Қаріп өлшемі: A A A

Сайттың түсі: C C C

Сайттын кадимки версиясы

Күндөрдү тандаӊыз

Багыт тандаңыз

Издөөнүн жыйынтыктары: 6150

16 апрелиндеги 2025 Комиссияда товарларга декларацияны толтуруу тартибин жөнөкөйлөтүү талкууланды Евразия экономикалык комиссиясында ЕЭКтин Бажы мыйзамдары жана укук колдонуу практикасы департаментинин директорунун орун басары Григор Оганяндын төрагалыгы астында профилдик Консультативдик комитеттин алдында бажылык декларациялоо боюнча жумушчу топтун отуруму өткөрүлдү. Евразия экономикалык бирлигинин өлкөлөрүнүн товарларга декларацияны толтуруу эрежелерин өзгөртүүгө байланыштуу бир катар демилгелери талкууланды. Атап айтканда, товарларды ташып чыгууну жөнөкөйлөтүү үчүн мурда киргизилген жана Бирликтин статусун алган товарлары экспорттоодо мурдагы бажы жол-жобосу жана документи жөнүндө маалыматтарды толтурбоо сунушталган. Ошондой эле бизнестин сунуштары боюнча товарларды ташып чыгууда алар менен ташуу пландалып жаткан транспорт жөнүндө маалыматтарды көрсөтүү мүмкүнчүлүгүнө багытталган өзгөртүүлөр демилгеленген. Бул декларацияны алдын ала тапшырууга мүмкүндүк берет. Бажылык декларациялоо боюнча жумушчу топ 2021-жылы ЕЭКтин бажылык жөнгө салуу боюнча консультативдик комитетинин чечими менен түзүлгөн. Анын ишмердигинин чөйрөсүнө товарларды декларациялоо маселелери, анын ичинде товарларга декларацияны толтуруунун формасы жана тартиби менен байланышкан маселелер кирет.

11 апрелиндеги 2025 ЕЭК Иран менен техникалык жөнгө салуу жаатында кызматташтыкты өнүктүрүү боюнча семинар өткөрдү Евразия экономикалык комиссиясынын аянтчасында ЕЭКтин соода боюнча министри Андрей Слепневдун жана ЕЭКтин техникалык жөнгө салуу боюнча министри Валентин Татарицкийдин төрагалыгы астында Иран менен техникалык жөнгө салуу, дары каражаттарын жана медициналык буюмдарды жүгүртүү жаатында кызматташтыкты өнүктүрүүнүн перспективаларына арналган семинар болуп өттү. Жолугушуу Евразия экономикалык бирлиги менен Иран Ислам Республикасынын ортосундагы Эркин соода жөнүндө келишим ушул жылдын 15-майында күчүнө кирүүсүн утурлай өттү. Семинарга ирандык өнөктөштөр менен өз ара аракеттенүүнү өнүктүрүүгө жана Ирандын рыногуна чыгууга кызыкдар болгон ЕАЭБ өлкөлөрүнүн мамлекеттик органдарынын, ишкер бирикмелеринин жана компанияларынын өкүлдөрү катышышты. "Ирандык тарап клиникалык сыноолорду жүргүзүүгө жана фармацевтикалык продукцияларды каттоого карата жөнгө салуу мамилелерин жакындатуу боюнча кызыгуусун билдирди. Биз тараптан ишкер коомдоштуктун ирандык тарап менен дөңгөлөктүү транспорт каражаттарынын, ошондой эле медициналык техниканын жеткиликтүүлүгү боюнча техникалык тоскоолдуктарды четтетүүгө кызыкдарлыгын көрүп турабыз", — деп белгиледи Андрей Слепнев. Анын айтымында, Келишимдин жакшыртылган жөнгө салуучу бөлүгү соодадагы техникалык тоскоолдуктар жагында толугу менен Дүйнөлүк соода уюмунун эрежелерине ылайык келет, бул Иран бул эл аралык уюмдун мүчөсү эмес экенин эске алуу менен өзгөчө маанилүү. "Биздин субъекттер үчүн Иран рыногуна продукциялардын жеткиликтүүлүк көйгөйлөрүн жөнгө салуу үчүн практикалык багыттагы механизм катары соодадагы техникалык тоскоолдуктар боюнча жумушчу топтун аянтчасы болуп саналат. Мындай тематикалык топту түзүү Келишимде каралган. Жумушчу топто Ирандагы техникалык талаптарга же шайкештикти баалоо жол-жоболоруна байланыштуу биздин уюмдардын конкреттүү экспорттук кейстерин кароого, кандайдыр бир так келишимдерге чыгууга аракет кылууга болот", – деп белгиледи Валентин Татарицкий. Ал соодадагы техникалык тоскоолдуктарга байланыштуу маселелерди чечүү үчүн колдо болгон мүмкүнчүлүктөрдүн бардык спектрин, анын ичинде Бирлик мамлекеттеринин Иран менен эки тараптуу келишимдерин карап чыгууну сунуштады. Техникалык жөнгө салуу жаатында ирандык өнөктөштөр менен өз ара аракеттенүүнүн кыйла келечектүү багыттарын ЕАЭБдин, анын мүчө мамлекеттеринин жана Ирандын ортосундагы соода-экономикалык кызматташтык боюнча макулдашуунун жоболорун имплементациялоого багытталган Биргелешкен иш-чаралар планынын (жол картасынын) долбооруна киргизүү сунушталат.

