Қаріп өлшемі: A A A

Сайттың түсі: C C C

Сайттын кадимки версиясы

Күндөрдү тандаӊыз

Багыт тандаңыз

Издөөнүн жыйынтыктары: 6243

13 ноябрындагы 2025 "Бешилтик" өлкөлөрү энергоресурстардын жалпы рыногун түзүү боюнча иштерди улантууда 12-ноябрда ЕЭКтин энергетика жана инфраструктура боюнча министри Арзыбек Кожошевдин төрагалыгы алдында өткөн ЕЭК Коллегиясына караштуу мунай жана газ боюнча Консультативдик комитеттин отурумунда "бешилтик" өлкөлөрүнүн профилдик министрликтеринин жана ведомстволорунун жетекчилеринин орун басарлары менен мунай жана мунай өнүмдөрү боюнча жалпы рынокторду түзүү маселелери, ошондой эле Бирликтин жалпы газ рыногун өнүктүрүү перспективалары талкууланды. Консультативдик комитеттин мүчөлөрү ЕАЭБдин мунай жана мунай өнүмдөрүнүн жалпы рынокторун түзүү жөнүндө эл аралык келишимдин долбоорунда калган макулдашылбаган маселелер боюнча пикир алмашышты, мамилелерди жакындаштыруунун маанилүүлүгүн жана алар боюнча акыркы чечимдерди тезирээк кабыл алуу зарылдыгын белгилешти. "ЕАЭБ алкагында мунай тармагындагы кызматташтыкты тереңдетүү бүгүнкү күндө мүчө мамлекеттердин энергетикалык коопсуздугун камсыз кылуунун алкагындагы артыкчылыктуу багыттардын бири болуп саналат", – деп белгиледи Арзыбек Кожошев. Ошондой эле тараптар конструктивдүү диалогго даярдыгын билдиришти жана Бирликтин 2030-жылга чейин жалпы газ рыногун өнүктүрүү планын жана ЕАЭБ укугуна өзгөртүүлөрдү киргизүү боюнча сунуштарды даярдоо жана макулдашуу боюнча мындан аркы кадамдарды белгилешти.

13 ноябрындагы 2025 Андрей Слепнев: "ЕАЭБ жана Кытай темир жол жүк ташууларын санариптештирүү боюнча алдыңкы долбоорду киргизүүнү улантууда" Бул туурасында Евразия экономикалык комиссиясынын соода боюнча министри Андрей Слепнев Евразия экономикалык бирлиги менен Кытай Эл Республикасынын ортосундагы соода-экономикалык кызматташтык жөнүндө макулдашууну ишке ашыруу боюнча Биргелешкен комиссиянын отурумунун жыйынтыгы боюнча билдирди. "Темир жол транспорту менен товарларды жеткирүү мөөнөттөрүн кыскартуунун, административдик тоскоолдуктарды четтетүүнүн жана бизнестин чыгымдарын азайтуунун негизги шарттарынын бири электрондук транспорттук жана товарды коштоочу документтерге өтүү болуп саналат", – деп баса белгиледи ЕЭК министри. Биргелешкен комиссиянын отурумунун алкагында россиялык тараптын кытай темир жолдорунун өкүлдөрү менен консультациялары болуп өттү, алардын максаты, Андрей Слепневдун айтымында, Кагазсыз технология боюнча тажрыйбалуу ташууларды ишке ашырууда өз ара аракеттенүү тартибине жана Кагазсыз технология боюнча ташууларды ишке ашыруу жөнүндө макулдашууга кол коюу үчүн бардык зарыл шарттарды финалдык макулдашуу болуп саналат. "Зарыл болгон мамлекеттик ички жол-жоболор үстүбүздөгү жылдын аягына чейин КЭРде аяктайт деп ишенебиз. Ошондой эле жакынкы арада Казакстан менен да ушундай эле документтер топтому кол коюуга даяр болот деп үмүттөнөбүз", – деп белгиледи ЕЭКтин соода боюнча блогунун башчысы.

