Жаңылыктар

20 Feb 2024 Андрей Слепнев: "Глобалдык Түштүк өлкөлөрү менен кызматташуунун инструменти болуп соода келишимдери, логистика, каржы жана технологиялар саналат" Мындай пикирин Евразия экономикалык комиссиясынын соода боюнча министри Андрей Слепнев Стратегиялык демилгелер агенттиги жана Росконгресс фонду тарабынан уюштурулган "Жаңы мезгил үчүн күчтүү идеялар" форумунун "Эгемендүүлүктөр достугу: адилеттүү эл аралык өнөктөштүктүн механизмдери" сессиясында сүйлөгөн сөзүндө билдирди. "Бир нече жылдан бери ЕАЭБде биз озуп бараткан өсүштү жана тышкы соодага караганда өз ара сооданын жакшыраак түзүмүн байкап жатабыз. Өткөн жылы соода дээрлик 10%га өсүп, биз дагы бир рекордго жетиштик – жана мунун бардыгы санкциялардын жана чектөөлөрдүн шарттарында болуп жатат. Ошол эле учурда улуттук валюталарда өз ара эсептешүүлөр 90%дан ашты, – деп белгиледи министр. – Башкача айтканда, бардык көйгөйлөргө карабастан, биздин жалпы механизмдер жакшы жыйынтыктарды берип жатат. Мындай терминдерде биз кимдер менен сүйлөшүүлөрдү жүргүзө алабыз. Биринчи кезекте, глобалдык Түштүктүн тез өнүгүп келе жаткан өлкөлөрү менен". Андрей Слепнев эскертип өткөндөй, өткөн жылдын декабрь айында Иран менен эркин соода жөнүндө дымактуу келишимге кол коюлган. Мунун аркасында, бүгүнкү күндө эркин соода зоналары боюнча өнөктөштөр менен бирге эсептегенде үч жүз миллионго жакын адамды түзгөн биздин рынок, дагы 90 миллионго өстү. Азыр Египет, БАЭ, Индонезия менен жигердүү сүйлөшүүлөр жүрүп жатат, Монголия менен сүйлөшүүлөр башталып, Индия багыты менен сүйлөшүүлөр алдыда. "Башкача айтканда, биз бул программаны аткарсак, 2 миллиарддан ашык керектөөчүгө эркин соода аймагын алабыз. Бул чындыгында эле өнүгүү үчүн олуттуу негиз", – деп баса белгиледи ЕЭКтин соода боюнча министри. Ошол эле учурда, Евразия экономикалык бирлигинин дүйнөдө санаалаштары көп экендиги маанилүү. Мисал катары, "Түндүк – Түштүк" экономикалык коридорун алсак, ЕАЭБ да, Иран да, Индия да импортту алмаштыруу программаларын жана өздүк технологиялык платформаларды жигердүү өнүктүрүп жатышат. Кытай бул ишти кеңири номенклатура боюнча аткарды. Ошентип, келечектин технологиялары үчүн табигый коллаборация жөнүндө айтууга болот. Андрей Слепнев быйыл Россиянын БРИКСтеги төрагалыгынын алкагында күтүлүп жаткан дискуссиялар тышкы оюнчулардын кысымына туруктуу, адилеттүү эсептешүүлөрдүн механизмдерин түзүүгө практикалык түрткү берет деген үмүтүн билдирди. Анын айтымында, эртеби же кечпи сөзсүз түрдө эсептешүүлөрдү санариптик валюталарда жүргүзүүгө өтүү болот, бул тышкы соода агымдарын тейлөө үчүн жаңы мүмкүнчүлүктөрдү ачат. "Форумдун аталышын эске алганда, эл аралык кызматташуу үчүн чындыгында көптөгөн жаңы идеялар керек экендиги өзүнчө тема болуп саналат: жасалма интеллект, электрондук соода, климаттык технологиялар, логистикалык чечимдер чөйрөлөрүндө – мунун бардыгы идеяларды жана конкреттүү инструменттерди талап кылат", – деди сөзүнүн аягында Андрей Слепнев. Талкууга ошондой эле: Россиялык экспорттук борборунун вице-президенти Роман Генкель, Россия Федерациясынын Армения Республикасындагы соода өкүлү Анна Донченко, Г.В. Плеханов атындагы Россия экономикалык университетинин ректору Иван Лобанов, Евразиялык интеграция илимий борборунун эксперттик тобунун жетекчиси Олег Ногинский, Роскызматташтыктын жетекчисинин орун басары Дмитрий Поликанов, "Ишкер Россия" жалпы россиялык коомдук уюмунун президенти Павел Титов, "Африка үйү" АКЭУ башкы директору Серж Фокас Одунлами, Россиядагы Америкалык Соода палатасынын президенти Роберт Эйджи катышышты. Иш-чаранын модератору "Орус Медиатобу" АКнын башкы директору Любовь Маляревская болду.
