Қаріп өлшемі: A A A

Сайттың түсі: C C C

Сайттын кадимки версиясы

Күндөрдү тандаӊыз

Багыт тандаңыз

Издөөнүн жыйынтыктары: 6150

28 апрелиндеги 2025 Максим Ермолович: "Египеттин атаандаштык ведомствосу көп кырдуу тажрыйбасы бар, компетенттүү жана кесипкөй күчтүү жөнгө салуучуга айланды" 28-апрелде Каирде (Египет) Евразия экономикалык комиссиясынын атаандаштык жана монополияга каршы жөнгө салуу боюнча министри Максим Ермолович "Египеттин атаандаштык ведомствосуна 20 жыл: этаптар жана келечектеги перспективалар" конференциясына катышты. Египеттин Премьер-министринин колдоосу астында өткөн иш-чара атаандаштык ведомстволорунун, эл аралык уюмдардын лидерлерин, мамлекеттик кызматкерлерди жана эксперттерди атаандаштык саясаты жаатындагы актуалдуу маселелерди жана чакырыктарды талкуулоо үчүн чогултту. Максим Ермолович Евразия экономикалык бирлигинин мамлекеттеринин Египет менен атаандаштык жаатында кызматташуусунун жогорку деңгээлин белгилеп, бул чөйрөдөгү өлкөнүн негизги жетишкендиктерине токтолду жана африкалык региондо атаандаштык өнөктөштүктү өнүктүрүүнүн лидерлеринин бири катары Египеттин ролун баса белгиледи. ЕЭК министри Египет менен кызматташуунун, мисалы, мыйзамдык жаңылануулар менен алмашуу, атаандаштыктын бузулушун иликтөөнү жүргүзүү тажрыйбасы, товардык рынокторду изилдөө, анын ичинде сектордук талдоо жүргүзүү, ошондой эле биржалык тооруктар сыяктуу келечектүү багыттарына басым жасады. "Биз Египеттен кесиптештерибиздин жетишкендиктерин жогору баалайбыз жана атаандаштык чөйрөсүндө мыйзам чыгаруу жана укук колдонуу боюнча уникалдуу тажрыйбаны жайылтууга жана ишке киргизүүгө же масштабдаштырууга кызыкдарбыз", – деп баса белгиледи Максим Ермолович. Иш-чаранын алкагында атаандаштык чөйрөсүндө натыйжалуу укук колдонууну камсыз кылууда соттордун жана парламенттердин ролун, атаандаштыктын экономикалык өсүшкө жана инвестицияга тийгизген таасирин талкуулоого арналган тематикалык сессиялар өттү.

28 апрелиндеги 2025 ЕЭКте чек ара аралык рыноктордогу атаандаштыктын абалына жасалма интеллекттин таасири изилденет Евразиянын чек ара аралык рынокторундагы атаандаштыктын абалына жасалма интеллекттин таасири КМШнын катышуучу мамлекеттеринин монополияга каршы мыйзамдарын бузууларды биргелешкен иликтөө боюнча штабынын жана Евразия экономикалык комиссиясынын Монополияга каршы жөнгө салуу департаментинин директору Сергей Максимовдун катышуусу менен Монополияга каршы саясат боюнча мамлекеттер аралык кеңештин (МСМК) отурумдарында өзүнчө талкууланды. Иш-чаралардын катышуучулары ЕЭК бул теманы Евразия экономикалык бирлигинин өлкөлөрүнүн ыйгарым укуктуу органдары, эксперттик жана ишкер чөйрөлөрү менен деталдуу иштеп чыга алат деген корутундуга келишти. Департаменттин өкүлдөрү ошондой эле санариптик рыноктордогу атаандаштык проблемаларын изилдөө боюнча БРИКС жумушчу тобунун (БРИКС форматы+) отурумуна катышышты, анда маркетплейстердин жана санариптик платформалардын ишине контролду өркүндөтүү боюнча мамилелер каралды. 2024-жылы Монополияга каршы жөнгө салуу департаменти санариптик рынокторду жана электрондук платформалардын ишмердүүлүгүн изилдөөдө колдонулган жалпы ыкмаларды түздү. Бул иштин натыйжалары "ЕАЭБ мейкиндигиндеги санариптик рыноктор: изилдөөнүн, монополияга каршы жөнгө салуунун жана укуктук камсыздоонун актуалдуу маселелери" эл аралык илимий-практикалык конференциясынын жүрүшүндө көрсөтүлдү.