11 апрелиндеги 2025 ЕЭК темир жол машина куруу тармагында каржылык көмөк көрсөтүү механизмин колдонууну активдештирет Евразия экономикалык комиссиясынын өнөр жай жана АӨК боюнча министри Гоар Барсегян жетектеген делегациясы Тверь облусунда "Негизги тутумдар жана компоненттер" ("НТК" МК) компаниялар тобунун өндүрүштүк аянтчаларынын иши менен таанышты. Бул холдинг рельстик кыймылдуу курам үчүн тутумдардын жана компоненттердин ири россиялык өндүрүүчүлөрдүн бири болуп саналат. "НТК" МКнын өнөр жай технопаркына жана холдингдин ишканаларына баруунун жүрүшүндө Евразия экономикалык бирлигинин алкагында "Москва – Санкт-Петербург" жогорку ылдамдыктагы темир жол магистралынын долбоорун ишке ашыруу үчүн өнөр жай операциясына каржылык көмөк көрсөтүү механизмин пайдалануу талкууланды. "Биз каржылык көмөк көрсөтүү механизми холдинг тарабынан өндүрүштүк кубаттуулуктарды модернизациялоо жана өстүрүү, ошондой эле ЕАЭБ өлкөлөрүнүн ишканалары менен жаңы кооперациялык тизмектерди түзүү үчүн ийгиликтүү колдоно тургандыгына ишенебиз. Биз жаңы кооперациялык чынжырчаларды түзө алабыз, алар "НТК" МК гана эмес, бүткүл евразиялык өнөр жайынын позицияларын бекемдейт", – деп белгиледи Гоар Барсегян. "НТК" МК Россия Федерациясынын он регионунда 20дан ашык ишканаларды бириктирет, аларда 16 миңден ашык адам иштешет. "НТК" МК тапшырыкчыларынын арасында – Россия менен Европанын 200дөн ашык компаниялары бар.

10 апрелиндеги 2025 Комиссия ЕАЭБдин айыл чарба жана азык-түлүк продукцияларынын Ирандын рыногуна жеткиликтүүлүгү маселесин талкуулады Евразия экономикалык комиссиясынын аянтчасында ЕЭКтин Соода саясаты департаментинин директору Владимир Серпиковдун жана ЕЭКтин Санитардык, фитосанитардык жана ветеринардык чаралар департаментинин директору Владимир Синкевичтин жетекчилиги астында мамлекеттик органдардын, ишкер ассоциациялардын жана бизнестин өкүлдөрү менен Евразия экономикалык бирлигинин өлкөлөрүнөн ирандык рынокко айыл чарба продукцияларынын жеткиликтүүлүгү маселелерин талкуулоо болуп өттү. Жолугушуу ЕАЭБ менен Иран Ислам Республикасынын ортосундагы Эркин соода жөнүндө келишим ушул жылдын 15-майында күчүнө кирүүсүн утурлай өттү. Макулдашуунун преференциалдык камтуусуна айыл чарба товардык номенклатурасынын 67%ы кирет, анын үлүшүнө ЕАЭБдин Иранга айыл чарба экспортунун 98%ы туура келет. Соода режимин либералдаштыруу ирандык тараптын тарифтик коргоо деңгээлин олуттуу түрдө төмөндөтүүгө мүмкүндүк берет: Ирандын РНБ орточо чени бүткүл айыл чарба товардык номенклатурасы боюнча 30%дан 14%га чейин төмөндөйт. "Макулдашуу ЕАЭБ бизнеси үчүн иран рыногуна, анын ичинде азык-түлүк товарлары жагында жеткиликтүүлүктүн уникалдуу тарифтик шарттарын түзөт. Буга байланыштуу биз биринчи кезекте бул багыт боюнча Иран менен кызматташтыкты өнүктүрүүнүн алкагында көңүл бурушубуз керек болгон тоскоолдуктарды жана көйгөйлүү маселелерди аныктоо зарыл", – деп белгиледи Владимир Серпиков. Ал ошондой эле, бир эле мезгилде Макулдашууда санитардык, ветеринардык-санитардык жана карантиндик фитосанитардык чараларды колдонууга тиешелүү жөнгө салуучу бөлүк жакшыртылганын, алар өз ара соодага олуттуу таасир тийгизиши мүмкүн экенин эске салды. "ЕАЭБде СФС-чаралар чөйрөсүндө ченемдик-укуктук база түзүлгөн, ал коопсуздукка, анын ичинде азык-түлүк продукциясына, Бирликтин аймагы боюнча алып келүүнүн жана аны алып өтүүнүн тартибине карата талаптарды белгилейт. Көрсөтүлгөн чөйрөлөрдө ЕАЭБ укугу сакталган учурда үчүнчү өлкөлөрдүн, анын ичинде Ирандын продукциясы ЕАЭБ мүчө мамлекеттеринин рыногуна келет", – деп маалымдады Владимир Синкевич. Айыл чарба продукцияларынын жеткиликтүүлүгү, анын ичинде санитардык жана фитосанитардык чараларды колдонуу маселелерин 2025-жылдын экинчи жарымына пландаштырылган Макулдашууну ишке ашыруу боюнча Биргелешкен комитеттин биринчи отурумунун жүрүшүндө ирандык тарап менен талкуулоо сунушталды. Мындан тышкары, бул жаатта ирандык өнөктөштөр менен өз ара аракеттенүүнүн кыйла келечектүү багыттарын ЕАЭБдин, анын мүчө мамлекеттеринин жана Ирандын ортосундагы соода-экономикалык кызматташтык боюнча Макулдашуунун жоболорун имплементациялоого багытталган Биргелешкен иш-чаралар планынын (жол картасынын) долбооруна киргизүү пландаштырылууда.