20 Feb 2024 Казакстанда ЕАЭБ мамлекеттеринин жарандарынан туристтик жыйымдарды алуу талабы жокко чыгарылды Евразия экономикалык комиссиясынын Коллегиясы 20-февралдагы отурумда Казакстан Республикасында туристтик жыйымдарды алуу боюнча талапка тиешелүү кедерги белгилери бар тоскоолдуктарды четтетүү жөнүндө маселени карады. 2023-жылдын 1-августунан тартып Казакстан Республикасында чет өлкөлүктөрдөн, анын ичинде Евразия экономикалык бирлигинин мамлекеттеринин жарандарынан туристтик жыйымдарды алуу боюнча талаптар белгиленген. Комиссия Евразия экономикалык бирлигинин ички рыногунда тоскоолдуктардын квалификациясынын методологиясына ылайык маселени кароонун алкагында бул талаптарда кедерги белгилери бар тоскоолдуктардын бар экендиги жөнүндө корутундуга келди. Казакстан Республикасынын ыйгарым укуктуу органдарынын ыкчам ишинин аркасында Казакстан Республикасынын маданият жана спорт министринин буйругуна өзгөртүүлөр киргизилип, ага ылайык ЕАЭБ мамлекеттеринин жарандарынан туристтик жыйым алынбайт. "Биз Бирликтин мүчө мамлекеттеринин мындай чечимдерин кубаттайбыз, анткени алар ЕАЭБдин ички рынокторунун андан ары өнүгүшүнө жана иштешине өбөлгө түзөт. Бул мисал биздин ишибизде жигердүү колдонулуп жаткан медиативдик жол-жоболордун натыйжалуулугунун жакшы далили болуп саналат", – деп түшүндүрдү ЕЭКтин ички рыноктор, маалыматташтыруу, маалыматтык-коммуникациялык технологиялар боюнча министри Варос Симонян.
ЕАЭБде күн карама майы рыногунда ак ниет атаандаштык калыбына келтирилди 19 Feb 2024 ЕАЭБде күн карама майы рыногунда ак ниет атаандаштык калыбына келтирилди Евразия экономикалык комиссиясынын эскертүүсүнө жооп катары "Май комбинаты" АК (Россия Федерациясы) жана "ЕВРОТОРГ" ЖЧК (Беларусь Республикасы) күн карама майынын чек ара аралык рыногунда нысапсыз атаандаштыктын белгилерин жойушту. Буга чейин Комиссияга "ЭФКО" АК россиялык компанияларынын тобу жана "КРЦ "ЭФКО-Каскад" ЖЧКсы нысапсыз атаандаштык жөнүндө арыз менен кайрылышкан. Арыздануучулар берген маалымат боюнча, "Май комбинаты" АК жана "ЕВРОТОРГ" ЖЧКсы "ЭФКО" АК өндүрүшүндөгү "Altero" майынын этикеткасынын дизайнын сымалдаштырган этикеткасы менен таңгактагы "Almaro" майын жарандык жүгүртүүгө киргизген. Арызды карап чыгып, Комиссия "Май комбинаты" АК жана "ЕВРОТОРГ" ЖЧКнын дарегине эскертүү берген. Белгиленген мөөнөттө компаниялар "Аlmaro" майын өндүрүүнү жана сатууну токтотушкан. Тартип бузуу белгилерин четтетүү боюнча эскертүүлөрдүн бардык талаптарынын аткарылышын эске алуу менен ЕЭК арызды кароону токтотту. "Эскертүү "жумшак жөнгө салуунун" куралы катары чек ара аралык рыноктордо атаандаштыкты айып санкцияларын салбастан ыкчам калыбына келтирүүгө мүмкүндүк берет. Бул практиканы улантабыз", – деп белгиледи ЕЭКтин атаандаштык жана монополияга каршы жөнгө салуу боюнча министри Максим Ермолович.  Маалымат ЕАЭБ жөнүндө келишимдин 76-беренесинин 2-пунктуна ылайык, нысапсыз атаандаштыкка жол берилбейт.