26 апрелиндеги 2025 Ирандагы трагедияга байланыштуу көңүл айтуу ЕЭК Коллегиясынын Төрагасы Бакытжан Сагинтаев Евразия экономикалык комиссиясынын атынан жана жеке өзүнүн атынан Иран Ислам Республикасынын Президенти Масуд Пезешкианга жана бүткүл иран элине Бендер-Аббас шаарына жакын жердеги Шахид-Раджаи портундагы жарылуудан адамдардын курман болгондугуна байланыштуу көңүл айтты. "Адамдардын курман болушуна алып келген кайгылуу окуя тууралуу кабарды терең кайгыруу сезими менен кабыл алдым",– деп айтылат телеграммада. – Жоготуу азабын бөлүшүп жатып, курман болгондордун үй-бүлөлөрүнө терең кайгыруу менен көңүл айтам жана бардык жабыр тарткандардын тез сакайып кетишин каалайм".

25 апрелиндеги 2025 Арзыбек Кожошев Кыргыз Республикасынын экономика жана коммерция министри Бакыт Сыдыков менен жолугушту Евразия экономикалык комиссиясынын энергетика жана инфраструктура боюнча министри Арзыбек Кожошев менен Кыргыз Республикасынын экономика жана коммерция министри Бакыт Сыдыков Бишкекте жумушчу жолугушуу өткөрүштү. Сүйлөшүүлөрдүн жүрүшүндө тараптар ЕАЭБде транспорт жана энергетика чөйрөсүндөгү интеграцияны өнүктүрүүнүн актуалдуу маселелерин талкуулашты. Евразиялык транспорттук коридорлорду өнүктүрүүнүн, санариптик технологияларды киргизүүнүн жана энергоресурстардын жалпы рынокторун түзүүнүн маанилүүлүгү белгиленди. "Ташуулардын үзгүлтүксүз процесстерин жана тоскоолдуксуздугун камсыздоого, алардын коопсуздугун жогорулатууга, транспорт каражаттарынын токтоп туруу убактысын кыскартууга жана башкаруучулук ишмердүүлүктү автоматташтырууга объективдүү муктаждык рыноктун катышуучуларын интеллектуалдык транспорттук тутумдарды жигердүү киргизүүгө түрткү берет", – деп белгиледи Арзыбек Кожошев. Ошондой эле министрлер Евразия экономикалык бирлигинин алкагында 2030-жылга чейин жана 2045-жылга чейинки мезгилде "Евразия экономикалык жолу" транспорт жана энергетика жагында экономикалык процесстерди андан ары өнүктүрүү жөнүндө декларацияны ишке ашыруу боюнча иш-чаралар планынын долбоорунун пункттарын макулдашуунун жүрүшүн талкуулашты.