10 апрелиндеги 2025 Наира Карапетян: "ЕЭК ЕАЭБ өлкөлөрүнүн кант рыногун туруктуу өнүктүрүү боюнча кошумча чаралардын тизмесин жактырууну пландаштырууда" Евразия экономикалык бирлигинин бардык өлкөлөрү үчүн экономиканын агрардык сектору стратегиялык тармактардын бири болуп саналат жана акыркы беш жылда өндүрүштүн дээрлик 15%га өсүшүн көрсөттү. Бул туурасында Евразия экономикалык комиссиясынын Агроөнөр жай саясаты департаментинин директору Наира Карапетян 10-апрелде Москвада өткөн "КМШ өлкөлөрүнүн кант рыногу 2025. Келечекке көз караш" эл аралык конференциясында билдирди. Ошону менен бирге, ЕЭК өкүлүнүн сөзү боюнча, жогорку технологиялык өндүрүш каражаттарынын олуттуу көлөмдөрү Бирликке импорттолууда. Бул жагдайды нивелирлөө үчүн Комиссия макулдашылган агроөнөр жай саясатынын алкагында сезимтал айыл чарба товарларынын рынокторун өнүктүрүүнүн комплекстүү баяндамаларынын негизинде мүмкүн болгон биргелешкен чараларды аныктоо үчүн сунуштарды иштеп чыгат. "Комиссия Бирлик мамлекеттеринин кант рыногун туруктуу өнүктүрүү боюнча кошумча чаралардын тизмесин жактырууну пландаштырууда, анда кантты жана кошумча продукцияны терең кайра иштетүү чөйрөсүндө инновациялык иштеп чыгууларды жана технологиялык чечимдерди өздөштүрүү, ошондой эле башка чаралар каралган", – деп маалымдады конференциянын катышуучуларына Наира Карапетян. Жыл сайын өтүүчү конференцияга салттуу түрдө КМШ өлкөлөрүнүн кант өндүрүүчүлөрү, профилдик мамлекеттик органдар, соода компаниялары жана кантты өнөр жайлык керектөөчүлөр, жер семирткичтерди жана айыл чарба техникасын, өсүмдүктөрдү коргоо каражаттарын өндүрүүчүлөр, кант кызылчасынын үрөнүн жеткирүүчүлөр, банк жана финансы секторунун өкүлдөрү, ошондой эле логистикалык компаниялар катышат.