ЕЭК жана ДССУ өз ара иштешүүнү бекемдөөдө 16 Feb 2024 ЕЭК жана ДССУ өз ара иштешүүнү бекемдөөдө Евразия экономикалык комиссиясы менен Дүйнөлүк саламаттыкты сактоо уюмунун кызматташтыгынын актуалдуу маселелерин ЕЭКтин экономика жана каржы саясаты боюнча министри Бахыт Султанов жана ДССУнун Штаб-квартирасынын миграция боюнча программасынын жетекчисинин орун басары – доктор Даниэль Мик Женевада талкуулашты. Жетекчилер ишке орношкон мамлекеттеги эмгек мигранттарынын саламаттыгын коргоону камсыздоо, калктын саламаттыгын сактоо жаатындагы заманбап жетишкендиктердин жеткиликтүүлүгү маселелери боюнча кызматташууну мындан ары өнүктүрүүгө өз ара кызыкдар экендигин билдиришти. Бахыт Султанов белгилегендей, ЕЭКтин ДССУ менен өз ара иштешүүсүн күчөтүү Евразия экономикалык бирлигинин өлкөлөрүндө коомдук саламаттык сактоонун актуалдуу маселелерин чечүүгө өбөлгө түзүүдө.  "Комиссиянын жана ДССУнун кооперациялык кызматташтыгын өнүктүрүү евразиялык региондогу интеграциялык процесстерге оң таасирин тийгизет, ошондой эле эл аралык эксперттик коомдоштук менен диалогду активдештирүүгө өбөлгө түзөт", – деп белгиледи министр. Жолугушуунун жыйынтыгы боюнча кызматташтыктын багыттарын, анын ичинде Евразия регионунда эмгек мигранттарынын саламаттык сактоого жетүүсү маселелеринде тажрыйба жана алдыңкы практикалык ыкмалар менен алмашуу боюнча практикалык кадамдарды иштеп чыгуу жөнүндө макулдашууга жетишилди. Маалымат Дүйнөлүк саламаттыкты сактоо уюму – БУУ тутумундагы адистештирилген мекеме, ага 194 мүчө мамлекет кирет. Анын негизги функциясы Жер калкынын саламаттыгынын эл аралык көйгөйлөрүн чечүү болуп саналат. ДССУнун максаты болуп бүткүл дүйнө жүзүндөгү адамдар үчүн дени сак келечекти түзүү саналат. ЕЭК менен ДССУнун ортосундагы кызматташтык ЕЭК менен ДССУнун Европалык регионалдык бюросунун ортосундагы өз ара түшүнүшүү жөнүндө меморандумдун, ошондой эле 2023-2025-жылдарга Меморандумду ишке ашыруу боюнча Иш-чаралар планынын алкагында жүзөгө ашырылат. ЕАЭБ мамлекеттери Бүткүл дүйнөлүк саламаттыкты сактоо уюмунун алкагында ишмердиги ДССУнун Европа регионалдык бюросу тарабынан координацияланган регионго кирет.    
16 Feb 2024 ЕЭКте электрондук соода товарларына жаңы декларацияны толтуруу эрежелери талкууланууда 14-15-февралда Евразия экономикалык комиссиясынын Бажы мыйзамдары жана укук колдонулуучу иш-тажрыйба департаментинин директору Сергей Владимировдун төрагалыгы астында экспресс-жүктөргө жана эл аралык почта жөнөтүүлөрүнө карата бажылык операцияларды аткаруу тартибин өркүндөтүү боюнча жумушчу топтун отуруму болуп өттү. Иш-чарага мамлекеттик органдардын жана бизнестин өкүлдөрү, анын ичинде почта операторлору жана экспресс-ташуучулар катышты. "ЕАЭБ Бажы кодексине өзгөртүүлөрдү киргизүү жөнүндө Протокол күчүнө кириши менен Комиссиянын бир катар чечимдери, анын ичинде электрондук соода товарларына декларацияны толтуруу формасына жана тартибине тиешелүү чечимдер колдонула башташы керек. Ал эми Бирликтин актыларын кабыл алуу боюнча регламенттик жол-жоболорду өткөрүү жана бажы органдарынын маалымат тутумдарын жана электрондук соода операторлорун андан ары жеткире иштеп чыгуу зарылдыгын эске алуу менен, бизде убакыт өтө чектелүү", – деп белгиледи Сергей Владимиров. Бүгүнкү күндө эксперттик деңгээлде жаңы бажы декларациясынын формасы боюнча макулдашууларга жетишилди жана аны толтуруу тартиби жалпысынан түзүлдү. ЕЭК Коллегиясынын чечиминин долбоору боюнча мүчө мамлекеттердин макулдашылган позицияларын иштеп чыгуу максатында айрым аспекттер талкууланды. Маалымат 2023-жылдын 25-декабрында Жогорку Евразия экономикалык кеңешинде Бирликтин Бажы кодексине тышкы электрондук сооданы жөнгө салуу жагында Өзгөртүүлөрдү киргизүү жөнүндө протоколго кол коюлган.