25 апрелиндеги 2025 Руслан Давыдов евразиялык интеграцияны өнүктүрүүдө бажылык жөнгө салуунун мааниси жөнүндө айтып берди Евразия экономикалык комиссиясынын бажы кызматташтыгы боюнча министри Руслан Давыдов Евразия экономикалык бирлигинде бажылык жөнгө салуунун актуалдуу маселелери жөнүндө "Бажы: кечээ, бүгүн, эртең" илимий-практикалык конференциясында айтып берди. Санариптештирүү, бизнес менен өз ара аракеттенүү, эл аралык интеграция жана мыйзамдарды өркүндөтүү маселелери талкууланды. Руслан Давыдовдун сөзү боюнча, дүйнөлүк тажрыйба көрсөткөндөй, интеграциялык процесстер катышуучу өлкөлөр бажылык жөнгө салуу жаатында тыгыз кызматташкан шартта гана ийгиликтүү боло алат. Ал эми бажынын негизги милдеттеринин бири соода жол-жоболорун жөнөкөйлөтүү жана тездетүү болуп саналат, бул жыйынтыгында чыгымдарды азайтууга, өз ара сооданын көлөмүн көбөйтүүгө жана ыңгайлуу бизнес-чөйрөнү түзүүгө алып келет. Бүгүнкү күндө бажы органдары электрондук декларация жана контролдоонун автоматташтырылган тутуму сыяктуу заманбап технологияларды жигердүү киргизүүдө, бул иштин натыйжалуулугун кыйла жакшыртууга жана чек араларда жүктөрдү иштетүү убактысын кыскартууга мүмкүндүк берет. Бул, өз кезегинде, бизнес үчүн жаңы мүмкүнчүлүктөрдү ачат, инвестицияларды өбөлгөлөйт жана евразиялык интеграциялык бирикмелерге мүчө өлкөлөрдүн экономикасын өнүктүрүү үчүн жагымдуу шарттарды түзөт. "Бизде ЕАЭБ жөнүндө келишим боюнча бирдиктүү бажылык жөнгө салуу, бирдиктүү бажы аймагы, үчүнчү өлкөлөр менен товарларды сатуунун бирдиктүү режими бар жана биз унификацияга умтулушубуз керек. Бул биздин Бирликтин бирдиктүү бажы аймагы катары эл аралык атаандаштыкка жөндөмдүүлүгү, анын транзиттик потенциалы, – деп белгиледи Руслан Давыдов. – Кургактыктын жетиден бир бөлүгү – Евразия бирлиги, бул Кытай менен Европанын ортосундагы көпүрө. Биздин бул географиялык артыкчылыктарыбызды толук өлчөмдө ишке ашыруу керек". Конференция Жеңиш күнүнүн алдында өткөндүгүнө байланыштуу, ЕЭКтин бажы кызматташтыгы боюнча министри Улуу Ата Мекендик согуштагы жеңишке жетүүгө бажы кызматкерлеринин кошкон салымына өзгөчө көңүл бурду. Ал баса белгилеп өткөндөй, согуш учурунда товарларды жеткирүүнүн негизги жолдору Ыраакы Чыгыш жана Иран Ислам Республикасы аркылуу өткөн, бул жалпысынан активдүү өнүгүп жаткан "Батыш-Чыгыш" жана "Түндүк-Түштүк" эл аралык коридорлоруна туура келет.  

24 апрелиндеги 2025 Максим Ермолович КМШнын атаандаштык боюнча иш-чараларына катышты Евразия экономикалык комиссиясынын атаандаштык жана монополияга каршы жөнгө салуу боюнча министри Максим Ермолович Монополияга каршы саясат боюнча мамлекеттер аралык кеңештин (МСМК) ишине катышты. Ал Комиссиянын өзү жетектеген блогунун өткөн жылдагы ишмердүүлүгү, МСМК жана улуттук профилдик органдар менен өз ара аракеттешүүсү тууралуу айтып берди. "Россиянын ФМК жана ЕЭК ар кандай форматтарда: "5+1" кеңешмелер аянтчаларында, МСМК, КМШ мамлекеттеринин монополияга каршы мыйзамдарын бузууларды биргелешкен иликтөө боюнча штабда, атаандаштыкты адвокаттоо боюнча иш-чаралардын алкагында жана башкаларда кызматташат, – деп баса белгиледи Максим Ермолович. – Бул бүткүл евразия мейкиндигинде атаандаштык ведомстволорунун ишин координациялоого жардам берет". Биргелешкен иликтөөлөр боюнча штабдын отурумунун катышуучулары, анын ичинде Комиссиянын атаандаштык боюнча блогунун өкүлдөрү, бул чөйрөдөгү укук бузуулардын алдын алуу жана четтетүү мисалдары жөнүндө айтып беришти, маркетплейстердин ишмердүүлүгү, атаандаштыктын абалына жасалма интеллекттин таасири ж. б. менен байланышкан иш тажрыйбалары менен алмашышты. Монополияга каршы саясат боюнча мамлекеттер аралык кеңеш (МСМК) 1993-жылы түзүлгөн. Ал КМШ мамлекеттеринин ыйгарым укуктуу өкүлдөрүнөн түзүлөт. МСМК иши биринчи кезекте КМШ өлкөлөрүнүн улуттук атаандаштык мыйзамдарын жана алдыңкы эл аралык тажрыйбанын негизинде аны колдонуу тажрыйбасын өркүндөтүүгө багытталган.