13 ноябрындагы 2025 Арзыбек Кожошев: "Темир жол транспорту – ЕАЭБдин транзиттик потенциалын ишке ашыруунун негиздеринин бири" Темир жол транспортун өнүктүрүүнүн заманбап тенденцияларын жана жаңы логистикалык чечимдерди, инфраструктуралык өнүгүүнү жана инновацияларды ЕЭКтин жана Трансъевразиялык ташуулар боюнча эл аралык координациялык кеңештин (ТТЭК) бешинчи биргелешкен тегерек столунун катышуучулары талкуулашты. Иш-чара Евразия экономикалык комиссиясынын штаб-квартирасында өттү. "Темир жол транспорту биздин өлкөлөрдүн интеграциясынын негизги элементи жана ЕАЭБдин транзиттик потенциалын ишке ашыруу үчүн негиз бойдон калууда. Бүгүнкү күндө биздин алдыбызда жаңы чакырыктарга ыңгайлашуу гана эмес, Бирликтин транспорт тутумунун келечегин жигердүү калыптандыруу милдети турат", – деп белгиледи ЕЭКтин энергетика жана инфраструктура боюнча министри Арзыбек Кожошев саламдашуу сөзүндө. Иш-чара Евразия экономикалык бирлигинин өлкөлөрүнүн мамлекеттик органдарынын, темир жол администрацияларынын, логистикалык компаниялардын, илимий жана эксперттик коомчулугунун өкүлдөрүн бириктирди. Евразия регионундагы алдыңкы транспорттук-логистикалык компаниялардын, анын ичинде ЕРА БТЛК, FESCO, "Дело" МК жана башкалардын өкүлдөрү жеткирүү чынжырчалары менен кырдаалды, контейнердик ташуулардын перспективаларын жана мультимодалдык логистиканын өнүгүшүн талкуулашты. Санариптик трансформация шарттарында транспорт тармагы үчүн кадрларды даярдоо маселелерине өзгөчө көңүл бурулду. Иш-чаранын жыйынтыгы боюнча биргелешкен коммюнике кабыл алынып, анда тегерек столдун катышуучулары төмөнкүлөрдүн зарылдыгын белгилешти: - транспорттук-логистикалык процесстерди санариптештирүүнү тездетүү; - ЕАЭБдин транзиттик потенциалын бекемдөө үчүн инфраструктураны өнүктүрүү; - ченемдик базаны шайкеш келтирүү жана инновациялык чечимдерди ишке киргизүү; - транспорт тутумун өнүктүрүүнүн негизги багыттары боюнча ЕАЭБ мүчө мамлекеттеринин ортосунда координациялоону күчөтүү. Иш-чара 2021-жылдан бери ушундай форматта өткөрүлүп келет жана ЕАЭБ өлкөлөрүнүн бийлик органдарынын, темир жол администрацияларынын жана бизнес-коомдоштуктарынын ортосундагы диалог үчүн маанилүү аянтча болуп калды, бул евразия мейкиндигинде темир жол транспортун өнүктүрүүгө макулдашылган мамилелерди иштеп чыгууга өбөлгө түздү.  

13 ноябрындагы 2025 Арзыбек Кожошевдин редакциясы астындагы "Евразия энергетикалык саясаты" монографиясы жылдын экономикалык китеби деп табылды "Евразия энергетикалык саясаты" монографиясы "Жылдын экономикалык китеби – 2025" сыйлыгына татыктуу болду. Сыйлык тапшыруу аземи 11-ноябрда Мамлекеттик Кремль сарайында X Бүткүл россиялык экономикалык жыйындын, Россиянын Эркин экономикалык коомунун 260 жылдыгына арналган Мааракелик съездинин алкагында өттү.   ЕЭКтин энергетика жана инфраструктура боюнча министри Арзыбек Кожошевдин жалпы редакциясы астында Евразия экономикалык комиссиясынын авторлорунун жамааты тарабынан даярдалган китеп "Интеграциялык процесстер: өнүгүүнүн перспективалары" номинациясында эң мыкты китеп болуп калды. Монографияда ЕАЭБ алкагында бирдиктүү энергетикалык саясаттын калыптанышы жана өнүгүшү иликтенет. "Алынган жогорку баа евразия экономикалык күн тартибине болгон кызыгуунун өсүп жаткандыгын, изилдөө деңгээлинин таанылгандыгын билдирет", – деп белгиледи Арзыбек Кожошев. "Жылдын экономикалык китеби" коомдук сыйлыгы экономика боюнча мыкты басылмаларды издөө үчүн Россиянын "Эркин экономикалык коому" коомдук уюму тарабынан негизделген. Сыйлык 2018-жылдан бери жыл сайын берилип келет. 11-ноябрда Россияда 2015-жылы РФ Өкмөтүнүн чечими менен түзүлгөн Экономист күнү белгиленет. Иш-чара 2025-жылы Россиядан жана бир катар чет өлкөлөрдөн келген 3,5 миңден ашуун катышуучуларды бириктирди.

