Жаңылыктар
ЕЭК делегациясы БАЭде логистикалык хабды түзүү мүмкүнчүлүгүн талкуулады
Евразия экономикалык комиссиясынын Соода саясаты департаментинин директору Владимир Серпиковдун Бириккен Араб Эмираттарына (БАЭ) сапарынын алкагында Дубайдын Соода палатасынын вице-президенти Хасан Эль Хашими башында турган БАЭнин ишкер чөйрөлөрүнүн делегациясы менен жолугушуу болуп өттү. Иш-чаранын жүрүшүндө тараптар ЕАЭБдин мүчө мамлекеттери менен бул жакынкы чыгыш өлкөсүнүн ортосундагы кызматташтыкты кеңейтүүнүн келечеги боюнча пикир алмашышты.
Владимир Серпиков ЕАЭБ менен БАЭнин ортосундагы өз ара иштешүүнү бекемдөө маселелерине кеңири токтолду. Атап айтканда, кеп "Түндүк-Түштүк" эл аралык транспорттук коридорун өнүктүрүү жөнүндө болду. "Евразиялык агроэкспресс" долбооруна БАЭнин кошулуу мүмкүнчүлүгүн карап чыгуу сунушталды.
Мындай долбоорлорду ишке ашыруу электрондук транспорттук жана товар коштоочу документтерди пайдалануу менен темир жол транспорту менен жүктөрдү ташуунун комплекстүү санариптик технологиясына өтүүгө мүмкүндүк берет, бул өз кезегинде жеткирүү убактысын кыскартууга, ошондой эле соодадагы административдик тоскоолдуктарды жоюуга шарт түзөт.
"Биз БАЭде – эмираттар тарап кызыкдар болгон учурда – дистрибьютердик тармакты жана транспорттук хабды түзүүнүн олуттуу потенциалын көрүп турабыз, алар ЕАЭБ мамлекеттеринин Жакынкы чыгыш чөлкөмүнүн өлкөлөрү менен, ал эми келечекте Африка өлкөлөрү менен соодасын кеңейтүүгө мүмкүндүк берет", – деп белгиледи Владимир Серпиков.
Хасан Эль Хашими ЕАЭБ өлкөлөрү менен комплекстүү, анын ичинде айтылган маселелер боюнча да кызматташтыкты кеңейтүүгө кызыгууну ырастады.
Ал ошондой эле жакынкы арада Москвада Дубайдын Соода палатасынын өкүлчүлүгүн ачууга өкмөттүн ниеттенүүсү жөнүндө маалымдады, ошондой эле 2023-жылдын 14-17-июнунда Санкт-Петербургда өтө турган Петербург эл аралык экономикалык форумуна катышууга чакыруу үчүн ыраазычылыгын билдирди.
