության միջազգային գործունեության 2026 թվականի հիմնական ուղղությունների նախագծին: Փաստաթուղթը սահմանում է Միության արտաքին փոխգործակցության առաջիկա տարվա գերակայությունները, վեկտորները և գործնական խնդիրները: Միջազգային գործունեության արդիական գերակայությունները և նոր դրայվերներն ուղղված են «Եվրասիական տնտեսական ուղի» Եվրասիական տնտեսական միության շրջանակներում մինչև 2030 թվականը և մինչև 2045 թվականն ընկած ժամանակահատվածում տնտեսական գործընթացների հետագա զարգացման մասին հռչակագրում նշված ռազմավարական նպատակի՝ ԵԱՏՄ-ի՝ որպես միջազգային ասպարեզում տնտեսական ձգողականության բևեռի գործունեության ապահովման իրականացմանը: Նախագծում արտացոլված է Միության միջազգային օրակարգի ամբողջ շրջանակը, որը տարեց տարի հետևողականորեն ընդլայնվում է: Հիմնական ուշադրությունը դարձվել է ինտեգրացիոն միավորումների և միջազգային կազմակերպությունների հետ համագործակցության ընդլայնմանը, երրորդ երկրների հետ երկխոսության զարգացմանը, ինչպես նաև գլոբալ տնտեսական հարթակներում ԵԱՏՄ անդամ պետությունների շահերի առաջմղմանը: ԵԱՏՄ միջազգային գործունեության 2026 թվականի հիմնական ուղղությունները կհաստատվեն Եվրասիական տնտեսական բարձրագույն խորհրդի կողմից:

09 հոկտեմբերի 2025 Նաիրա Կարապետյան. «ԵԱՏՄ-ում տոհմային անասնաբուծության զարգացման ջանքերի միավորումը կբարձրացնի ագրարային հատվածի մրցունակությունը» Հոկտեմբերի 9-ին Մոսկվայում՝ Ռուսաստանի «Ոսկե աշուն 2025» ագրոարդյունաբերական ցուցահանդեսի գործարար ծրագրի շրջանակներում կայացել է Եվրասիական տնտեսական միությունում տոհմային անասնաբուծության հարցերով համակարգող խորհրդակցությունը Եվրասիական տնտեսական հանձնաժողովի ագրոարդյունաբերական քաղաքականության վարչության տնօրեն Նաիրա Կարապետյանի նախագահությամբ: Քննարկման առանցքային թեմաներն էին տոհմային ռեսուրսների շուկայի զարգացման պլանները, տոհմային գործի համակարգի ձևավորման մեխանիզմներն ու գործիքները, ԵԱՏՄ շրջանակներում տոհմային անասնաբուծությունում թվայնացման զարգացումը: Նաիրա Կարապետյանը խոսել է տոհմային անասնաբուծության մրցունակության՝ որպես ագրոարդյունաբերական համալիրի զարգացման պարտադիր պայմանի մասին: «ԵԱՏՄ շրջանակներում գյուղատնտեսական կենդանիների տոհմային արտադրանքի շուկայահանմանը, ներմուծմանը, արտահանմանը և տեղափոխմանը ներկայացվող պահանջների միասնականացման հետագա քայլերը, տոհմային ռեսուրսների մասին տվյալների ընդհանուր շտեմարանների և մատակարարումների կայուն սխեմաների ստեղծման հետ մեկտեղ, թույլ կտան բարենպաստ պայմաններ ստեղծել Միության պետություններում տոհմային արտադրանքի փոխադարձ առևտրի ավելացման և անասնաբուծության զարգացման համար», — նշել է Նաիրա Կարապետյանը: ԵՏՀ ագրոարդյունաբերական քաղաքականության վարչության փոխտնօրեն Սաուլե Մոլդաբաևան «Նորարարությունների իրագործում. ինչպես է զարգանում կանաչ արտադրանքի հատվածը ժամանակակից փուլում» պանելային քննարկման ընթացքում միջոցառման մասնակիցներին տեղեկացրել է կանաչ տեխնոլոգիաների կիրառման և ԱԱՀ օրգանական արտադրանքի շրջանառության վերաբերյալ Միության իրավունքի ձևավորման ոլորտում անդամ պետությունների ունեցած փորձի մասին: Խորհրդակցությանը մասնակցել են ԵԱՏՄ երկրների տոհմային անասնաբուծության ոլորտում լիազորված կառավարման մարմինների, գիտահետազոտական կազմակերպությունների, լաբորատորիաների և անդամ պետությունների տոհմային անասնաբուծության այլ սուբյեկտների ղեկավարներ և ներկայացուցիչներ:

08 հոկտեմբերի 2025 Գոհար Բարսեղյանը մասնակցել է «Ոսկե աշուն 2025» ցուցահանդեսի միջոցառումներին Եվրասիական տնտեսական հանձնաժողովի արդյունաբերության և ԱԱՀ նախարար Գոհար Բարսեղյանը հոկտեմբերի 8-ին մասնակցել է Ռուսաստանի «Ոսկե աշուն 2025» ագրոարդյունաբերական ցուցահանդեսի բացման արարողությանը և լիագումար նստաշրջանին: Միջոցառման ընթացքում քննարկվել են գյուղարտադրության արագացված աճի նպատակով ագրարային շուկան թվային մոդելի վերափոխելու գործիքները, փոքր, միջին և խոշոր բիզնեսի ձեռնարկություններում նոր տեխնոլոգիաների ներդրման մեխանիզմները: Նշվել է, որ Հանձնաժողովը ձեռնարկատերերին հնարավորություններ է ընձեռում, այդ թվում՝ ֆինանսական հնարավորություններ, տարածաշրջանային տնտեսությանը ակտիվորեն մասնակելու համար: Ցուցահանդեսի գործարար ծրագրի շրջանակներում Գոհար Բարսեղյանը ծանոթացել է ԱԱՀ ընկերությունների առաջադեմ մշակումներին: «Ոսկե աշուն 2025» միջոցառումներին մասնակցել են Ռուսաստանի Դաշնության կառավարության նախագահ Միխայիլ Միշուստինը, ՌԴ գյուղատնտեսության նախարար Օքսանա Լուտը, ՌԴ թվային զարգացման նախարար Մաքսիմ Շադաևը, ոլորտային և հասարակական կազմակերպությունների, ընկերակցությունների, միությունների, ագրոարդյունաբերական ոլորտի ձեռնարկությունների ղեկավարներ:

08 հոկտեմբերի 2025 ԵԱՏՄ երկրների զբոսաշրջային հատվածը աճի մեծ ներուժ ունի Եվրասիական տնտեսական միության շրջանակներում տուրիզմի զարգացման հայեցակարգը անդամ պետությունների ղեկավարները կարող են ստորագրել մինչև 2025 թվականի վերջ: Այս մասին Աստանայում՝ Kazakhstan Travel Forum Սայահաթ 2025 համաժողովում հայտարարել Եվրասիական տնտեսական հանձնաժողովի ձեռնարկատիրական գործունեության զարգացման վարչության փոխտնօրեն Լուսինե Բագրատունին: «Սա ռազմավարական փաստաթուղթ է, որը կսահմանի ոլորտի զարգացման առանցքային ուղղությունները և Միությունում ներքին զբոսաշրջության խթանման միջոցները», — ընդգծել է Լուսինե Բագրատունին: ԵՏՀ ներկայացուցիչը խոսել է Հանձնաժողովի հարթակում զբոսաշրջության ոլորտի՝ Միության երկրների հետ համատեղ նախաձեռնությունների իրականացման, եվրասիական զբոսաշրջային երթուղիների մշակման և զարգացման, ինչպես նաև ԵԱՏՄ տեղեկատվական պորտալում զբոսաշրջության մասին թեմատիկ բաժնի ստեղծման մասին: Համաժողովի մասնակիցները միակարծիք էին, որ Եվրասիական տնտեսական միության պետությունների զբոսաշրջային ոլորտն ունի աճի զգալի ներուժ: Kazakhstan Travel Forum Սայահաթ 2025 համաժողովին մասնակցել են խոշորագույն զբոսաշրջային օպերատորներ, պետական մարմինների, միջազգային զբոսաշրջային ընկերակցությունների ներկայացուցիչներ և առաջատար ոլորտային փորձագետներ:

08 հոկտեմբերի 2025 ԵՏՀ-ն և ԱՍԵԱՆ-ի փորձագետները քննարկել են մրցակցության հարցեր ԵՏՀ մրցակցային քաղաքականության և պետգնումների ոլորտի քաղաքականության վարչության փոխտնօրեն Արմինե Հակոբյանը ԱՍԵԱՆ-ի մրցակցության հարցերով փորձագիտական խմբի 35-րդ նիստի հատուկ նստաշրջանում խոսել է մրցակցության հարցերով Եվրասիական տնտեսական հանձնաժողովի և Հարավարևելյան Ասիայի պետությունների ընկերակցության համագործակցության որոշ արդյունքների և փոխգործակցության հեռանկարների մասին: «Մրցակցության հարցերով ԵՏՀ-Ասեան հատուկ նստաշրջանների անցկացումն արդեն լավ ավանդույթ է դարձել: Դա մեզ թույլ է տալիս հետևողական երկխոսություն վարել և զարգացնել համագործակցությունը գործնական հարթությունում», — նշել է Արմինե Հակոբյանը: Նստաշրջանի ընթացքում քննարկվել են Եվրասիական տնտեսական միությունում և ԱՍԵԱՆ-ի երկրներում մրցակցային քաղաքականությանը և իրավակիրառությանը նվիրված սեմինարի արդյունքները, որն անցկացվել է Հանձնաժողովի կողմից ընթացիկ տարվա հուլիսին: Նշվել են ԵՏՀ-ի և ԱՍԵԱՆ-ի գործունեության այն ուղղությունները, որոնք, ըստ սեմինարի արդյունքների, հատուկ հետաքրքրություն են առաջացրել: Դրանք, մասնավորապես, վերաբերում են ԱՍԵԱՆ-ի ազգային մրցակցային մարմինների փոխգործակցության հաջող ձևաչափերին, դրանց գործունեության գնահատման մեթոդաբանությանը, իրավակիրառության մի շարք առանձնահատկություններին: ԱՍԵԱՆ-ին հետաքրքրել են մրցակցության հարցերով տարածաշրջանային կազմակերպությունների՝ Հանձնաժողովի կողմից ամեն տարի անցկացվող հանդիպումների արդյունքները, ինչպես նաև այս ոլորտում ԵՏՀ-ի լիազորությունների ձևավորման փորձը: «Չնայած ԵԱՏՄ-ում և ԱՍԵԱՆ-ում ինտեգրման տարբեր մակարդակներին, ԵՏՀ-ի և ԱՍԵԱՆ-ի մրցակցության ոլորտի լիազորությունների և գործառույթների տարբերություններին, երկու ինտեգրացիոն միավորումների նպատակը մեկն է՝ բարեխիղճ մրցակցության համար պայմանների ապահովումը, — ընդգծել է Արմինե Հակոբյանը: — Այս նպատակի իրականացման համար մենք պատրաստ ենք ուսումնասիրել միմյանց լավագույն փորձը և ներդնել այն մեր աշխատանքում»: Նիստի մասնակիցները կողմ են արտահայտվել քննարկումները սեմինարների և խորհրդակցությունների ձևաչափով, ինչպես նաև երկխոսությանը մրցակցության ոլորտի ինտեգրացիոն տարածաշրջանային կազմակերպությունների մասնակցության միջոցով շարունակելու մասին Հանձնաժողովի առաջարկին: Միջոցառմանը մասնակցել են ԱՍԵԱՆ պետությունների մրցակցային մարմինների, ինչպես նաև ԱՍԵԱՆ քարտուղարության ներկայացուցիչներ:  

Ցուցադրել ավելին