13 ноябрындагы 2025 ЕЭКте керектөөчүлөрдүн укуктарын коргоо чөйрөсүндө макулдашылган саясатты ишке ашырууну талкуулашты Керектөөчүлөрдүн укуктарын коргоо маселелери боюнча консультативдик комитеттин отурумунда Стратегия-2025тин профилдик иш-чараларын ишке ашыруунун беш жылдык мезгилинин жыйынтыктары чыгарылды. Евразия экономикалык комиссиясынын техникалык жөнгө салуу боюнча министри Валентин Татарицкий мындай деп белгиледи: "Керектөөчүлөрдүн укуктарын коргоо чөйрөсүндөгү кызматташтык принципиалдуу жаңы деңгээлге жетти. Бирлик өлкөлөрүнүн биргелешкен аракеттеринин программасы биринчи жолу кабыл алынды, ал ЕАЭБ алкагында керектөөчүлөрдүн укуктарын коргоонун ишенимдүү механизмин түзүү үчүн өз учурундагы жана зарыл кадам болуп калды. Бул багыттагы биргелешкен иштердин жыйынтыктары жөнүндө Евразия өкмөттөр аралык кеңешине 2026-жылдын биринчи жарым жылдыгында маалымдоо пландаштырылууда". Консультативдик комитеттин мүчөлөрү мүчө мамлекеттердин 2030-жылга чейинки биргелешкен аракеттеринин жаңы программасын талкуулашты, анын долбоору кийинки жылы өкмөт башчыларынын бекитүүсүнө сунушталат. ЕЭК министри баса белгилегендей, программа коомдук уюмдардын жана бизнестин активдүү катышуусун караштырат, бул жалпы керектөө рыногун өнүктүрүүгө комплекстүү жана тең салмактуу мамилени камсыз кылууга мүмкүндүк берет. Отурумдун катышуучулары тармактык кызматташууну мындан ары кеңейтүү зарылдыгын ырасташты, 2026-жылга карата керектөөчүлөрдүн укуктарын коргоо чөйрөсүндөгү маалыматтык иштин тематикасын макулдашышты жана Беларусь Республикасынын Монополияга каршы жөнгө салуу жана соода министрлигинин товарларда жана алар сатылган жерлерде ченемдик эмес лексиканы жана этикага жатпаган сүрөттөрдү колдонууну чектөө жөнүндө демилгесин карашты. Бирлик мамлекеттеринин Керектөөчүлөрүнүн укуктарын коргоо маселелери боюнча консультативдик комитет Комиссиянын Коллегиясынын алдында мүчө мамлекеттер тарабынан профилдик чөйрөдө макулдашылган саясатты ишке ашыруу маселелери боюнча сунуштарды, сунуштамаларды даярдоо жана консультацияларды өткөрүү үчүн түзүлгөн. Консультативдик комитеттин курамына ЕАЭБ өлкөлөрүнүн мамлекеттик органдарынын, бизнесинин, илимий жана коомдук уюмдарынын өкүлдөрү кирет. Консультативдик комитеттин төрагасы – ЕЭК Коллегиясынын техникалык жөнгө салуу боюнча министри Валентин Татарицкий.