24 апрелиндеги 2025 Арзыбек Кожошев: "Транспорттук байланыш жана ЭКБны өнүктүрүү ЕАЭБде туруктуу өнүгүүнүн драйвери болуп калышы мүмкүн" Евразия экономикалык комиссиясынын энергетика жана инфраструктура боюнча министри Арзыбек Кожошев Бишкекте тоолуу аймактарды туруктуу өнүктүрүүнүн перспективаларына арналган "Глобалдык тоо диалогу" эл аралык конференциясына катышты. Министр өз сөзүндө бул региондордогу жашоо сапатын жогорулатуунун негизги фактору катары транспорттук жана энергетикалык инфраструктураны жакшыртуунун маанилүүлүгүн белгиледи. Министр баса белгилегендей, Кыргыз Республикасы уникалдуу тоо ландшафтына жана олуттуу жаратылыш ресурстарына ээ болуу менен алгылыктуу экономикалык динамиканы көрсөтүүнү улантууда. 2024-жылы өлкөнүн экономикасы рекорддук көрсөткүчкө жетип, ал эми ИДӨ 9%га өскөн. Бирок тоолуу аймактар обочолонуу, климаттык тобокелдиктер жана ички миграция сыяктуу өзгөчө кыйынчылыктарга туш болушат, бул мамлекеттик саясатты иштеп чыгууда өзгөчө мамилени талап кылат. Инфраструктураны өнүктүрүүнүн алкагында Арзыбек Кожошев "Кытай – Кыргызстан – Өзбекстан" жана "Балыкчы – Кочкор – Макмал" темир жолун куруу, ошондой эле алыскы аймактар менен аба каттамын күчөтүү боюнча негизги долбоорлорду бөлүп көрсөттү. Энергетика темасына өзгөчө көңүл бурулду. Кыргызстан энергиянын кайра жаралуучу булактарынын дараметин жигердүү өнүктүрүүнү улантуусу зарыл, бул тоолуу аймактарды туруктуу энергия менен камсыз кылууга жардам берет жана чыгындыларды кыскартууга жана мөңгүлөрдү сактоого өбөлгө түзөт. "ЭКБны өнүктүрүү жана гидроэнергетикалык потенциалды ачуу жетүүгө кыйын болгон тоолуу райондордо энергиянын жеткиликтүүлүгүн жогорулатуу, ошондой эле тышкы энергия менен камсыздоого көз карандылыкты азайтуу үчүн маанилүү кадам болуп саналат, бул ЕАЭБ өлкөлөрүнүн тоолуу аймактары үчүн өзгөчө маанилүү", – деп баса белгиледи министр. Министр өз сөзүн тоолуу аймактардын дараметин ишке ашыруу жана алардын туруктуу экономикалык өсүшүн камсыз кылуу үчүн эл аралык кызматташтыкты кеңейтүүгө чакыруу менен жыйынтыктады.

24 апрелиндеги 2025 Максим Ермолович Россиянын ФМК мааракелик иш-чараларына катышты Евразия экономикалык комиссиясынын атаандаштык жана монополияга каршы жөнгө салуу боюнча министри Максим Ермолович Россия Федерациясынын монополияга каршы органдарынын 35 жылдыгына арналган мааракелик иш-чараларда сөз сүйлөдү. Федералдык монополияга каршы кызматтын Коллегиясынын кеңейтилген отурумунда Максим Ермолович Евразия экономикалык бирлигинин өлкөлөрүндө суроо-талапка ээ болгон таасирдүү мыйзамдарды жана ийгиликтүү атаандаштык укук колдонууну түзүүдө Россиянын ФМК жана анын аймактык органдарынын чоң ролун баса белгиледи. "Россия Федерациясынын монополияга каршы органдары эркин атаандаштыкты камсыз кылуу боюнча маанилүү миссияны ийгиликтүү аткарып жатышат, – деп белгиледи ЕЭК министри. – Бешинчи монополияга каршы пакет, картелдерди жана атаандаштыкты чектеген башка макулдашууларды аныктоо жана бөгөт коюу боюнча чаралардын жаңы ведомстволор аралык программасы, социалдык маанилүү рыноктордо Федералдык монополияга каршы кызмат тарабынан жүргүзүлүп жаткан иштер – мунун баары Россиянын ФМК тарабынан атаандаштыкты коргоо кызыкчылыктарына чыныгы берилгендигин көрсөтүп турат". Иш-чаралардын алкагында ошондой эле санариптик рыноктордогу атаандаштык көйгөйлөрүн изилдөө боюнча БРИКС жумушчу тобунун отуруму болуп өттү (БРИКС+ форматында).

Дагы көрсөтүү