09 апрелиндеги 2025 ЕЭК ЕАЭБ мамлекеттеринин экономикалык өнүгүүсүнүн туруктуулугун аныктоочу макроэкономикалык көрсөткүчтөргө мониторинг жүргүздү Мониторинг көрсөткөндөй, 2024-жылдын жыйынтыгы боюнча ЕАЭБ мамлекеттериндеги мамлекеттик башкаруу секторунун карызы Евразия экономикалык бирлиги жөнүндө келишимде белгиленген чектерде түзүлгөн. Бир катар өлкөлөрдө карыздын деңгээли ИДӨгө салыштырмалуу төмөндөгөн: Кыргызстанда – 13,1%га чейин, Россияда – 13,6%га чейин. Арменияда жана Казакстанда ички карыздардын көбөйүшүнө байланыштуу карыздын ИДӨгө карата көрсөткүчтөрү тиешелүүлүгүнө жараша 48,2%га жана 23,2%га чейин өскөн. Бирликтин көпчүлүк өлкөлөрүндө мамлекеттик башкаруу секторунун бюджетинин балансы да белгиленген маанилердин алкагында түзүлгөн: Казакстанда жана Россияда тиешелүүлүгүнө жараша орточо тартыштык – ИДӨнүн 0,7% жана ИДӨнүн 1,2% өлчөмүндө, Кыргызстанда – ИДӨнүн 3,5% деңгээлинде бюджеттин профицити. Биринчи кезекте бюджеттерге колдоону салыктык жана салыктык эмес кирешелердин өсүшү көрсөттү. Армения Республикасы өзгөчө болду, анда бюджеттин тартыштыгы калкты социалдык колдоого чыгымдардын көбөйүшүнө байланыштуу ИДӨнүн 3,5%ын түзүп, белгиленген мааниден ашкан. Евразия экономикалык бирлиги жөнүндө келишимдин 63-беренесине ылайык өлкөлөрдүн экономикалык өнүгүүсүнүн туруктуулугун аныктоочу негизги макроэкономикалык көрсөткүчтөргө төмөнкүлөр кирет: мамлекеттик башкаруу секторунун консолидацияланган бюджетинин тартыштыгы – ИДӨнүн 3%нан көп эмес; мамлекеттик башкаруу секторунун карызы – ИДӨнүн 50%нан көп эмес.

08 апрелиндеги 2025 ЕАЭБде эң көп кооперациялык жана экспорттук потенциалы бар өнөр жай тармактары аныкталды 8-апрелде Евразия экономикалык комиссиясынын Коллегиясы "Евразия экономикалык бирлигинин мүчө мамлекеттеринин чийки заттык эмес, анын ичинде жогорку технологиялык продукцияларын биргелешип экспорттоо үчүн келечектүү рынокторду жана өнөр жай тармактарын талдоонун жыйынтыктары жөнүндө" баяндамасын жактырды. Баяндамада кооперациялык жана экспорттук потенциалга ээ болгон жогорку технологиялык тармактарды кошкондо өнөр жайдын тармактары аныкталган. Бул, атап айтканда, химиялык, металлургиялык, фармацевтикалык, электрондук-оптикалык тармак, автомобиль- жана авиа куруу тармагы болуп саналат. Документте баяндалган сунуштар өнөр жайдын артыкчылыктуу тармактарынын өсүшүн камсыз кылууга, инновациялык активдүүлүктү өбөлгөлөөгө, илим сыйымдуу өндүрүштөрдү биргелешип өнүктүрүүгө, ошондой эле атаандаштыкка жөндөмдүү экспортко багытталган продукциянын жаңы түрлөрүн өздөштүрүүгө багытталган. "Бирлик өлкөлөрү өнөр жайдын негизги тармактарын өнүктүрүү үчүн олуттуу илимий жана өнөр жай потенциалына ээ, – деп баса белгиледи ЕЭКтин өнөр жай жана агроөнөр жай комплекси боюнча министри Гоар Барсегян. – Ошону менен бирге машина куруу, электроника, химиялык өнөр жай сыяктуу жогорку технологиялык тармактарда импортту алмаштыруу мүчө мамлекеттердин кооперациялык кызматташтыгында артыкчылыктуу бойдон калууда".

08 апрелиндеги 2025 Давид Геворгян ЕЭКтин Иш башкаруу департаментинин директорунун орун басары болуп дайындалды Давид Левонович Геворгян 1986-жылы 28-апрелде Ереванда туулган. 2007-жылы Эл аралык ишкердик академиясын аяктаган. 2007-2012-жылдары Армениянын "Ардеф" өнүктүрүү фондунда, анын ичинде акыркы үч жылда – анын жетекчиси болуп иштеген. 2012-2016-жылдары – Армения Республикасынын Улуттук коопсуздук кеңешинин Аппаратынын Улуттук коопсуздук стратегиясын ишке ашыруу департаментинин экономикалык жана социалдык коопсуздук стратегиясын ишке ашыруу боюнча биринчи бөлүмүнүн башкы адиси. 2016-2018-жылдары – Армения Республикасынын Президентинин Аппаратынын жетекчисинин жардамчысы. 2018-2022-жылдары Армения Республикасынын Вице-премьер-министринин протоколун жетектеген. 2022-2025-жылдары Евразия экономикалык комиссиясынын ички рыноктор, маалыматташтыруу, маалыматтык-коммуникациялык технологиялар боюнча министринин жардамчысы болгон. 2025-жылдын 1-апрелинен Евразия экономикалык комиссиясынын Иш башкаруу департаментинин директорунун орун басары болуп дайындалды.

Дагы көрсөтүү