12 ноябрындагы 2025 Андрей Слепнев: "ЕАЭБ – КЭР Биргелешкен комиссиясында өз ара соода күн тартибинин негизги маселелери боюнча чечимдер сунушталды" Евразия экономикалык бирлиги менен Кытай Эл Республикасынын ортосундагы Соода-экономикалык кызматташтык жөнүндө макулдашууну ишке ашыруу боюнча Биргелешкен комиссиянын V отуруму 12-ноябрда Евразия экономикалык комиссиясынын штаб-квартирасында ЕЭКтин соода боюнча министри Андрей Слепневдун жана КЭРдин коммерция министринин орун басары Ян Дундун төрагалыгы астында болуп өттү. Акыркы бир нече жыл аралыгында тараптардын соода-экономикалык байланыштарынын түзүмүндө жана багыттарында сапаттуу жылыштар болгондугу белгиленди. Бул шарттарда күч-аракетти мындан аркы тең салмактуу өнүгүүгө өбөлгө боло турган маселелерге топтоо өзгөчө маанилүү. Төмөн көмүртектүү өнүгүү чөйрөсүндө стандарттарды шайкеш келтирүү жана климаттык жөнгө салуу механизмдерин өркүндөтүүгө, анын ичинде өнөр жай продукциясындагы көмүртектин изин эсептөөгө байланыштуу соода тоскоолдуктарынын тобокелдиктерин нивелирлөө боюнча туруктуу диалогду түзүү жөнүндө макулдашууга жетишилди. ЕАЭБ мамлекеттери жана Кытай жеткирүү чынжырларынын бекемдигин жана туруктуулугун жогорулатууга жана ДСУнун эрежелерине туура келбеген сооданы чектөө чараларына каршы турууга умтулушат. "Тараптар дүйнөлүк экономиканын иштеши үчүн ачык, туруктуу жана болжолдуу негизди камсыз кылган көп тараптуу соода тутумунун маанилүүлүгүн баса белгилешти", – деди Андрей Слепнев. Кытайдын коммерция министринин орун басары Ян Дун КЭР менен ЕАЭБдин ортосундагы биргелешкен аракеттерге негизделген, соода-экономикалык кызматташтыкты мындан ары тереңдетүүнүн олуттуу потенциалын баса белгиледи. Ал белгилегендей, Биргелешкен комиссиянын IV отурумунан кийин 2024-жылдын апрелинде Макулдашууну ишке ашыруудан дагы чоң натыйжаларга жетишүү максаты коюлган жана өз ара аракеттенүү чөйрөсү кеңейтилген. "2024-жылы өз ара соода көлөмү боюнча рекорд коюлду. Ал эми 2025-жылдын январынан сентябрына чейин биздин статистика боюнча товар жүгүртүү 228,38 млрд долларды түздү", – деди Ян Дун. Тараптар кызматташтыктын багыттары боюнча биргелешкен аракеттерди иштеп чыгуу үчүн "Бир алкак – бир жол" демилгесин жана ЕАЭБди айкалыштыруу боюнча диалогду түзүүгө даярдыгын белгилешти. Ошондой эле ЕАЭБ өлкөлөрүнүн айыл чарба продукцияларын экспорттоочуларын CIFER тутумунда каттоо боюнча биргелешкен семинар өткөрүү жана СФС-чараларын колдонуу жагында консультациялар жөнүндө макулдашуулар болду. Андрей Слепнев белгилегендей, бул кытай рыногуна мал чарба продукциясынын жеткиликтүүлүгүн кеңейтүүгө жана экспорттолуучу өсүмдүк продукциясынын ассортиментин көбөйтүүгө өбөлгө түзөт (күздүк буудай жана арпа, буудай кебеги, рапс үрөнү, аквакультура продукциясы ж. б.) Тараптар бажы кызматташтыгы боюнча комитетченин отурумун өткөрүүнү, анын ичинде навигациялык пломбаларды колдонуу жана бажы маалыматтарын алмашуу маселелерин талкуулоо үчүн макулдашышты. Фармацевтика, ички рынокту коргоо, мамлекеттик сатып алуулар жана атаандаштык, электрондук соода, "Евразиялык агроэкспресс" долбоорун өнүктүрүү, соодадагы техникалык тоскоолдуктарды четтетүү чөйрөлөрүндө өз ара аракеттенүү боюнча диалог каралган. Жолугушуунун жыйынтыгында тараптар соода-экономикалык кызматташтыкты өнүктүрүү боюнча жол картасынын актуалдаштырылган версиясын даярдоону макулдашышты.