16 Feb 2024 ЕЭК жана ДИМУ интеллектуалдык менчик чөйрөсүндө биргелешкен эл аралык күн тартибин ишке ашырышат 2023-жылдагы кызматташтыктын жыйынтыктарын, ошондой эле Өз ара түшүнүшүү жөнүндө меморандумдун алкагында боло турган иш-чараларды Евразия экономикалык комиссиясынын экономика жана каржы саясаты боюнча министри Бахыт Султанов жана Дүйнөлүк интеллектуалдык менчиктин уюмунун (ДИМУ) башкы директорунун орун басары Хасан Клейб 15-февралда ДИМУнун Женевадагы штаб-квартирасында талкуулашты. Жетекчилер интеллектуалдык менчик чөйрөсүндө укуктук жөнгө салуу, иш жүзүндөгү абалы жана өнүгүү келечектери жаатындагы тажрыйбанын негизинде өткөн жылы уюмдар тарабынан даярдалган аналитикалык, статистикалык жана маалымдама материалдар жөнүндө пикир алмашышты. "Комиссия түзүлгөн учурдан тартып, Евразия экономикалык бирлигинин өлкөлөрүнүн интеллектуалдык менчик чөйрөсүндө экономикалык потенциалын өнүктүрүүгө көмөктөшүү аракетинде ДИМУнун – бүткүл дүйнө боюнча интеллектуалдык менчик укуктарын сактоону камсыздоого көмөк көрсөтүүчү эл аралык уюмдун кеңири тажрыйбасына таянат. Биздин уюмдардын өкүлдөрү туруктуу негизде тажрыйба жана маалымат алмашып, уюштурулуучу иш-чараларга катышып, жумушчу жолугушууларды дайыма өткөрүп турушат", – деп белгиледи Бахыт Султанов. Тараптар 2024-жылы өз ара аракеттенүүнүн калыптанган тажрыйбасын, анын ичинде Евразия экономикалык форумунун, "Антиконтрафакт" эл аралык форумунун, ДИМУнун туруктуу комитеттеринин ишине катышууну, ошондой эле ЕАЭБ мамлекеттери үчүн интеллектуалдык менчиктин актуалдуу маселелери боюнча биргелешкен практикалык семинарды уюштуруу боюнча ишти улантууну макулдашышты. "Биз уюмдарыбыздын кызматташтыгын өнүктүрүүгө багытталган аракеттерди бириктиребиз. Бул интеллектуалдык менчик чөйрөсүндө кеңири эл аралык күн тартипти илгерилетүү арымын тездетүүгө өбөлгө болот деп ишенем", – деп белгиледи Бахыт Султанов.   Маалымат ДИМУ – Бириккен Улуттар Уюмунун тутумунун адистештирилген мекемеси, анын мүчөлөрү болуп 193 мамлекет эсептелет. ДИМУнун ишмердүүлүгү коомдун кызыкчылыктарын сактоо менен инновацияга дем берүүчү жана экономикалык өнүгүүгө салым кошуучу чыгармачыл иши үчүн сыйакы берүүнү камсыз кылуучу интеллектуалдык менчиктин тең салмакталган жана натыйжалуу эл аралык тутумун өнүктүрүүгө арналган. ДИМУ мүчө мамлекеттеринин Ассамблеясынын 2014-жылы болуп өткөн отурумдарынын алкагында ЕЭКке ДИМУ алдында туруктуу байкоочу статусу берилген. 2019-жылдын 7-майында ДИМУ менен ЕЭКтин ортосунда Өз ара түшүнүшүү жөнүндө меморандум түзүлгөн.
Дагы көрсөтүү