12 ноябрындагы 2025 Бакытжан Сагинтаев Кытайдын коммерция министринин орун басары Ян Дун менен сүйлөшүүлөрдү өткөрдү Евразия экономикалык комиссиясынын Коллегиясынын Төрагасы Бакытжан Сагинтаев 12-ноябрда ЕЭКтин штаб-квартирасында Кытай Эл Республикасынын коммерция министринин орун басары Ян Дун менен жумушчу жолугушуу өткөрдү. Жолугушуунун жүрүшүндө Евразия экономикалык бирлигинин өлкөлөрү менен КЭРдин соода-экономикалык кызматташтык жөнүндө макулдашуунун алкагында өз ара иштешүүсүнүн жыйынтыктары жана перспективалары каралды. "Кытай Эл Республикасы ЕАЭБ мамлекеттеринин негизги тышкы экономикалык өнөктөшү болуп саналат. 2024-жылдын жыйынтыгы боюнча, өз ара соода 291 миллиард доллар менен жаңы рекорддук көлөмүн белгиленген. КЭРдин үлүшү Бирликтин үчүнчү өлкөлөр менен жалпы товар жүгүртүүсүнүн 35%ын түздү", – деп белгиледи Бакытжан Сагинтаев. Бүгүн ЕЭК аянтчасында ЕАЭБ – Кытай Биргелешкен комиссиясынын бешинчи отуруму болуп өттү, анда Макулдашууну ишке ашыруу планынын ийгиликтүү аткарылышы белгиленген. Тараптар жол картасын жаңылоо зарылдыгы тууралуу жыйынтыкка келишти. Бул багыттагы иштерди жакын арада баштоо пландаштырылууда. "Жол картасын артыкчылыктуу тармактарда стандарттарды шайкеш келтирүү жана жол- жоболорду жөнөкөйлөтүү боюнча конкреттүү чаралар менен толтуруу зарыл деп эсептейм", – деп белгиледи ЕЭК Коллегиясынын башчысы. Жолугушуунун жыйынтыгы боюнча тараптар биргелешкен аракеттер менен сооданын мындан аркы өсүшү, экономикалык диалогду туруктуу өнүктүрүү жана ЕАЭБ өлкөлөрүнүн жана КЭРдин бизнеси үчүн жагымдуу шарттар камсыздалаарына ишеним билдиришти. ЕАЭБ – Кытай Биргелешкен комиссиясы 2018-жылы кол коюлган Евразия экономикалык бирлиги менен анын мүчө мамлекеттери бир тарабынан жана экинчи тарабынан Кытай Эл Республикасынын ортосундагы соода-экономикалык кызматташтык жөнүндө макулдашуунун 12.1-беренесине ылайык түзүлгөн. Биргелешкен комиссиянын тең төрагалары болуп ЕЭКтин соода боюнча министри Андрей Слепнев жана КЭРдин коммерция министринин орун басары Ян Дун саналат.

12 ноябрындагы 2025 ЕЭКтин V Спартакиадасынын жыйынтыктары чыгарылды Евразия экономикалык комиссиясынын штаб-квартирасында ЕЭК V Спартакиадасынын жеңүүчүлөрүн сыйлоо аземи болуп өттү. Комиссиянын Коллегиясынын Төрагасы Бакытжан Сагинтаев чемпиондорду куттуктап, алтын медалдарды тапшырды. Бардыгы болуп 2025-жылы Спартакиаданын мелдештерине ЕЭКтин 300дөн ашык кызматкерлери жана кызмат адамдары – Евразия экономикалык бирлигинин беш өлкөсүнүн өкүлдөрү катышышты. Алтынды 20 жаштан 60 жашка чейинки 106 адам утуп алышты.   Спартакиаданын программасына кичи футбол, баскетбол, волейбол, чоң теннис, кросс, аркан тартыш, шахмат, шашки, кол менен түртүп көтөрүлүү, тартылуу, армрестлинг, оор атлетика жана башка 26 жакын дисциплиналар кирген. 100 метрге чуркоодогу ийгилик жана мини-футбол боюнча турнирдеги блоктун командасынын курамындагы жеңиши үчүн – эки алтын медалды, ошондой эле турникке тартылуу үчүнчү орун үчүн – коло медаль ЕЭКтин энергетика жана инфраструктура боюнча министри Арзыбек Кожошевге тапшырылды. Бильярд турниринде алтын, кичи футболдо коло байге Комиссиянын экономика жана каржы саясаты министри Бахыт Султанов жеңип алды. Тартылуу боюнча мелдеште биринчи орун – ЕЭКтин соода боюнча министри Андрей Слепневдо. 3 км аралыкка кроссто күмүш медалды — Комиссиянын бажы кызматташтыгы боюнча министри Руслан Давыдов жеңип алды. ЕЭКтин атаандаштык жана монополияга каршы жөнгө салуу боюнча министри Максим Ермолович чоң теннис боюнча мелдеште үчүнчү орунду ээледи. Спорттун ар кандай түрлөрү боюнча эң көп алтын медалдар (төрт) – ЕЭК кызматкери Дмитрий Беловдо. Алина Каримова, Дарья Мельник, Нуртай Мусуралиев, Максим Натальченко, Сергей Панков жана Улан Чолпонбаевдин эсебинде үч алтын медаль бар. Жалпы тайпалык турнирде энергетика жана инфраструктура министринин блогу талашсыз жеңүүчү болуп, 44 медаль утуп алса, анын 20сы — алтын болду. Бакытжан Сагинтаев ЕЭК министри Арзыбек Кожошевге Комиссиянын V Спартакиадасынын жеңүүчүсүнүн Кубогун тапшырды.

Дагы көрсөтүү